李登輝

出自維基百科,自由嘅百科全書
跳去: 定向搵嘢
李登輝

李登輝1923年1月15號—)係台灣政治人物,前國民黨成員,亦係前中華民國總統,任期由1988年做到2000年,卸任總統後,脫離國民黨,並協助推動成立台灣團結聯盟(台聯),政治立場明顯主張台灣獨立

身世[編輯]

李登輝嘅出身,有啲人話佢係日本人,佢自己都話自己22歲之前係一個日本人。李登輝接受過日本嘅皇民教育,佢之後去過日本同美國留學,並獲得碩士同博士學位。正因為佢喺美國留學十幾年,先至避過國民黨嘅白色恐怖時代。佢返到台灣後唔知點解俾蔣經國睇中同欣賞,於是就勸佢加入國民黨。1971年佢加入國民黨之後,曾經做過行政院政務委員、台北市長、台灣省主席同副總統。

總統兼國民黨主席[編輯]

1988年1月13號,蔣經國死,李登輝根據憲法做咗中華民國總統。由於佢資歷淺,好多國民黨保守嘅元老,包括蔣介石老婆宋美齡唔妥佢,經過半年代理之後,李登輝總統最後喺當時既副秘書長宋楚瑜嘅支持下,終於喺7月7號正式做國民黨主席,緊黨政大權,繼承國民黨大統。其後佢踢走俞國華,搵國民黨秘書長李煥做行政院長,籍此離間班元老。

1990年2月11號,李登輝想連任總統,但班元老始終唔妥佢,想拉佢落馬,於是成為「非主流派」,企圖搵林洋港同蔣緯國做正副總統。最後喺其他大佬協調嘅情況下,李登輝最終成功當選第8任中華民國總統,佢之後搵軍人大佬、國防部長郝柏村做行政院長,迫佢交出軍權,因為咁,佢先至有機會全面掌握黨政軍大權,去全面推動民主改革。1996年台灣第一次總統大選,佢以54%得票當選,成為台灣第一位民選總統。

2000年總統大選時國民黨分裂,國民黨提名時任副總統嘅連戰參選,前台灣省長宋楚瑜退黨參選。選舉過程中,宋楚瑜嘅選情原本睇好,但係國民黨議員揭發興票案醜聞之後急轉直下,最終在野民進黨嘅陳水扁以39.3%嘅得票率當選總統,多過第二嘅宋楚瑜三十萬票。好多國民黨員認定李登輝幕後操作「棄連保扁」,以至之後李登輝交出黨主席同總統嘅寶座,2001年佢被國民黨開除黨籍,之後成立台灣團結聯盟(台聯),公開推動台獨。

卸任後[編輯]

2007年曾到日本參拜靖國神社。