中華民國臨時約法

《中華民國臨時約法》又叫做臨時約法或者民元約法，係喺1912年中華民國成立之後，由當時喺南京嘅臨時參議院所制定嘅憲制性文件，實際上係中華民國嘅第一部憲法。中華民國成立之後，孫中山做臨時大總統兩個月後，迫於當時嘅形勢，同意辭職加埋推舉袁世凱做第二任臨時大總統，但係為咗限制袁世凱嘅權力，所以就制定咗《中華民國臨時約法》。《中華民國臨時約法》喺1912年3月8號喺臨時參議院通過，並喺3月11號公布實施，正式取代《中華民國臨時政府組織大綱》，喺袁世凱就任之後生效。但係喺1914年5月1號畀大總統袁世凱公布嘅《中華民國約法》取代，之後再喺1916年6月29號畀大總統黎元洪恢復番。