袁世凱

出自維基百科,自由嘅百科全書
跳去導覽 跳去搵嘢
袁世凱

袁世凱1859年9月16號1916年6月6號),字慰亭,號容庵河南項城人,清朝末期至中華民國初期嘅軍事同政治人物。佢喺武昌起義之後做清政府嘅內閣總理大臣,迫清朝最後一位皇帝溥儀退位,之後袁世凱做咗中華民國臨時大總統同大總統。佢喺1915年12月宣佈喺1916年元旦登基做中華帝國皇帝,改元洪憲[1]蔡鍔等人喺1915年12月響雲南起兵反袁,之後貴州廣西都加入反袁行列,連本來係自己人嘅段祺瑞馮國璋都唔支持袁世凱做皇帝,袁世凱被迫喺1916年3月宣佈撤銷帝制,之後羞憤而死。

生平[編輯]

袁世凱喺1859年響河南省項城出世,後生嗰時曾經考過科舉,但係落第,之後佢參軍,曾經參與過壬午兵變甲午戰爭等等嘅戰事,獲得李鴻章賞識,之後主力負責訓練軍隊。

1900年袁世凱做山東巡撫李鴻章過身之後,袁世凱做直隸總督北洋大臣。佢主張廢除科舉、成立新軍隊、起學校、起工廠等等,而中國第一支警察隊伍,亦係喺袁世凱督導之下成立。1908年清德宗光緒帝慈禧太后過身,溥儀做咗皇帝,由醇親王攝政。醇親王一向同袁世凱有牙齒印,袁世凱先至返番河南個老家。

1911年辛亥革命爆發,袁世凱乘機上位,做埋內閣總理大臣。佢後來代表清朝孫中山講和,最後又係佢喺1912年迫溥儀退位。袁世凱無耐重做埋中華民國臨時大總統。1913年發生二次革命,好快就畀袁世凱平息咗。跟住佢迫國會選佢做正式大總統。之後佢解散咗國會,修改大總統選舉法,畀佢可以無限期連任大總統。但係佢仲想做埋皇帝,於是搞帝制運動,喺1915年12月宣佈喺1916年元旦登基做中華帝國皇帝,改元洪憲[1]佢做咗83日[2]皇帝後,喺1916年3月22號響各方壓力底下撤銷帝制。袁世凱仲想繼續做大總統,但係各方要求佢退位嘅壓力持續。袁世凱喺1916年6月6號病死,之後由副總統黎元洪繼任大總統。

評論[編輯]

傳統上中國人都對袁世凱冇咩好感,尤其係佢自立為皇帝,就係俾中國人閙得最犀利嘅地方。之但係佢主張廢除科舉、成立新軍隊、起學校、起工廠,重組織咗中國第一支警察隊,亦都反映出袁世凱好有見識,才幹超卓。

參考[編輯]

  1. 1.0 1.1 . p. 184. ISBN 9789888675258.
  2. . p. 186.

出面網頁[編輯]