南北朝

  想搵第二啲意思，請睇南北朝 (搞清楚)。

工藝品

南北朝（420年—589年）係夾住東晉至到隋唐嘅一段多國分立時代，由420年劉宋立國開始，至到589年隋朝滅咗南陳為止。因為大體上都係南北對峙，所以叫南北朝。

南朝（420年—589年）包括宋、齊、梁、陳等四個朝代；北朝（439年—589年）就包含北魏、東魏、西魏、北齊同埋北周等五個朝代，而隋朝就唔計。

歷史

南朝

南朝主要係由一啲出身唔係咁好嘅寒門統治。話說喺東晉後期，一啲世家大族懶得去管理軍隊，所以成日安排啲寒門出任軍職。其中一個就係劉宋嘅君主劉裕。佢喺420年篡東晉帝位，做咗皇帝，國號「宋」。

雖然係咁，世家大族始終都好有影響力。而南朝整體上都係喺皇位爭奪之中度過，成日都互相動武。結果南朝越嚟越亂，最後到南陳嗰陣，就淨係靠條長江防守住。

北朝

北朝係由一班胡族人所統治嘅。大概喺439年，北方由鮮卑族拓跋氏統一咗。鮮卑族同埋一班胡族人，因為長期住喺黃河一帶，逐漸受到漢族文化影響。所以一開始就推行漢化政策，又建立均田制等等嘅稅收制度。

之但係因為唔同種族，北魏後期嘅朝政越嚟越差，最後分裂成東魏同埋西魏。後來兩個分別由北齊同北周取代。無耐北周消滅咗北齊，北方再度統一。

北朝經過咗百幾年，胡族同漢族之間開始有所融和。一啲胡人終於變得同漢族人無分別，而漢族人喺北朝亦都掌握咗軍事大權。到隋朝取代北周，發兵攻打南朝，再次一統中原。