南京

出自維基百科,自由嘅百科全書
跳去: 定向搵嘢

座標: 32°03′36.6″N 118°47′49.4″E / 32.060167°N 118.797056°E / 32.060167; 118.797056

中華人民共和國 > 江蘇省 > 南京市

想搵呢個詞嘅第啲意思,睇下【南京 (搞清楚)

南京
南京市
由頂順時針方向:1.南京城、玄武湖、紫金山;2.南朝石刻辟邪;3.鷄鳴寺;4.挹江門同南京城牆;5.夫子廟、秦淮河夜景;6.奧體中心;7.明孝陵神道;8.中山陵
由頂順時針方向:1.南京城、玄武湖紫金山;2.南朝石刻辟邪;3.鷄鳴寺;4.挹江門同南京城牆;5.夫子廟秦淮河夜景;6.奧體中心;7.明孝陵神道;8.中山陵

簡稱:寧
花名:金陵、石城、石頭城
舊名:冶城、越城、石頭城、金陵、秣陵、建業、建鄴、建康、丹陽、揚州、秦淮、上元、昇州、蔣州、白下、江寧、集慶、應天、南都、京師、天京、首都[1]
南京位置圖
南京位置圖
經緯度 北緯32°02′″東經118°46′43″
中華人民共和國 中華人民共和國
江蘇
地級政區 副省級市
轄下一級政區 11區[2]
轄下二級政區 81條街道、19個鎮[2]
創城史 前571年有地方建置[1]
前472年建城[3]
前333年建置[1]
設市年 1927年[1]
市委書記 黃莉新
市長 繆瑞林
政府駐地 玄武區北京東路41號
地理
總面積 6587.02[2] km²
水域面積 752.06[5] km² 佔11[6]%
市區面積 1269[4] km²
城市化率(2014) 80.92[7]%
海拔 4~448.9 m[6]
平均8.9 m
水域面積源於中文維基百科。
人口
總人口(2014) 821.61萬人[7]
戶籍人口(2014) 648.72萬人[7]
市區(2013) 577.5萬人[4]
人口密度 1243人/km²
民族 漢族 - 98.76%[8]
回族 - 0.86%[8]
官方語言 普通話
本地語言 江淮官話洪巢片南京小片南京話
人口密度據中文維基百科。
經濟
GDP(2014) 8820.75億元人民幣[7]
人均GDP 107545元人民幣[7]
市區GDP(2014) 3940.11億元人民幣
市區人均GDP 37283元人民幣[7]
時間
時區 中國時區UTC+8
識別信息
電話區號 +86 (0)25[9]
郵政編碼 210000-211000[9]
車牌 蘇A[9]
政區代碼 320100[10]
象徵
市樹 雪松[9]
市花 梅花[9]

最低海拔及平均海拔據中文維基百科。市區人均GDP係2013年數據。市區GDP係用總GDP減郊區GDP計出,郊區GDP來源自2014年公報。
網站 中國南京

南京粵拼naam4 ging1普通話拼音個快撈 Nanjing 威式拼音:Nan-ching,傳統英文名:Nanking),簡稱ning4,別名金陵gam1 ling4石(頭)城sek6 tau4 sing4,喺長江下游沿岸,係中華人民共和國江蘇省省會,曾經係中華民國名義上嘅首都[11],自古以來係中國嘅重要都會,素稱「東南門戶、南北咽喉」[3],係長江流域乃至南中國嘅中心都會。喺14世紀15世紀期間,南京曾經係世界上最大嘅都會[12]。喺2015年估算南京市區人口約615萬5千人,按市區人口計南京係世界第57大城市[4]

南京係中國歷史文化名城,有二千幾年歷史,做過多次國都,係中國四大古都之一,有「六朝古都」甚至「十朝都會」之稱,歷史遺存同埋自然景觀令南京成為中國嘅旅遊城市之一。南京係中國15個副省級市之一,即係喺經濟、出臺政策方面享有近乎於省級嘅自主權。南京亦係揚子江下游、長三角經濟區嘅產業城市同經濟中心,江南地區嘅文化(敎育、學術)同政治中心,作為商業中心喺華東僅次於上海無錫[13]。長江、京滬鐵路喺呢處交匯,係華東地區嘅交通樞紐。南京重有個出名,在於夏天時滾夾熱,暑氣重,同重慶武漢並列爲中國三大火爐

南京總面積6587.02 km²[2],總人口821.61萬人(2014年)[7]。2014年南京GDP 8820.75億元人民幣[7],人均GDP 10萬7545元[7],城鎮居民人均可支配收入4萬2568元,農民年人均純收入1萬7661元[7]。2013年城鎮登記失業率2.67%[14]。而家南京發展緊,人口不斷增加,預計2020年左右南京人口達千萬級,不過目前南京市政府希望控制人口,計劃屆時控制喺960萬人,發展目標放喺城市質量[15]

南京市中心全景圖
南京市中心全景圖

三國諸葛孔明對南京嘅讚嘆至體現南京喺中國嘅歷史政治地位:

鐘山龍蟠,石頭虎踞,真乃帝王之宅也!

意思就話鐘山(紫金山)畀長江呢條巨龍蟠住,而座石頭山似隻虎踞伏,有龍虎相守,係個有帝王之象嘅地方,定做國都啱曬。所以歷代中原王朝南渡,都揀南京做首都,不過有個歷史現象幾得意,定親南京做首都嘅王朝,基本上都唔長久,而且風雨飄搖。於是又有人話南京風水差,至於點差,無人知,有傳聞話秦始皇有日見到南方有紫氣昇(紫金山嘅名又一種講法),啲人話嗰度會出帝王,秦皇自然唔想有人搶佢位,於是挖崩啲山、挖咗條秦淮河,秦淮河彎彎曲曲,係金粉胭脂地,就話紅顏禍水禍君王,藉此搞衰南京風水[註 1][16]。不過,呢個只係民間笑談[3]。雖則有噉嘅傳聞,南京依然係受歡迎嘅都城選址,孫中山喺《建國方略》就讚:「……其位置乃在一關善之地區,其地有高山,有深水,有平原,此三種天工,鍾毓一處,在世界中之大都市誠難覓如此佳景也。」[3]所以辛亥革命後,遠東第一個民主共和國亦即中華民國喺南京宣佈成立。

因為南京喺民國係國都,喺日本侵華時專登喺南京大屠殺,約30萬人畀日軍殘殺,係人道災難同侮辱國格。

[編輯]

東亞[編輯]

「南京」嘅字面意思就係「南面嘅京師」,「京」講明佢曾經貴爲首都,喺東亞傳統當中,「京」一般係首都先安嘅名。譬喻日本京都韓國首爾[註 2],個名單純係首都噉解,都係做過或做緊首都;中國嘅北京意思係「北面嘅首都」,日本嘅東京越南東京(今日嘅河內),佢哋意思都係「東面嘅首都」,呢三個城市而家都係國都。

而對中國來講,「南京」嘅「南」係相對於中原嘅洛京而言,因為自古以來洛陽視爲「天地之中」,係中原嘅中心地帶,稱爲「神都」,中國首都本來應該定喺中原,而家方位有所偏差,於是就喺前面加個方位來表示。類似嘅有北京,以及曾經嗌過做「西京長安」嘅西安,同埋曾經稱做「東京開封府」嘅開封

重有遞種講法認為南京喺明朝時原本係全國首都,後來遷都北京,南京變成留都,結果就有南北兩京嘅講法,譬如明朝時將漢地概括爲「兩京十三省」。換言之係複都制嘅產物,而明朝立國之初,亦將金陵作爲南京,而大梁作爲北京,亦係南北兩京[18][19]

西洋[編輯]

南京嘅傳統英文名叫做Nanking,呢個係郵政式拼音,由舊時嘅英國傳教士根據當時嘅官話整落嘅,係以前中國地名嘅羅馬字寫法。而家南京嘅英文名叫做Nanjing,呢個係普通話拼音,係中華人民共和國成立後推行嘅拼音方案。呢兩個名好接近,只係「京」字嘅聲母唔同,呢個反映出百幾年間官話音韻嘅變化,亦即係顎化。「k」表明「京」嘅舊時官話聲母同現時粵語一樣,即係粵拼、普通話拼音嘅「g」,音標係[k],但後來因爲[k]之後接[i][k]開始顎化爲[kʲ],接住發音部位前移,由軟顎轉移到硬顎,變成現時嘅[t͡ɕ],寫成普通話拼音就係「j」。

雖然Nanjing係現時英文標準名,不過舊式嘅Nanking重流傳,而且好多嘅歐洲語言繼續用唔顎化嘅串法來稱呼南京,比如法文嘅Nankin,葡萄牙文嘅Nanquim,西班牙文嘅Nankín,意大利文嘅Nanchino,荷蘭文嘅Nanking,俄文Нанкин(羅馬字轉寫:Nankin)。

其他[編輯]

此外佢重有好多個名:六朝古都luk6 ciu4 gu2 dou1係話佢係三國東吳、之後嘅東晉南朝嘅國都;而十朝都會sap6 ciu4 dou1 wui6則係喺六朝嘅基礎上加埋十國中嘅南唐明朝太平天國民國南京國民政府[3][20]。實際上佢重係楊吳嘅西都、南宋嘅行都。

「金陵」呢個名係南京有名嘅雅稱,佢嘅出處有三種講法:帝王埋金、金壇、因立號。詳情可睇呢度。而「石(頭)城」出自於南京城第一次建置喺石頭山;而簡稱「寧」出自於清代時呢度所屬政區江寧府。而喺民國國民政府時,由於南京係首都,作爲直轄市,嗰陣時簡稱做「京」。

而其他主要嘅名:秣陵mut6 ling4出自於秦始皇對呢度嘅貶低[21]建業gin3 jip6出自孫權祈求創立一番帝業嘅青雲志,而同音嘅建鄴gin3 jip6則係晉朝滅吳後要改呢個故都嘅名,而鄴字源自晉司馬皇室嘅發跡地鄴城,表示毋忘故土[22]建康gin3 hong1係因爲要避忌晉愍帝司馬鄴嘅名;江寧gong1 ning4出自晉朝時呢度「外江無事」[23][註 3]應天jing3 tin1出自「順人應天」,呢個名係用來讚頌新立嘅明朝[24]

唐代時呢度換過好多個名,歸化gwai1 faa3出自唐初喺當地割據稱王嘅杜伏威歸順李唐嘅事[25]白下baak6 haa6出自南朝時白下城,「白下」意思係「白石山下」,白石山亦即幕府山,因盛產白雲石得名[26]上元soeng6 jyun4出自初設時正值唐肅宗上元年間,後來上元、江寧劃城而治近千年,人稱「上江兩縣」[27]昇州sing1 zau1出自當時安史之亂爆發,金陵作爲古都好緊要,所以刻意提昇佢地位,意思係「昇平之地」,寄寓平安願想;平亂後又貶爲縣[28]

元代時,呢度由建康改名做集慶zaap6 hing3,出自呢度係元文宗嘅龍興之地,元文宗原本喺宮廷權鬥時失敗流放,後來召返入京,封佢喺建康做懷王,後來宮廷政變,佢成爲元朝第七個皇帝。集慶嘅意思係「滙集喜慶」,因爲元文宗就喺呢度封做懷王,之後重做埋皇帝,係兩大喜事[29]

南京曾經係清朝末年一時興起嘅太平天國嘅都城,定都之後,洪秀全改佢名做天京tin1 ging1,意思係天國京城、上天福佑嘅京師,噉係因爲太平天國以拜上帝敎來組織,話佢哋受上帝福音庇佑。之所以揀南京做首都,係由於南京係前明故都,同時作爲舊時南渡王朝嘅古都,有恢復中華嘅意味;而當時中國社會唔多認可基督教,話佢洋教而抵制佢,連政府都好排斥[30];太平天國運動融合咗基督教思想、中華思想、民族復仇情緒以及民間儒學背景[31][32],定都南京就係挑戰清王朝。由於呢種混合形態嘅思想,將基督教人類平等思想同反清求變情緒撈埋,結果席捲半個中國,最後因做嘢過曬頭而失民心,無人同情支持[32][30][31]

地理[編輯]

南京位於長江下游地區,喺江蘇嘅西南部,北距北京1200公里,西距成都1600公里,東離上海300公里。轄區座標範圍喺北緯31°14′~32°37′,東經118°22′~119°14′之間[6],市中心座標喺北緯32°02′38″,東經118°46′43″[9]。南京地控長江,江北係江淮平原,江南嘅東面係長江三角洲,從長江口到南京市區有347公里,全年都可通航萬噸級輪船[6],同時有京滬鐵路穿過,係中國最大嘅綜合性經濟區──長三角經濟區嘅成員[33]。轄區面積6597平方公里[9],南北最大直綫距離140公里、東西最大直綫距離80公里,東北、東面、東南分別係江蘇嘅揚州常州鎮江,南、西、北分別係安徽宣城馬鞍山滁州,市界總長730公里[34]

玄武湖同紫金山

南京市區座落喺山水之間,其中長江喺市區西部、北部,從西南方向流去東北,再轉向東面流去鎮江,流經南京轄區嘅江面長95公里,最窄嘅江面喺下關,得一公里闊[6],江面上有啲沙洲。城內亦有好多嘅河湖,有穿過市區南北嘅秦淮河金川河,喺江南滙入長江,喺江北有滁河中文滁河自北向南滙入大江[5];另外城中有玄武湖莫愁湖呢啲湖,成個南京有11%嘅水域面積[6]

南京多山,中部有江北嘅老山以及寧鎮山脈,南部嘅秦淮流域有橫山、東廬山,其中市區東面嘅紫金山係名山來嘅,紫金山又稱爲鐘山,海拔448.9米[6]。除咗紫金山,城北有幕府山,西有清涼山(古名石頭山),城南有出產雨花石嘅雨花臺,西南有牛首山祖堂山,東北有紅葉聞名嘅棲霞山,江邊有長江三大磯之一嘅燕子磯[35]。地形以丘陵爲主,屬寧鎮揚丘陵區,成個南京面積低山佔3.5%、丘陵佔4.3%、崗地佔53%、平原低地同水域佔39.2%,森林覆蓋率13%[6]。喺南京嘅北、中部啲泥以黃棕壤(地帶性土壤)爲主,南部同安徽交界處有細面積嘅紅土[6]

資源[編輯]

南京嘅資源好豐富,佢位於長江中下游富鐵、富銅嘅成礦帶[36],有54種礦藏,其中有開採價值嘅近30種[6]。鐵、銅、鋁、鋅、金、銀、鍶等15種礦藏儲量江蘇第一,有4種入中國前六位[35],其中鐵儲量佔江蘇全省89%,銅、鉛鋅儲量佔全省90%以上[36]。南京地方嘅鐵礦從春秋開始,開採咗2500年,礦點、礦床總數達46處,其中冶山鐵礦由西漢開始,直到而家重開採緊[36]。而溧水愛景山嘅礦(天青石)無論係儲量、品質都係東南亞第一[35][36]。喺六合重有藍寶石礦[35]。南京嘅水資源亦好豐富,除咗長江、地下水,重有好多嘅河湖。南京主要嘅地熱資源係温泉,出名嘅有江寧嘅湯山温泉,浦口嘅湯泉温泉、珍珠泉温泉,水温一般喺20℃~60℃之間[6]

氣候[編輯]

南京屬北亞熱帶濕潤氣候,受東亞季候風影響,四季分明,雨水充沛兼雨熱同季。年均降雨日117日,年均降雨量1106.5毫米,相對濕度76%,無霜期237日。每年6月下旬到7月上旬係梅雨季,落梅雨時啱好梅子熟,所以噉叫;江南嘅梅雨相當於嶺南嘅回南,雨霧多,潮氣重。南京年均温15.3℃[6]。冬天時主要吹東北風,夏天時主要吹東南風,一月平均最低氣温-1.6℃、平均最高氣溫7.2℃,七月平均最高氣温30.6℃,平均最低氣溫24.9℃[6][37]。記錄到嘅極端高温係43℃,出現喺1934年7月13號,而極端低温記錄係-14℃,出現喺1955年1月6號[6]。南京夏天時滾夾熱兼焗,7月均温達28.1℃[37],人稱「火爐」,同武漢重慶一齊評爲中國三大火爐。不過根據近30年嘅高温日數記錄(氣温達35℃以上嘅日子爲高温日),南京嘅高温程度、日數明顯少過九江、武漢、重慶[6][38]。凍起上來,南京亦幾凍,1月均温達2.7℃[37],平均最低温都喺冰點之下。

四季劃分中,南京喺4月1號左右入春,即係未到清明就已經萬物復甦;6月8號左右入夏,大概係芒種時節;9月18號左右入秋,呢時係白露時節;11月12號左右入冬,即係過咗立冬啲植物重有些少生機。其中冬夏兩季長,春秋兩季短[6][註 4]

南京(均值1981–2010,極值1951–2013)氣候平均數據
月份 1月 2月 3月 4月 5月 6月 7月 8月 9月 10月 11月 12月 全年
極端最高溫 ℃(℉) 21.0
(69.8)
27.7
(81.9)
30.3
(86.5)
34.2
(93.6)
37.5
(99.5)
38.1
(100.6)
39.7
(103.5)
40.7
(105.3)
39.0
(102.2)
33.4
(92.1)
28.6
(83.5)
23.1
(73.6)
40.7
(105.3)
平均最高溫 ℃(℉) 7.2
(45)
9.5
(49.1)
14.2
(57.6)
20.7
(69.3)
26.2
(79.2)
29.1
(84.4)
32.2
(90)
31.7
(89.1)
27.7
(81.9)
22.5
(72.5)
16.2
(61.2)
9.9
(49.8)
20.59
(69.07)
平均氣溫 ℃(℉) 2.7
(36.9)
5.0
(41)
9.3
(48.7)
15.6
(60.1)
21.1
(70)
24.8
(76.6)
28.1
(82.6)
27.6
(81.7)
23.3
(73.9)
17.6
(63.7)
10.9
(51.6)
4.9
(40.8)
15.91
(60.64)
平均最低溫 ℃(℉) -0.7
(30.7)
1.4
(34.5)
5.3
(41.5)
11.0
(51.8)
16.5
(61.7)
21.0
(69.8)
24.9
(76.8)
24.4
(75.9)
19.9
(67.8)
13.6
(56.5)
6.8
(44.2)
1.1
(34)
12.1
(53.78)
極端最低溫 ℃(℉) -14.0
(6.8)
-13.0
(8.6)
-7.1
(19.2)
-0.2
(31.6)
5.0
(41)
11.8
(53.2)
16.8
(62.2)
16.9
(62.4)
7.7
(45.9)
0.2
(32.4)
-6.3
(20.7)
-13.1
(8.4)
-14
(6.8)
降水量 ㎜(英寸) 45.4
(1.787)
53.0
(2.087)
79.6
(3.134)
80.3
(3.161)
90.0
(3.543)
166.2
(6.543)
214.3
(8.437)
143.8
(5.661)
72.9
(2.87)
59.7
(2.35)
55.9
(2.201)
29.5
(1.161)
1,090.6
(42.937)
相對濕度(%) 74 73 72 71 71 76 80 80 78 75 76 73 74.9
平均降水日數 8.7 9.1 11.8 10.0 9.7 10.6 12.3 11.8 8.1 7.8 7.4 6.2 113.5
日照長度 124.7 120.3 144.7 169.2 194.2 162.8 196.7 201.6 164.0 164.2 147.4 137.1 1,926.9
出處:中國氣象局[37]

[編輯]

中國地名變遷
建置 戰國時代
現名 南京市
春秋 棠邑(楚國)[註 5]
戰國 金陵邑(前333年;楚國江東郡)[39]
瀨渚邑(前541年;吳國)[註 6]
秣陵縣(前210年;會稽郡)
棠邑縣(前221年;九江郡)[註 5]
丹陽縣(前210年;會稽郡)
江乘縣(前210年;會稽郡)
溧陽縣(會稽郡)[註 7]
秣陵縣[註 8]
丹陽縣[註 8]
江乘縣[註 8]
溧陽縣
胡孰縣[註 9][註 8]
堂邑縣[註 5]
三國 揚州州治(223年)
丹陽郡治(221年)
建業縣(212年;吳國揚州丹陽郡)
丹陽縣(吳國揚州丹陽郡)
湖熟典農都尉(吳國揚州丹陽郡)
江乘典農都尉(吳國揚州丹陽郡)
溧陽屯田都尉(吳國揚州丹陽郡)
堂邑縣(吳國揚州廣陵郡)
西晉 揚州州治(280年)
丹陽郡治(281年)
建鄴縣(揚州丹陽郡)
秣陵縣(揚州丹陽郡)
江寧縣(揚州丹陽郡)[註 10]
丹陽縣(揚州丹陽郡)
湖熟縣(揚州丹陽郡)
江乘縣(揚州丹陽郡)
溧陽縣(揚州丹陽郡)
堂邑縣(揚州)[註 11]
東晉 揚州州治
丹陽郡治
建康縣(揚州丹陽郡)
秣陵縣(揚州丹陽郡)
江乘縣[註 12]
江寧縣(揚州丹陽郡)
湖熟縣(揚州丹陽郡)
丹陽縣(揚州丹陽郡)
溧陽縣(揚州丹陽郡)
懷德縣[註 12]
堂邑縣[註 12]
僑置郡縣[註 12]
南北朝 揚州州治
丹陽郡治
建康縣(揚州丹陽郡)
秣陵縣(揚州丹陽郡)
江寧縣(揚州丹陽郡)
丹陽縣(揚州丹陽郡)
同夏縣[註 13]
湖熟縣[註 13]
江乘縣[註 13]
僑置郡縣[註 13]
蔣州州治/丹陽郡治[註 14]
江寧縣(589年)[註 10]
溧水縣(591年)[註 15]
六合縣(584年)[註 16]
郡治:丹陽、江寧[註 17]
州治:揚州、蔣州、昇州[註 17]
江寧縣(620年前;635年~757年;758年~761年)[註 10]
歸化縣(620年~625年)[註 10]
金陵縣(625年~626年)[註 10]
白下縣(626年~635年)[註 10]
上元縣(761年以後)[註 10]
溧水縣[註 15]
丹陽縣[註 10]
安業縣(620年~625年)[註 10][註 15]
六合縣[註 16]
五代十國 昇州(920年前)[註 18]
金陵府(920年~937年)[註 18]
江寧府(937年後)[註 18]
昇州(975年~1018年)[註 19]
江寧府(昇國)(1018年~1129年)[註 19]
建康府(1129年後)[註 19]
建康府(1275年~1277年)[註 20]
建康路(1277年~1329年)[註 20]
集慶路(1329年~1356年)[註 20]
應天府(1356年後)[註 21]
應天府[註 21]
南京(南直隸)(1368年~1378年)[註 21]
京師(1378年~1421年)[註 21]
南京(南直隸/南都/留都)(1421年後)[註 21]
江寧府(1645年~1853年)[註 22]
江寧郡(1853年~1864年;天京省)[註 23]
江寧府(1864年後)[註 23]
中華民國 南京府(1912年~1913年)[註 24]
江寧縣(1913年~1927年4月)[註 24]
南京市(1927年4月~6月)[註 24]
南京特別市(1927年6月~1929年4月)[註 24]
首都特別市(1929年4月~1930年)[註 24]
南京市(1930年後)[註 24]
中華人民共和國 南京市(1949年後)[註 25]

南京歷史豐富,同長安洛陽燕京並列爲中國四大古都,其中南京喺中國史度有特殊地位、價値,朱偰話:「此四都之中,文學之昌盛,人物之俊彥,山川之靈秀,氣象之宏偉,以及與民族患難相共,休戚相關之密切,尤以金陵爲最」[1]。噉係因爲南京嘅地理位置、風水特別,喺中原畀異族佔領、唐人就來滅種之際,南京就成爲休養生息繼而北伐、恢復中華嘅基地,畀人睇做係唐人嘅復興之地[1]。大明、民國嘅北伐贏咗,東晉、蕭梁、劉宋嘅北伐亦功敗垂成;南宋啱起時群臣都想定都呢度來矢志收復中原,不過宋高宗唔想搞就定都去杭州,不過亦迫於輿論定南京爲行都[1]

南京歷代名稱圖(喺東華門影)

商周時期,秦淮一帶就有密集嘅村,稱爲湖熟文化,到春秋戰國時呢啲村開始發育爲城市;3100年前,南京地方係西周周章嘅封地。周靈王元年(前517年),楚國已經喺今日江北設棠邑,置大夫,南京開始建置政區[39]。周景王四年(前541年)吳國喺轄區南部設瀨渚邑(又叫固城)[39],前495年左右吳王夫差喺冶城山(今日朝天宮一帶)築冶城[43],開辦鍊銅作坊。周元王四年(前472年)越國滅吳後,范蠡喺今日中華門外秦淮河口嘅長干里築越城(又叫范蠡城),一般將呢年定爲南京正式建城年,距今已過2500年[3][61][62]。周顯王三十六年(前333年),楚國征服越國,楚威王熊商喺石頭山(相傳係今日嘅清涼山)築金陵邑,所以南京又叫「金陵」「石頭城」[43]秦朝大一統後,秦始皇三十七年(前210年),秦始皇南巡,毀壞金陵邑城,喺而家江寧嘅秣陵街道秣陵縣(秣讀抹)[40],並從金陵地區開始修築穿過江蘇東南同浙江東北嘅馳道。傳說秦皇之所以改名,係因為聽到「金陵王氣」嘅傳言,嬲嬲哋就將「金」改成「秣」,「秣」嘅意思係「餵馬嘅草料」[21]來貶低呢度。

直到三國之前,南京只係普通嘅縣。211年,孫權佔據咗江東六郡,從京口(而家鎮江)移治所去秣陵,遞年喺石頭山修築石頭城,兼且改名建業,以求帝業興旺[42];221年,丹陽郡治由宛陵搬去建業;223年,喺建業設揚州,之後直到唐武德八年,「揚州」都係指南京地區[63]。229年孫權稱帝,東吳都城從武昌搬去「鐘山龍盤,石頭虎踞」嘅建業,南京自此由縣蛻變成都城[63]。230年,設立咗江南第一所國學,之後都城大興土木,成爲江南第一名城,同洛陽、長安、以及曹魏都邑許昌一樣係三國時嘅大都市[64];265年九月孫皓將國都搬返去武昌,但遞年十二月又搬返來[65]。後來280年滅東吳,當年建業改名做秣陵,魏國設嘅揚州併入吳國嘅揚州,州治、丹陽郡治繼續喺呢度[45];281年以秦淮河爲界,以北爲建業,以南爲秣陵,282年建業嘅業字改成「鄴」(鄴讀業)做建鄴,後來因為要避晉愍帝司馬鄴名諱,建興元年(313年)建鄴改叫建康[44],呢個名後來喺宋元兩代又浮(音:蒲/pou4)過次頭。五胡亂華之後,室南渡,先係304年匈奴人劉淵建立漢國(卽前趙,同漢朝無關),於是307年瑯琊王司馬睿來呢度修葺都城,311年永嘉之禍令西晉國都淪陷,喺317年胡人殺咗晉愍帝後,啲士族世家扶持司馬睿即位做晉元帝,中興晉朝基業,定都建康,史稱東晉[44],入南北朝時代。期間南京一直係中華正朔所在,建立東晉後就設國子監[44],保住正宗中華文化,人稱「江左風流」。之後嘅都定都呢度,同東吳、東晉合稱六朝,所以南京有名嗌「六朝古都」。

六朝時南京好繁華,係南京第一個黃金時代,謝朓嘅詩句「江南佳麗地,金陵帝王州」就係經典概括[3]。六朝嘅建康係當時世上最大嘅城市[1],人口過百萬,係世界上第一個人口達百萬級嘅都會[1]。六朝嘅南京同羅馬並列爲「世界古典文明兩大中心」[1]

蕭秀墓嘅南朝石刻辟邪。呢啲南朝文物係六朝建康嘅標誌遺蹟

由於衣冠南渡,320年後起南京地區有大量嘅僑郡、僑縣來安置南渡人口,而且變遷複雜,最多時有12個僑郡、33個僑縣,劉宋之後廢除[44][註 12][註 13]。由此南京人口暴漲,中原精英帶來嘅文化因而保存。雖然328年時畀叛軍攻陷,直到遞年平叛時,建康毀壞唔少,但330年起修築臺城,建康又恢復返原先嘅昌盛[44]。當時建康文化繁榮,劉義慶世說新語》、鍾嶸詩品》、昭明太子文選》、范曄後漢書》、裴松之三國志註》、沈約宋書》、蕭子顯南齊書》、劉勰文心雕龍》等等重要嘅文史著作喺建康寫成。當時建康紙醉金迷,佛教大興,居民28萬戶左右[66],而僧尼達10萬餘,梁武帝先後四次喺同泰寺捨身出家,當時建康佛寺好宏麗,規模大嘅號稱「騎馬關山門」,因此唐人杜牧寫詩嘆「南朝四百八十寺,多少樓臺煙雨中」。建康喺南朝期間遇過災難,比如464年由於七年大旱導致米價暴漲,十之六七嘅居民餓死;侯景之亂更幾乎令建康毀城,但建康都恢復元氣[67]。589年2月,隋軍南征,攻入臺城,喺景陽樓嘅井度生擒陳後主同佢嘅兩個妃子,之後隋文帝落令城邑、宮殿通通毀壞,變曬做田[68],僅喺石頭城設蔣州(607年實行郡縣制,蔣州改成丹陽郡[46]),同時將多數縣合併入江寧縣[註 10],南京第一次繁華結束。因為南朝介乎漢唐,同時中國經濟文化重心南移,南京作為中心承前啟後,喺四大古都別具特色。

兩代,中原朝廷刻意打壓金陵故都,尤其輔公祏喺623年~624年間喺金陵稱帝叛唐後[68],喺唐朝有255年貶爲潤州屬縣[47]。不過隋朝開掘嘅大運河長江對面嘅揚州成爲貨物集散地,帶挈起金陵,於是六朝嘅繁華逐步再現。雖然風頭歸咗揚州,金陵依然係南方一個經濟、文化中心,李白、劉禹錫、杜牧、李商隱呢啲文豪都住過、遊過呢度。唐代時,州郡變動頻繁,喺武德八年尾(625年),揚州州治、大都督府離開金陵,搬去江都,從此「揚州」再都唔指金陵而指今日嘅揚州城[47][68];之後設江寧郡,後改爲昇州,金陵先重新成爲州治[註 17]。而縣層面,名、隸屬變動頻繁,先後叫江寧縣歸化縣金陵縣白下縣上元縣[註 10]

棲霞寺嘅舍利塔。間寺起喺601年,10世紀時重建。

五代時中原諸雄相爭、戰亂唔停,江南安定過北方,從楊吳開始有70幾年無戰亂,於是楊吳時由昇州改設金陵府,914年起拓築金陵城[49],後來成爲楊吳嘅西都。之後金陵成為十國之中最強嘅南唐嘅國都,南唐立國當年已經畀楊吳改名做江寧府[註 18]。縣層面上,917年,上元縣度重置江寧縣,從此上元、江寧兩縣共治一城,一直延續到清末[註 10]。經過南唐五次擴築[49],當時金陵經濟繁榮,秦淮河一帶商賈雲集,買賣興旺,隨之文化發達,詩詞、書畫都開咗一代新風,南唐皇帝李璟李煜都係有名詞人,諸如「細雨夢回鷄塞遠,小樓吹徹玉笙寒」(李璟)、「問君能有幾多愁,恰似一江春水向東流」(李煜)呢啲金句都係金陵城中誕生;而名畫《韓熙載夜宴圖》亦喺呢度畫成[69]

北宋滅南唐後,重置昇州,無耐又叫江寧府,兼且作爲趙禎(宋仁宗)受封嘅昇國嘅京府[69];南宋建炎三年(1129年)改爲建康府[註 19],元朝改為建康路集慶路[註 20]。宋元時期南京嘅城市規模保持住南唐嘅水平,由始至終係江南經濟重鎮。1034年開始喺城南秦淮河北岸起夫子廟,成爲文化重鎮;北宋時王安石三次以宰相之位擔任江寧知府,重定居、終老於此[69];宋高宗三次駐蹕建康府,達一年半,並且作爲南宋行都[69];元代時城內設東、西織染局,大量生產絲綢,專業工匠六千幾戶,係當時東南紡織業中心。宋代時金陵城其實係有機會做首都嘅,喺靖康亂之後,康王趙構就喺呢度登基爲宋高宗,不過之後金兵南下,宗澤嘅部下杜充無能、失地千里,喺完顏宗弼攻過長江後向金軍投降,最後金陵陷落,宋軍失咗呢座江南大城,雖然話建炎四年(1130年)岳飛喺下關及城南牛首山大敗金兵[69],岳家軍收復建康城,不過自此南宋就唔敢定都建康而偏安於臨安

明代南京都城圖(喺東華門影)
南京明城牆嘅中華門

蒙元南侵後,建立種族制度,其中南方漢人及其他民族屬最低等嘅南人,受最重嘅壓迫,比如重稅苦役、唔公正嘅刑律,元末再加埋啲天災人禍刺激,各地有反抗暴政嘅起義,朱元璋係其中之一。1356年,朱元璋攻佔集慶,改名應天府,之後以呢度爲根據地統一中國。1368年朱元璋開創明朝,先係金陵、大梁各爲南北京,後來1378年正月廢大梁北京,以應天爲京師[註 21]。開國後大興土木,用21年修築號稱96里長嘅城牆(實長35.267公里,係世界第一大城垣[1]),再四年起好外城後號召全國富戶移民京師[19],南京第一次成為全中國嘅首都,成個明朝係佢嘅第二個黃金時代,直到遷都北京前,南京係當時世界上最大嘅都城[70][1],之後遷都帶走南京半數戶口嘅人[19],先畀北京取代[70];鷄籠山邊嘅國子監學生達萬人,重有日本、朝鮮嘅留學生添。朱元璋駕崩後,朱棣發動靖難之變奪得帝位,永樂元年(1403年)改北平府爲順天府做行都,1421年遷都順天府,而應天府成為陪都,再次有南北兩京嘅講法[註 26]。當時啲人對遷都好大意見,所以到佢嘅仔明仁宗登基時直接返南京,但因爲佢登基一年之後就駕崩,結果京師遷唔返去,北京確定爲國都,但開國皇帝嘅皇陵(明孝陵)喺南京,兼且佢係先皇開國登基之地,所以南京獲得留都嘅地位,就似國都北京設直隸噉設南直隸。作為留都,南京嘅設置配套同北京接近,南京五府六部(留守政府)雖然實權唔大,機構虛化,但亦係中央軍政機構。而位於明故宮公園午朝門公園一帶嘅南京紫禁城,就係而家北京紫禁城嘅藍本[73],後來朱棣搬國都入北京,照南京故宮個樣營造大內,甚至拆咗南京舊宮;後來佢嘅仔想還都而修葺舊宮,但因爲暴斃搬唔成,日後南京雖然係留都但舊宮無心打理,明中後期火燭燒燬舊宮三大殿,之後清軍、太平天國嘅戰亂毀滅咗南京故宮[73],而家得返啲門及主要建築嘅石基、同其他石構建築。雖則話遷咗都,但南京作爲當時中國經濟文化中心嘅地位無變,比如鄭和去西洋嘅船隊就係呢度出發,《永樂大典》就喺南京國子監度成書,大報恩寺及琉璃塔等重要寺院落成[19]江南貢院江寧織造府呢啲重要文敎、經濟機構都喺呢度。作爲國都之一,南京同外國有好多交往,甚至有外國國王葬喺呢度,比如渤泥(而家汶萊)國王麻那惹加那訪問南京時客死異鄉,而落葬呢度[19]

1644年,北京明朝政權覆滅,福王朱由崧喺南京建立南明,稱爲弘光帝[19]。1645年軍攻陷南京,殺咗弘光帝,南京降格爲江寧府,不過民間習慣叫南京。期間南京嘅經濟政治地位依然好緊要,初時係江南省省城,康熙六年拆成江蘇、安徽後,除咗係江蘇省城,重長期係管理安徽民政嘅安徽布政使駐地(1780年先搬趄),同時管轄江蘇、安徽、江西嘅兩江總督亦駐喺呢度[74];軍事上有江寧將軍康熙乾隆曾六次遊南京,乾隆甚至喺度起行宮[74]。雖然因爲係大明故都而遭受貶抑,清代時嘅南京依然係重要嘅文化中心,四大名著之首嘅《紅樓夢》,入面諸多情節、人物、景觀、習俗、話,都係源出南京,因爲作者曹雪芹嘅家族世襲江寧織造(供應皇家絲綢),後來抄家,感慨之下將佢嘅人生、思想寫成小說[74];江南貢院喺光緒年間有兩萬幾間號舍,規模全國第一[3]。1842年鴉片戰爭清朝失敗,喺南京下關江面嘅英國軍艦康華麗號簽江寧條約(南京條約)[74]。1853年太平天國定都江寧,改名天京,同時江寧由府改爲郡,在此建都11年,直到1864年清朝恢復當地統治[註 23]。因為動亂,如天京事變、太平軍同清軍嘅戰爭、以及湘軍破城後嘅燒殺掠奪[74],南京一度蕭條,後來開通商埠、鐵路通車,南京先恢復返。據1858年天津條約》、1860年北京條約》,1899年南京成爲通商口岸,對外國開埠[74]。晚清,喺呢度先後任南洋大臣兼兩江總督嘅曾國藩李鴻章左宗棠沈葆楨張之洞劉坤一端方等重臣都係洋務運動嘅領軍,因此當時南京係洋務新政嘅實踐地,發展咗近代文教、交通、工業,到1910年,城內有名嘅公立、教會興辦嘅新式學堂達48間。1908年後,滬寧鐵路、江寧鐵路陸續開通[74]。1911年發生辛亥革命,當年10月12號,江浙聯軍攻佔江寧;10月13號,各省代表喺武昌、上海同時決議喺江寧設臨時政府;11月8號,獨立嘅17省代表聚喺江寧,通過總統制議案,10號選孫中山做臨時大總統[74]

1912年1月1號中華民國喺南京成立,廢除江寧府,而江寧、上元兩個縣合併爲南京府[註 24],將臨時政府設喺呢度,南京再一次成為中國首都。不過因爲華北畀清廷控制,所以同袁世凱交換,孫中山喺當年4月辭職,讓位畀佢,而袁世凱去逼宮,令清朝退局。之後遷都北京,結束臨時政府,入到北洋政府時期[75],所以遞年南京府改成江寧縣,繼續做江蘇省城,不過上元無恢復返,自此消失[註 24]。1913年7月15號~8月11號期間,黃興何海鳴喺南京先後三次宣佈江蘇獨立,討伐袁世凱,不過當年9月2號就畀北洋軍攻佔南京[75]。1919年5月4號北京爆發五四運動,自5月6號起,南京市民都參加埋呢場大規模嘅反日示威,學校罷課,商家罷市,直到6月12號先陸續復課復市[76]

1927年中華民國國民政府,而家嘅南京總統府

孫中山過身後,民國十五年(1926年)1月15號中山陵動工,直到1929年春先完工,然後當年6月1號舉行奉安大典(國葬)[75]民國十六年(1927年)3月24號,北伐嘅江右軍攻克江寧,立即廢除上頭嘅金陵道,改正式名做南京。4月9號,蔣介石由上海來南京,另籌國民政府,亦即寧漢分裂;4月18號成立南京國民政府,4月24號成立南京市,6月1號由市政廳改爲市政府,南京正式建市[75]。6月6號改爲南京特別市,8月19號武漢國民政府宣佈搬去南京,寧漢合流[75]。1928年北伐完咗,北京改做北平,入訓政時期;1929年起好中山陵後,4月16號改設首都特別市,直到遞年(1930年)恢復爲直轄嘅南京市。1931年頒佈《訓政時期約法》,規定「中華民國國都定於南京」[75]

喺國民政府時期,南京係中國六大都會之一,1927年到1937年稱為南京十年,南京城市發展迅速,成為現代都會,喺世界上出嗮名。1928年時就已經成立專門嘅首都建設委員會,請啲專家來規劃城市,1929年12月就作好咗《首都計劃》。東亞第一個強力電臺(中央廣播電臺)、中國第一個氣象臺、當時遠東規模最大嘅中央體育場、中國最早嘅火車輪渡都出現喺南京[75]

1937年日本全面侵華,8月14號國民政府發《自衛抗日聲明書》,正式抗日。11月中旬,日軍進迫南京,國民政府宣佈搬去重慶。12月1號,打南京保衛戰[75];12月13號南京淪陷之後,日軍對平民、戰俘有系統噉屠殺咗六個星期,而且手法殘忍,連細路、長者、宗敎人士都唔放過[77]。據遠東國際軍事法庭南京軍事法庭估計,南京大屠殺遇難人數約30萬到35萬[78]。1938年3月28號,日本扶植嘅南京維新政府成立;1939年10月1號,日軍喺南京設立中國派遣軍總司令部,作爲侵華日軍嘅指揮中心;1940年3月30號,汪精衛政權以「還都南京」嘅名義喺呢度成立,對抗喺重慶由蔣介石領導嘅國民政府,同時解散南京維新政府、華北臨時政府[75][註 24]。由於經歷過大屠殺,南京市民好反感日本,包括幫日本做嘢嘅傀儡政權[79]

1945年抗日贏咗,8月15號日本宣佈無條件投降後,第二日汪精衛政權冧檔,同時設臨時政務委員會;9月9號喺南京中央陸軍軍官學校嘅大禮堂度舉行中國戰區受降儀式[75]。日本投降後,有南京市民想毆打日本人來報仇,但因爲政府以德報怨嘅政策而受阻[79]。1946年2月,設南京軍事法庭,審判日本戰犯[80];4月1號,喺朝天宮設高等法院,審判漢奸,直到1948年1月5號先審完[81];4月30號國民政府發還都令,5月5號從重慶還都南京[75][11]。1946年5月3號,中共代表團來到南京開始國共談判,不過遞年3月7號談判衰咗,內戰開打。1946年11月15號,南京開制憲國民大會,通過咗《中華民國憲法》;1948年3月29號,中華民國第一屆行憲國民大會喺呢度開幕,選蔣介石、李宗仁做正、副總統;5月20號,國民政府改口叫中華民國政府,結束國民政府及訓政時期[75]

之後國共內戰當中,國民黨輸咗畀共產黨,民國政府過咗去臺灣,喺1949年4月23號,解放軍攻佔南京,成為家下嘅南京市[75],南京嘅實權入咗當年10月1號中共建立嘅中華人民共和國度。由於南京過去係民國政府中央所在,所以地位一落千丈。喺共和國初期,南京尚且係13個直轄市之一[註 25];1952年9月蘇南、蘇北兩個行政區合併爲江蘇省,當年11月15號南京市就由直轄市改爲江蘇嘅省轄市,1953年1月1號成爲江蘇省城[1],之後由於中國大陸各種政治運動,經濟凋敝,南京由民國時嘅六大都會衰落成地方城市,唔似舊時咁輝煌,目前南京屬中國大陸二流城市[82]

1988年到1997年間嘅南京市旗,而家已經唔用。

毛澤東死咗後,到鄧小平執政,佢搞嘅改革開放惠及南京,農業、工業等經濟起錨,於是南京重新逐步發展。1994年2月南京昇爲副省級市,有返類似省級嘅地位。攞到類省級地位後,南京城變化好大,到2003年,40 km²嘅古城區,得5 km²未喐過[83],而古城區外亦起咗大片嘅新城區。而家南京開始發展成國際都會,據GaWC研究分類,2010年時南京屬自、足嘅城市[84],到2012年就發展成自足到唔使依賴其他世界城市,有潛質發展成跨國影響嘅都會[85]

中華民國方面,南京嘅地位比較尷尬。因爲行憲,有寫明南京做國都嘅《訓政時期約法》廢除,而憲法當中又無條文講明法定首都,喺中央政府遷臺後,由於反攻大陸嘅政策,直到1990年代廢除《動員戡亂時期臨時條款》前,南京一直當做中華民國嘅名義首都,而臺北只係臨時首都、戰時首都[11]。1991年後,隨住中華民國喺臺灣嘅本土化,南京嘅名義首都地位取消,臺北默認爲首都,準確講法做「中央政府所在地」[11]

不過情況亦有反覆未明,2013年12月,中華民國教育部發函話,「中華民國首都喺南京,中央政府所在地係臺北」,要啲學校睇住呢條原則來做[86],結果畀人笑,民眾唔多接受,學者批佢係流亡心態,結果啲官出來道歉[86]。由於首都議題比較尷尬,現時臺灣啲學校講到呢味會避開,啲書以「中央政府喺臺北」做基調[86]

經濟[編輯]

南京天際綫中最高嘅樓:紫峰大廈
閱江樓上北望長江沿岸市區

南京位於中國沿海開放帶同長江流域開發帶嘅交滙處,係長三角嘅西部門戶,有承東啟西嘅作用。而家南京係中國緊要嘅綜合性工業基地,支柱產業有電子信息、石油化工、汽車製造、鋼鐵業,同時新興起軟件及服務外包、智能電網、風電光伏、軌道交通,形成服務業同製造業協調嘅產業格局[9]。據中國總部經濟研究中心發佈嘅《內地35個主要城市總部經濟發展能力排行榜(2010)》中,南京排第六,喺北京、上海、廣州、深圳、杭州之後[87]

2014年南京市域GDP達8820.75億人民幣[7],按可比價格計,比上年增長10.1%[7],其中[7]

  • 第一產業增加223.96億元人民幣,同比增長3.5%
  • 第二產業增加3671.45億元人民幣,同比增長8.8%;其中全部工業增加3165.78億元人民幣,同比增長9.3%
  • 第三產業增加4925.34億元人民幣,同比增長11.5%
  • 三次產業結構比:2.5:41.7:55.8
  • 按常住人口計,全市人均GDP達107545億元人民幣,按年均滙率合17507美金

2014年南京全年出入口總額達572.21億美金,同比增長2.6%,其中出口總額326.28億美金,增長1.1%,入口總額245.93億美金,增長4.7%[7]。出口嘅主要市場係歐盟、美國、東盟,呢三個市場嘅出口額夾埋佔全部出口額嘅51.7%;而出口商品中最多係機電產品,其次係高新技術產品[7]

投資方面,2014年嘅固定資產投資達5460.03億元人民幣,同比增長3.7%,其中國有及國有控股投資達2195.60億元人民幣,同比增長6%,外資注資453.82億元人民幣,同比增長10.1%[7]

農業[編輯]

南京地方屬亞熱帶季風氣候,雨熱同季,降水充沛,啱農業發展。2014年南京嘅農業產值達384.62億元人民幣,同比增長9.2%,其中種植業218.5億元人民幣,同比增長11.8%,林業產值19.84億元人民幣,同比增長10.6%,牧業產值48.23億元人民幣,同比下降0.7%,漁業產值79.86億元人民幣,同比增長8.2%,農業相關嘅服務業產值18.19億元人民幣,同比增長9.7%[7]

2014年尾時,高標準農田面積208.31萬畝,而糧食種植面積235.67萬畝,比上年減少6.36萬畝,油料種植面積69.57萬畝,比上年增加2.6萬畝,蔬菜播種面積130.28萬畝,比上年減少1.2萬畝[7]

工業[編輯]

南京嘅支柱工業有汽車、電子、鋼鐵、石油化工[9],保持住1960年代嘅特點。行業上有36個大類,生產出261種主要工業品。規模以上工業當中,工業總產值達13239.73億元人民幣,同比增長5.3%,其中有95.8%嘅產值產生自21個過百億產值嘅行業,同時有70.2%嘅產值來自168家過十億產值嘅企業[7]

工業結構上,43.4%嘅產值來自高新技術產業,44.5%嘅產值來自六大製造業:汽車、電子、醫藥、交通設備、電氣產品、儀器儀錶,同比增長1.5%;石化、建材、冶金、電力等高耗能行業佔產值嘅33.9%,同比下降1.7%[7]。而家南京嘅經濟方針係將啲產業轉變爲資本密集型、技術密集型嘅產業,同時起咗四個國家級開發區、五個省級開發區吸引投資。雖然努力吸引外資,不過重係落後過週邊嘅蘇州、無錫、杭州,呢啲城市喺吸引外資、本土創新方面更掂,而南京經濟以國企爲主。目前南京嘅發展規劃中,工業目標係以先進製造業爲基礎,高新技術產業爲重點[88]

服務業[編輯]

南京目前三次產業中,增加值最高嘅係第三產業,佢嘅增速分別快過本地生產總值、第二產業增速1.4個、2.7個百分點,2014年第三產業比重比上年昇1.2個百分點。當中重頭嘅有金融業、資訊業(資訊傳輸、電腦服務、軟件業)、文化產業。呢三行產業分別佔GDP嘅10.9%、5.8%、5.84%,比往年提昇百分點數分別有0.3、1.5、0.23[7]。目前南京嘅規劃係要將服務業發展成經濟主導行業[88]

另外南京亦發展緊旅遊業、物流業。其中2014年旅遊業總收入1520.83億元人民幣,同比增長11.8%;遊客量9475.93萬人次,同比增長8.6%。當中中國大陸遊客9419.31萬人次,大陸境外遊客56.62萬人次,分別增長8.6%、9.2%。而2014年貨運總量31879.93萬噸,同比增長2.1%,貨物週轉量5537.41億噸/公里[7]

特產[編輯]

南京有呢啲產品認證爲中國地理標誌產品[89]

  • 雲錦:雲錦舊時係皇家貢品,因爲靚到似天上雲霞而得名。同四川蜀錦、蘇州宋錦並列爲中國三大名錦。清代時設江寧織造署來提供雲錦去皇室。
  • 固城湖蟹:喺南京高淳嘅固城湖度出產。
  • 雨花茶:南京特產茶,以城南雨花臺得名。有選爲中國十大名茶之一。

另外南京呢啲特產亦好有名:雨花石鹽水鴨

政區[編輯]

家下南京市轄11個

版圖 政區
南京市區
玄武區
秦淮區
建鄴區
鼓樓區
雨花臺區
棲霞區
南京郊區
江寧區
浦口區
六合區
溧水區
高淳區

南京設過呢啲政區:白下區下關區江浦縣、大廠區

轄下變動年表[編輯]

南京市(直轄市,1949年到1953年)[編輯]

  • 1949年10月1號,成立中華人民共和國直轄市南京市,按數字設從一區到十三區外加郊區(14區)
  • 1950年1月,上個月南京所得嘅縣全數退返原先嘅地區(14區)
    • 6月,南京重新劃市區,又按數字設從一區到十一區外加中山陵園區大廠鎮(12區1鎮)
  • 1953年6月,八區畀咗部分去江蘇省揚州專區六合;九區、十區、十一區各有一部分去咗江蘇省鎮江專區江寧;十一區淨落部分同鎮江專區嘅江寧、句容兩縣各出嘅部分併到九區;六合畀咗部分去大廠鎮(11區1鎮)
    • 10月,九區退咗部分去句容(11區1鎮)
    • 12月17號,南京由直轄市降爲江蘇嘅省轄市。

南京市(省轄市,1953年至1966年)[編輯]

  • 1955年11月15號,一區改名玄武區、二區改名白下區、三區改名秦淮區、四區改名建鄴區、五區改名鼓樓區、六區改名下關區、七區改名浦口區、八區改名燕子磯區、九區改名棲霞區、十區改名雨花臺區(11區1鎮)
    • 12月13號,鎮江專區嘅江寧畀咗部分分畀雨花臺、中山陵園、棲霞;句容畀咗部分去棲霞;揚州專區嘅六合畀咗部分分畀燕子磯、大廠鎮、浦口;江浦畀咗部分去浦口(11區1鎮)
  • 1956年2月22號,江寧再畀部分去雨花臺;六合再畀部分去大廠鎮;浦口退咗部分去江浦(11區1鎮)
    • 5月21號,江寧畀咗部分去秦淮(11區1鎮)
  • 1957年5月16號,句容再畀部分去棲霞(11區1鎮)
  • 1958年7月6號,揚州專區嘅六合、江浦同埋鎮江專區嘅江寧再次劃歸南京(11區1鎮3縣)
    • 9月20號,江寧畀咗部分去安徽省蕪湖專區嘅馬鞍山市(11區1鎮3縣)
    • 11月5號,大廠鎮併入浦口;雨花臺、中山陵園以及燕子磯、棲霞兩區各出部分合併爲郊區;燕子磯同棲霞淨低部分併入下關(8區3縣)
  • 1960年4月21號,六合畀咗部分去浦口(8區3縣)
    • 9月19號,郊區解散,分入玄武、白下、秦淮、建鄴、鼓樓、下關(7區3縣)
  • 1962年7月,下關畀咗部分去鼓樓(7區3縣)
    • 9月25號,江寧退返鎮江專區、六合同江浦退返揚州專區(7區)
  • 1963年4月17號,下關、鼓樓各出部分恢復燕子磯;鼓樓、玄武各出部分恢復棲霞;玄武、白下、秦淮各出部分成立陵園區;秦淮、建鄴各出部分成立雨花區;鼓樓、建鄴各出部分成立江東區(12區)
    • 7月,陵園區改名中山陵園區、雨花區改名雨花臺區(12區)
  • 1965年5月19號,燕子磯併入棲霞;中山陵園、江東併入雨花臺;鼓樓畀咗部分去棲霞(9區)

南京市、六合專區(1966年到1970年)[編輯]

  • 1966年3月5號,劃揚州專區嘅六合縣、儀徵縣、江浦縣、金湖縣淮陰專區盱眙縣成立六合專區(專區5縣)
  • 1967年3月20號,玄武區改名爲要武區、白下區改名爲朝陽區、秦淮區改名爲遵義區、建鄴區改名爲紅衞區、鼓樓區改名爲延安區、下關區改名爲東方紅區(市9區)

南京市、六合地區(1970年到1971年)[編輯]

  • 1970年,六合專區改名爲六合地區(地區5縣)
    • 1月28號,要武、雨花臺、棲霞各出一部分成立鐘山特區(市10區)
  • 1971年2月22號,六合地區嘅江浦、鎮江地區嘅江寧畀咗南京(市10區2縣);另外六合地區解散,除咗江浦畀南京,盱眙、金湖畀咗淮陰地區,六合、儀徵畀咗揚州地區

南京市(1971年至今)[編輯]

  • 1973年9月,浦口分出部分成立大廠區(11區2縣)
    • 11月,要武區復名爲玄武區、朝陽區復名爲白下區、遵義區復名爲秦淮區、紅衞區復名爲建鄴區、延安區復名爲鼓樓區、東方紅區復名爲下關區(11區2縣)
  • 1975年10月4號,大廠重歸浦口、鐘山特區併入棲霞(9區2縣)
    • 11月8號,揚州地區嘅六合畀返南京(9區3縣)
  • 1979年4月20號,安徽省滁縣地區來安縣嘅一部分畀咗浦口(9區3縣)
  • 1980年4月26號,浦口同六合各出部分成立大廠區(10區3縣)
  • 1983年1月18號,鎮江地區嘅高淳縣溧水縣畀咗南京(10區5縣)
    • 10月8號,大廠畀咗部分去六合(10區5縣)
  • 1984年10月13號,棲霞畀咗部分分入玄武、下關;雨花臺畀咗部分分入白下、秦淮、建鄴;建鄴畀咗部分去秦淮;下關、建鄴各畀一部分去鼓樓;鼓樓另畀一部分去建鄴(10區5縣)
  • 1986年11月24號,江寧畀咗部分去棲霞(10區5縣)
  • 1995年4月,鼓樓畀咗部分去玄武;棲霞畀咗部分分入玄武、白下、下關;雨花臺畀咗部分分入白下、秦淮、建鄴、鼓樓、下關;江寧畀咗部分去雨花臺(10區5縣)
  • 2000年12月21號,江寧徹縣改區,做江寧區(11區4縣)
  • 2002年4月3號,江浦縣合併入浦口區;大廠區同六合縣合併爲六合區(11區2縣)
  • 2004年1月15號,雨花臺、鼓樓各有一部分去咗建鄴;建鄴畀咗部分分入白下、鼓樓(11區2縣)
  • 2007年,建鄴畀咗部分去鼓樓(11區2縣)
  • 2011年4月30號,江寧畀咗部分去棲霞(11區2縣)
  • 2013年1月,白下合併到秦淮;下關合併到鼓樓;溧水縣徹縣改區做溧水區;高淳縣徹縣改區做高淳區(11區)

上契交好嘅城[編輯]

國際[編輯]

國內[編輯]

合作[編輯]

[編輯]

  1. 呢啲民間笑談有好多版本,喺細節上各有出入。喺遞啲版本,就話秦始皇重喺度埋咗金來鎮壓王氣,於是呢度就嗌「金陵」,將「陵」字解爲「埋嘢嘅陵墓」。亦有種講法話,秦始皇並無埋金,而呃啲民眾去掘金掘崩啲山,從而壞曬啲風水。不過呢啲只係民間傳說,喺攷古上無證據佐證。見金陵 (搞清楚)內文。
  2. 「首爾」嘅韓文係서울,而呢個詞有對應嘅韓訓爲「京」,意思就係「首都」[17]。「首爾」係韓國對中文界提出要求譯嘅名,之前中文界一直稱呼做「漢城」。
  3. 呢個講法係據南朝訓詁學者顧野王喺《輿地志》嘅記載:「外江無事,於南浦置江寧」。據清人金鰻喺《金陵代徵錄》嘅記載,話太康二年,晉武帝南巡,當時黃河以北準備打仗,而武帝住喺臨江時,呢帶重好靜,於是武帝感嘆話「外江無事,寧靜若此」(有版本係「寧靜於此」),於是改臨江名做江寧。不過史書搵唔到晉武帝南巡嘅事,所以可能唔信得過[23]
  4. 中國氣候學嘅季節劃分標準:任意連續5日嘅日均温超過22℃係夏季,低過10℃係冬季,而喺10℃到22℃之間係春秋兩季[6]
  5. 5.0 5.1 5.2 周靈王元年(前571年)已經有棠邑,建置年月未知,喺南京轄區內最早記錄嘅政區。範圍係而家南京嘅江北部份[39]。秦代時(前221年)由楚國嘅棠邑改成棠邑縣,範圍係而家南京嘅六口、浦口[40]。漢代時初頭屬東陽郡,後來東陽改叫廣陵郡[41],前201年設棠邑侯,成爲侯國;前117年,廣陵度析置出臨淮郡,同年棠邑改名做堂邑,前116年堂邑由侯國恢復爲縣,屬臨淮[42]
  6. 瀨渚邑係吳王余祭喺瀨水邊起嘅,位於而家高淳城區以東15公里處,又叫做固城[43]
  7. 秦代嘅溧陽縣改自楚國嘅平陵,範圍係而家南京嘅溧水、高淳[40]
  8. 8.0 8.1 8.2 8.3 秣陵、丹陽、江乘、胡孰屬於侯國,初時屬韓信嘅楚國會稽郡[41],前201年分楚國立荊王劉賈,同時從會稽度析置出鄣郡,屬荊國,將呢四個縣劃入。前195年,荊國改成吳國,封劉濞爲吳王[42];之後吳國又改成江都國[41]。前109年,鄣郡改爲丹陽郡,又叫丹楊郡[41]
  9. 胡孰縣析置自江乘縣,之後改名做湖熟[41]
  10. 10.00 10.01 10.02 10.03 10.04 10.05 10.06 10.07 10.08 10.09 10.10 10.11 280年析置建業嘅西南部做臨江縣[44],281年臨江改名做江寧縣[45]。589年,隋朝攻陷建康,將六朝原先設嘅五個縣(建康、秣陵、江乘、湖熟、丹陽)併入到江寧,先屬蔣州,後屬丹陽郡[46]。唐朝時先屬丹陽郡,武德三年(620年)江寧縣改名做歸化縣,自此成個唐代,江寧縣名、歸屬不停變。同樣武德三年,從江寧度恢復返丹陽縣(626年後改屬宣州,之前隸屬變動同江寧一樣),然後再分笪地同溧水分出部份合成安業縣。由於由於所屬嘅揚州改名,先屬蔣州,後屬揚州。武德八年(625年),隨住蔣州復名揚州,揚州州治離開金陵去江都,呢年,安業併入歸化,然後改名做金陵縣。武德九年(626年),金陵改名做白下縣,同時由揚州改屬潤州。貞觀九年(635年),白下恢復名爲江寧,所屬潤州改名爲丹陽郡(由於丹陽郡治喺丹徒,自此丹陽又叫丹徒)。至德二年(757年),江寧由縣昇爲郡,直屬江南東道,遞年嘅乾元元年(758年),江寧郡改爲昇州,恢復江寧縣。上元二年(761年),江寧改名做上元縣。之後寶應元年(762年),廢昇州,改屬潤州,直到光啟三年(887年)恢復昇州[47]。五代十國時延續咗上元嘅建置,喺楊吳天祐十四年(917年),分上元西南19鄉、當塗北部2鄉,重置江寧縣,自此上元、江寧兩縣同治一城,延續近千年直至清末[48][49]
  11. 自漢代改名做堂邑後,一直屬臨淮郡或者廣陵郡。直到西晉元康七年(297年),改屬新設嘅堂邑郡[45]
  12. 12.0 12.1 12.2 12.3 12.4 320年割江乘西部(而家鼓樓一帶)設懷德縣,來僑置南渡人口,之後改名做費縣;之後僑置咗徐州,喺江乘縣僑置瑯琊郡,之下僑縣有臨沂、卽丘、陽都、開陽、費,江乘縣亦由丹陽改屬瑯琊。由於江北動亂,江北嘅堂邑郡、縣亦僑置到江南京城。另外蘭陵郡嘅蘭陵縣、合鄉縣、承縣,及東海郡、東平郡僑寄喺江乘,之後搬遞度[50];魏郡嘅肥鄉縣、元城縣,廣川郡嘅廣川縣,高陽郡嘅博陸縣、北新城縣,都僑寄喺京城,之後陸續合併。397年割堂邑喺江北嘅地方僑置秦郡,將陳留郡併入秦郡,有尉氏、秦、義成、臨涂[51]、平丘、外黃、雍丘、浚儀、昌國等僑縣[52]
  13. 13.0 13.1 13.2 13.3 13.4 劉宋時,因爲原本喺北方嘅郡縣僑置到南面,所以啲名前面加個「南」字,直至梁朝先去咗。(南)徐州之下嘅(南)瑯琊郡、(南)蘭陵郡、(南)東平郡、(南)東海郡以及下面啲縣隨住省併、遷治而變動頻繁;其中瑯琊郡到陳朝時(578年)改叫建興郡,改屬揚州,下面有江乘、同夏、湖熟呢三個本地縣,以及臨沂、烏山、建安呢三個僑縣,其中同夏係梁朝時(502年)將秣陵縣嘅同夏里昇爲縣,原本屬丹陽,陳朝時同夏、湖熟改屬建興。州、郡亦有變遷,梁朝時從揚州分出東揚州,令揚州得番個丹陽郡,同時丹陽郡析置出南丹陽郡,句容、溧陽分離出去。另外喺而家溧水、高淳一帶有晉末僑置嘅淮南郡,轄6縣,比如于湖、當塗、繁昌[50]。而江北一帶原本有秦郡,之後南齊將秦郡併入齊郡,屬(南)豫州、(南)袞州,呢個地方畀北魏佔領時改屬秦州,喺侯景之亂期間改爲西袞州[53]
  14. 開皇九年(589年),隋朝攻陷建康,毀城,喺石頭城設蔣州。大業三年(607年),州縣制變成郡縣制,蔣州改成丹陽郡[46]
  15. 15.0 15.1 15.2 隋開皇十一年(591年)新設溧水縣,先屬蔣州,後屬丹陽郡。唐武德三年(620年),從溧水析置返溧陽,又分出部份同江寧畀嘅部份合成安業縣,屬揚州。624年揚州改叫蔣州,625年復名揚州。626年,溧水改屬宣州。758年,改屬昇州。762年廢昇州而屬宣州。887年再屬昇州[47]。之後溧水嘅隸屬變更同上元、江寧一樣。元代時,曾經由縣改爲州、路、府,最後喺至元十四年(1277年)定爲州[54]
  16. 16.0 16.1 隋開皇四年(584年)將尉氏縣改名做六合縣,然後將堂邑、方山併入到六合,先屬方州,後屬江都郡[46]。喺唐代時,六合縣域無變,先後屬江都郡、方州、揚州、廣陵郡[47]。喺南唐時,昇元元年到保大六年(937年~948年)間屬江寧府,之後改屬新設嘅雄州[48]。北宋時屬淮南路揚州,南宋時屬淮南路真州[55]
  17. 17.0 17.1 17.2 唐朝初頭重係延續隋朝建置,係丹陽郡治。武德三年(620年),丹陽郡改成揚州。武德七年(624年),平定咗喺呢度建都嘅輔公祏,改揚州爲蔣州,同時將東南道行臺尚書省嘅治所設喺度。遞年(625年),蔣州恢復名爲揚州,同時揚州治所、大都督府由金陵搬去江都,從此「揚州」唔再指金陵而指江都,亦即今日嘅揚州城[47]。之後政區改革,郡、州變成第二級政區,隸屬於道;至德二年(757年),江寧縣昇爲郡,直屬江南東道,遞年嘅乾元元年(758年),江寧郡改爲昇州。寶應元年(762年)廢除昇州,轄縣劃分潤州、宣州。直到光啟三年(887年)先恢復返昇州。
  18. 18.0 18.1 18.2 18.3 入五代十國後,楊吳延續唐代嘅昇州建置,喺楊吳武義二年(920年),昇州改爲金陵府,係南京地區第一次建置爲府[48]。楊吳天祚二年(936年),金陵成爲楊吳西都。遞年(937年),改名爲江寧府。亦係937當年,南唐取代楊吳,定都江寧府[48]。楊吳時州/府轄5縣,其中上元縣、江寧縣、溧水縣位於而家南京轄區內;江寧喺917年從上元度重置,直到清末同上元同城分治[48][49]。入南唐後增至12縣,其中六合縣喺937年~948年期間屬江寧府[49]
  19. 19.0 19.1 19.2 19.3 宋開寶八年(975年),宋軍攻滅南唐,將江寧府恢復爲昇州,屬江南東路。天禧二年(1018年),昇州又改爲江寧府,同時封皇子趙禎(之後嘅宋仁宗)做昇王,江寧作爲佢封嘅昇國嘅京府。建炎三年(1129年),江寧府改爲建康府,作爲南宋行都,同時係江南東路嘅治所。成個宋代,呢度都屬江南東路,都係轄5縣,其中位於而家南京轄區嘅有上元、江寧、溧水[55]。而六合縣喺北宋時屬淮南路揚州,南宋時屬淮南路真州[55]
  20. 20.0 20.1 20.2 20.3 至元十二年(1275年),元軍佔領建康,沿襲咗宋代嘅建制,亦係當年,喺建康設江南行中書省,成爲省城;之後御史臺設喺呢度,監管江浙、江西、湖廣三個行省[56]。至元十四年(1277年),建康府改爲建康路。天曆二年(1329年),由於呢度係元文宗嘅潛邸(龍興之地),建康路改名做集慶路。成個元代都係屬江南行省嘅江東道。轄縣方面,初頭延續宋代建制,爲5縣,位於而家南京轄區嘅有上元、江寧、溧水,成個元代呢三縣都喺轄區內。改成建康路後,變爲4縣1錄事司,其中在城錄事司負責治理建康城[54]。溧水喺元貞元年(1295年)昇爲州,而之前改過做州、府、路[54]
  21. 21.0 21.1 21.2 21.3 21.4 21.5 元末至正十六年(1356年),朱元璋攻佔集慶,改集慶路爲應天府,至正二十四年(1364年),朱元璋喺應天自稱爲吳王,無耐就開始修築府城、建立政權[56]。洪武元年(1368年)立國,八月發《立南北兩京詔》,金陵爲南京,大梁爲北京,自此呢度有「南京」名[19][18]。洪武十一年(1378年),廢除大梁北京地位,金陵直接昇爲京師。永樂十九年(1421年),遷都北京,結果又叫南京,或者南都、留都[18]。南直隸層面上,有十四府、四直隸州、十七屬州、九十七縣,應天係首府[18]。轄縣方面,初時延續元代嘅3縣2州,後來變爲8縣,呢8縣中位於而家南京轄區嘅有上元、江寧、溧水、江浦、六合、高淳。其中江浦係洪武九年(1376年)新設,六合係洪武二十二年(1389年)由揚州改屬應天,高淳係弘治四年(1491年)析置。江浦、六合位於江北,明朝起劃歸南京,奠定而家南京跨江而治嘅格局[18]
  22. 清順治二年(1645年),清軍攻佔應天,將應天府改名做江寧府。先屬江南省,再屬江蘇右布政使,乾隆二十五年起屬江寧布政使。之後宣統二年(1910年),喺江蘇省之下設江寧道,僅轄江寧府。期間江寧係兩江總督嘅駐地。轄縣方面,有7縣,屬今日南京轄區嘅有上元、江寧、溧水、高淳、江浦、六合[57]
  23. 23.0 23.1 23.2 咸豐三年(1853年),太平軍攻陷江寧,定爲太平天國京城,稱爲天京,改江寧府爲江寧郡,先係屬江南省,之後立即改屬新設嘅天京省。天京省大體上以清朝設嘅江寧、鎮江、常州、揚州四府(改曬做郡)爲轄地。而轄縣方面,延續咗清代嘅建置,不過由於避諱「上」字,上元改名做尚元;之後1858年時,以江浦爲省城,加埋六合組建天浦省。同治三年(1864年),清朝收復江寧,恢復本來嘅建置[58]
  24. 24.0 24.1 24.2 24.3 24.4 24.5 24.6 24.7 24.8 1912年1月1號,中華民國成立,定南京爲臨時政府首都,隨即將上元、江寧兩縣合併做南京府,自此上元縣消失,而原先江寧府嘅其他縣份直屬江蘇省。當年4月初,孫中山辭職唔做臨時大總統,即刻首都畀袁世凱搬到北京。民國二年(1913年),南京府撤換成江寧縣,變成江蘇省城。民國十六年(1927年)4月,國民政府定都南京,將江寧縣改爲南京市,自此南京建市,而《訓政時期約法》規定中華民國國都係南京。6月,改成特別市,初時定明代外城以內及浦口商埠做市區,之後直到民國三十四年(1945年)先劃定市界。1929年4月,南京改成首都特別市,1930年恢復爲南京市,係直轄市,當時劃咗8個城區、3個鄉區。日佔時期,1938年傀儡政權以南京做維新政府特別市,1940年汪精衛政權以還都南京嘅名義改南京爲特別直轄市。1945年光復後恢復原先建置[59]
  25. 25.0 25.1 1949年4月23號南京易幟,畀中共控制咗,由中國人民革命軍事委員會管轄;1949年10月1號成立咗中華人民共和國後,改爲直屬中央人民政府。1950年作爲直轄市由華東軍政委員會管轄。1952年12月改成江蘇嘅省轄市兼省城[60]。具體嘅轄下政區、歷年變動,請睇呢版嘅《轄下變動年表》一節。
  26. 朱棣之所以遷都,有三個原因:一係朱棣封做燕王,北平係佢嘅勢力本營,奪得帝位後將北平睇做佢嘅龍興之地,而南京大多係前朝遺民,對朱棣奪權有睇法,人心唔穩[71][72];二係南京紫禁城係填燕雀湖而起,所以之後地基下沉,搞到皇宮前高後低,由午門行入皇宮,地勢越行越低,風水講好唔老禮,所以朱元璋老時就已經諗住遷都,計劃係定都長安,只不過佢無心力,又想天下百姓休養生息,先無開聲[73];三係朱棣想北征蒙古,安定邊境,所以佢想以北京做基地來北伐,同時天子坐鎮北方來控制北疆民族,成爲天下共主[72][71]

[編輯]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 歷史沿革. 中國·南京. 2015年5月13號. 喺2015年5月31號搵到;. 
  2. 2.0 2.1 2.2 2.3 行政區劃. 中國·南京. 2014年6月3號. 喺2014年8月26號搵到;. 
  3. 3.0 3.1 3.2 3.3 3.4 3.5 3.6 3.7 我愛南京. 中國·南京. 2014年6月3號. 喺2014年8月26號搵到;. 
  4. 4.0 4.1 4.2 Demographia: World Urban Areas & Population Projections(人口統計學會:世界市區及人口計劃). Demographia World Urban Areas: 11th Annual Edition: 2015.01(人口統計學會世界市區:2015年1月第11期週年報告). Demographia(人口統計學會). 2015年1月. 喺2015年5月14號搵到;. 
  5. 5.0 5.1 南京市地方誌編纂委員會辦公室. 南京簡志. 江蘇南京: 江蘇古籍出版社出版. 1986年. 
  6. 6.00 6.01 6.02 6.03 6.04 6.05 6.06 6.07 6.08 6.09 6.10 6.11 6.12 6.13 6.14 6.15 6.16 自然地理. 中國·南京. 2015年5月13號. 喺2015年5月27號搵到;. 
  7. 7.00 7.01 7.02 7.03 7.04 7.05 7.06 7.07 7.08 7.09 7.10 7.11 7.12 7.13 7.14 7.15 7.16 7.17 7.18 7.19 7.20 7.21 南京市2014年國民經濟和社會發展統計公報. 南京市統計局. 中國·南京. 2015年4月2號. 喺2015年5月14號搵到;. 
  8. 8.0 8.1 民族概況. 中國·南京. 2014年6月3號. 喺2015年3月15號搵到;. 
  9. 9.0 9.1 9.2 9.3 9.4 9.5 9.6 9.7 9.8 總體概況. 中國·南京. 2015年5月13號. 喺2015年5月27號搵到;. 
  10. 2013年統計用區劃代碼:江蘇省. 中華人民共和國國家統計局. . 喺2015年5月14號搵到;. 
  11. 11.0 11.1 11.2 11.3 關於南京市在中華民國以及臺灣省的地位. 民初思韻網. 2013年7月10號. 喺2015年5月31號搵到;. 
  12. Largest City in the World – 3100 BCE to 1965 CE(世界最大嘅城市──前3100年到1965年). 南美以美大學(Southern Methodist University). 
  13. 2014福布斯中國大陸最佳商業城市. 福布斯中文網. . 喺2015年3月15號搵到;. 
  14. 南京市2013年國民經濟和社會發展統計公報. 南京市統計局. 中國·南京. 2014年4月1號. 喺2014年8月26號搵到;. 
  15. 不追求「千萬級」 南京「十三五」規劃人口壓縮百萬. 現代快報. 新華網江蘇頻道. 2013年5月23號. 喺2015年5月14號搵到;. 
  16. 出自《建康實錄》:「望氣者云:『五百年後金陵有天子氣。』因鑿鐘阜,斷金陵長隴以通流,至今呼爲秦淮。乃改金陵邑爲秣陵縣。」
  17. . 韓文維基辭典. . 喺2015年5月23號搵到;. 
  18. 18.0 18.1 18.2 18.3 18.4 . 南京地方誌. 2008年6月19號. 喺2015年6月8號搵到;. 
  19. 19.0 19.1 19.2 19.3 19.4 19.5 19.6 . 南京地方誌. 2008年6月23號. 喺2015年6月8號搵到;. 
  20. 南京歷代建都表. 南京地方誌. 2008年6月22號. 喺2015年6月2號搵到;. 
  21. 21.0 21.1 有成語「厲兵秣馬」。可睇南京歷史 秣陵. 南京旅遊網. . 喺2014年8月26號搵到;. 
  22. 歷史沿革. 建鄴區政府. 2014年8月16號. 喺2015年6月14號搵到;. 
  23. 23.0 23.1 「江寧」名字的形成. 江寧區圖書館. 2011年11月18號. 喺2015年6月14號搵到;. 
  24. 順人應天. 成語故事. . 喺2014年8月26號搵到;. 
  25. 歸化南京屈辱的名稱歷史. 通南京網. 2013年6月14號. 喺2015年6月14號搵到;. 
  26. 南朝宋時南京因何叫白下:劉宋在白石山下築城. 通南京網. 鳳凰網江蘇. 2014年4月15號. 喺2015年6月14號搵到;. 
  27. 上元縣. 南京日報. . 喺2015年6月14號搵到;. 
  28. 南京歷史上的昇州. 通南京網. 2013年6月24號. 喺2015年6月14號搵到;. 
  29. 南京歷史之元朝集慶. 通南京網. 2013年7月6號. 喺2015年6月14號搵到;. 
  30. 30.0 30.1 傳教士眼中的太平天國:從瑕疵基督徒到異端瘋子. 時代週報. 新浪軍事. 2014年1月13號. 喺2015年6月17號搵到;. 
  31. 31.0 31.1 吳健暉. 太平天國研究初探:洪秀全是否曾是基督徒?. 華人神學園地. . 喺2015年6月17號搵到;. 
  32. 32.0 32.1 第十一章 太平天國與基督教. 基督徒生活網. . 喺2015年6月17號搵到;. 
  33. 中國工業帶與經濟帶. 我要讀地理. . 喺2015年6月20號搵到;. 
  34. 中華人民共和國成立後中央直轄市及江蘇省省會. 南京市志(第一冊). 
  35. 35.0 35.1 35.2 35.3 自然地理. 南京地方志. 2008年6月23號. 喺2015年6月29號搵到;. 
  36. 36.0 36.1 36.2 36.3 第一節 金屬礦. . 喺2015年6月29號搵到;. 
  37. 37.0 37.1 37.2 37.3 中國氣象局 國家氣象信息中心. 中國氣象局. . 喺2015年2月13號搵到;. 
  38. 南京氣象資料. 中國氣象科學數據共享服務網. . 喺2013年5月搵到;. 
  39. 39.0 39.1 39.2 39.3 春秋戰國. 南京地方誌. 2008年6月7號. 喺2015年6月1號搵到;. 
  40. 40.0 40.1 40.2 . 南京地方誌. 2008年6月8號. 喺2015年6月1號搵到;. 
  41. 41.0 41.1 41.2 41.3 41.4 . 南京地方誌. 2008年6月9號. 喺2015年6月2號搵到;. 
  42. 42.0 42.1 42.2 秦漢. 南京地方誌. 2008年6月23號. 喺2015年6月2號搵到;. 
  43. 43.0 43.1 43.2 先秦. 南京地方誌. 2008年6月23號. 喺2015年6月2號搵到;. 
  44. 44.0 44.1 44.2 44.3 44.4 44.5 . 南京地方誌. 2008年6月23號. 喺2015年6月2號搵到;. 
  45. 45.0 45.1 45.2 西晉. 南京地方誌. 2008年6月11號. 喺2015年6月2號搵到;. 
  46. 46.0 46.1 46.2 46.3 . 南京地方誌. 2008年6月14號. 喺2015年6月5號搵到;. 
  47. 47.0 47.1 47.2 47.3 47.4 47.5 . 南京地方誌. 2008年6月15號. 喺2015年6月5號搵到;. 
  48. 48.0 48.1 48.2 48.3 48.4 五代·南唐. 南京地方誌. 2008年6月16號. 喺2015年6月6號搵到;. 
  49. 49.0 49.1 49.2 49.3 49.4 五代. 南京地方誌. 2008年6月23號. 喺2015年6月6號搵到;. 
  50. 50.0 50.1 第五節 僑置郡縣. . 喺2015年6月9號搵到;. 
  51. 臨涂係新立僑縣,無本治,即係無喺北中國嘅建置,係爲咗安置南渡人口就地設置嘅,設喺而家滁州一帶。「滁州」嘅名源自當地嘅滁河,喺隋朝正式定做「滁」前,當地係用「涂」作爲地名,「臨涂」嘅意思係臨近涂(滁)水,而且讀音係「林徐/lam4 ceoi4」,唔讀「林圖/lam4 tou4」。可查《康熙字典》:「涂」。臨涂僑縣資料來源:南京地方志:僑置郡縣
  52. 東晉. 南京地方誌. 2008年6月12號. 喺2015年6月3號搵到;. 
  53. 南朝·宋、齊、梁、陳. 南京地方誌. 2008年6月13號. 喺2015年6月3號搵到;. 
  54. 54.0 54.1 54.2 . 南京地方誌. 2008年6月18號. 喺2015年6月8號搵到;. 
  55. 55.0 55.1 55.2 . 南京地方誌. 2008年6月17號. 喺2015年6月7號搵到;. 
  56. 56.0 56.1 . 南京地方誌. 2008年6月23號. 喺2015年6月8號搵到;. 
  57. . 南京地方志. 2008年6月20號. 喺2015年6月9號搵到;. 
  58. 太平天國. 南京地方志. 2008年6月21號. 喺2015年6月9號搵到;. 
  59. 中華民國. 南京地方志. 2008年6月22號. 喺2015年6月11號搵到;. 
  60. 中華人民共和國. 南京地方志. 2008年6月23號. 喺2015年6月13號搵到;. 
  61. 《丹陽記》:「蠡城金陵,居長干古越城中」
  62. 《建康志》:「越城,一名范蠡城,案宮苑記,周元王四年越相范蠡所築……《圖經》雲,城周二里八十步(900餘米),在今秣陵縣長干里」。
  63. 63.0 63.1 三國·吳. 南京地方誌. 2008年6月10號. 喺2015年6月2號搵到;. 
  64. 【韻味】三國時的大城市. 東方網. 中國網. . 喺2015年6月17號搵到;. 
  65. 三國·吳. 南京地方誌. 2008年6月23號. 喺2015年6月2號搵到;. 
  66. 《金陵記》:「梁都之時,城中二十八萬戶,西至石頭,東至倪塘,南至石子岡,北過蔣山,東西南北各四十里。」以每戶4人計,人口都超過百萬。
  67. 南朝. 南京地方誌. 2008年6月23號. 喺2015年6月3號搵到;. 
  68. 68.0 68.1 68.2 隋唐. 南京地方誌. 2008年6月23號. 喺2015年6月5號搵到;. 
  69. 69.0 69.1 69.2 69.3 69.4 . 南京地方誌. 2008年6月23號. 喺2015年6月8號搵到;. 
  70. 70.0 70.1 Largest Cities Through History(歷史上最大嘅城市). Geography.about.com. 2013年11月14號. 喺2015年6月8號搵到; (英文). 
  71. 71.0 71.1 明永樂帝遷都北京:南京陰氣太重. 故事大全. 2012年12月9號. 喺2015年6月17號搵到;. 
  72. 72.0 72.1 十一、遷都北京──一個天下共主的偉業. 在綫讀書網. . 喺2015年4月23號搵到;. 
  73. 73.0 73.1 73.2 南京紫禁城將完整展示:消失的明故宮. 現代快報. 新浪收藏. 2015年3月12號. 喺2015年6月8號搵到;. 
  74. 74.0 74.1 74.2 74.3 74.4 74.5 74.6 74.7 . 南京地方志. 2008年6月23號. 喺2015年6月9號搵到;. 
  75. 75.00 75.01 75.02 75.03 75.04 75.05 75.06 75.07 75.08 75.09 75.10 75.11 75.12 中華民國. 南京地方志. 2008年6月23號. 喺2015年6月11號搵到;. 
  76. 第一節 五四運動在南京. . 喺2015年6月17號搵到;. 
  77. 約翰·拉貝(John Rabe). 拉貝日記. 
  78. 據日本時任外相廣田弘毅喺1938年1月17號發去日本駐美國大使館嘅文件。而家收喺華府嘅國家檔案館,喺1994年9月公報呢份文件。
  79. 79.0 79.1 大屠殺中的南京市民:在日寇屠刀下期盼中國軍隊. 《世界博覽》. 中華網. 2013年12月30號. 喺2015年6月17號搵到;. 
  80. 羅軍生,石美瑜與戰後南京對日軍戰犯的審判,黨史縱覽2006年第1期
  81. 烽火抗日大鋤奸. 中國僑網. 2006年10月23號. 喺2015年6月17號搵到;. 
  82. 網傳中國城市排行榜 南京列二線發達城市第2位. 新華江蘇. 2014年4月1號. 喺2015年6月18號搵到;. 
  83. 近百專家嘔心瀝血重續南京文脈重建現代古城. 江蘇新聞網. 2003年11月26號. 喺2015年6月14號搵到;. 
  84. The World According to GaWC 2010(2010年GaWC世界城市排名). 全球化及世界城市研究網絡(GaWC). 2011年9月14號. 喺2015年6月14號搵到;. 
  85. The World According to GaWC 2012(2012年GaWC世界城市排名). 全球化及世界城市研究網絡(GaWC). 2011年9月14號. 喺2015年6月14號搵到;. 
  86. 86.0 86.1 86.2 中華民國首都在南京 教育部瘋了. 中時電子報. 2013年12月4號. 喺2015年5月31號搵到;. 
  87. 總部經濟發展能力南京蟬聯全國第六. 南京日報. 網易新聞. 2011年1月4號. 喺2015年6月29號搵到;. 
  88. 88.0 88.1 發展規劃. 南京市人民政府. . 喺2015年7月4號搵到;. 
  89. 地理標誌產品. 江蘇省標準化成果展示平臺. . 喺2015年7月4號搵到;. 
  90. 哈爾濱南京締結友好城市. 新浪網. 2009年4月15號. 喺2014年8月26號搵到;. 

參考書[編輯]

  • 《南京史話》,蔣贊初,南京出版社,ISBN:7806141596
  • 《南京商貿史話》,后文洙,南京出版社,ISBN:7806144617

出面網頁[編輯]