南唐

南唐（粵拼：naam4 tong4），係五代十國其中一國，937年由李昪立國，975年由李煜亡國。

建國

南唐開國君主李昪係南吳將領徐溫嘅養子，嗰陣就叫徐知誥。徐溫喺927年過身之後，徐知誥掌握咗南吳嘅大權。

937年，徐知誥改名徐誥。同年十月，南吳末代君主楊溥讓位畀徐誥，南吳滅亡。徐誥登基做皇帝，國號「齊」，改年號做「昇元」。

之後徐誥改返姓李，改名做李昪，話自己係唐憲宗嘅後代，改國號做「唐」。

統治

943年，李昪過身，之後由佢個仔李璟繼位。

955年，後周派兵攻打南唐，958年南唐認輸，割讓長江以北嘅地方畀後周，兼且自己去除帝號。

961年，李璟過身，之後由李煜繼位。

滅亡

974年十月，宋朝派兵攻打南唐。975年十一月乙未（公曆976年1月1號），宋軍攻入金陵，李煜投降，南唐滅亡。