三國

國家	蜀	魏	吳
首都	成都	洛陽	建業
君主	劉備 劉禪	曹丕 曹叡 曹芳 曹髦 曹奐	孫權 孫亮 孫休 孫皓
成立	221年 喺成都立國	220年 曹丕篡東漢	229年 喺建業立國
滅亡	263年 魏滅蜀之戰	265年 司馬炎篡曹魏	280年 晉滅吳之戰
226年時嘅三國      曹魏      蜀漢      東吳

三國（粵拼：saam1 gwok3；狹義：220年－280年，廣義：184年、190年或208年－280年或265年）係中國史上嘅一段時期，有魏、蜀、吳三個國。喺時間劃定上有狹廣之分，狹義上從220年魏國成立開始，到280年吳國滅亡、西晉統一中國爲止。不過好多中國史家、以及民間認爲三國開始嘅年份重要早啲，即係廣義上嘅三國，比如話東漢末年發生黃巾之亂（184年），或之後董卓要脅漢獻帝離開洛陽（190年），成個朝廷崩潰，天下豪雄相鬥，啲人就攞呢幾年做開始年。

東漢末年戰爭不斷，人口下降，經濟受損，所以三國好重視經濟發展。由於戰爭需求，各種技術都有好大發展。雖然三國時代好短，但係發展得好緊湊。三國係自中國有皇帝以來，第一次同時出咗3個皇帝嘅時期。

歷史

東漢末年，漢室因為黃巾之亂、北宮伯玉之亂、黑山軍起義、王芬謀廢漢靈帝、張舉張純叛亂、外戚宦官爭等一系列事件而動盪不安。中平元年（184年），以張角三兄弟為首嘅黃巾軍喺北方起事，史稱黃巾之亂。為咗鎮壓黃巾軍，朝廷一方面放權畀州牧同埋太守，一方面允許地主組織私人武裝嚟對抗黃巾軍。黃巾之亂平息之後，西涼嘅軍閥董卓入京亂政，引發咗董卓討伐戰，之後董卓遷都長安，地方長官演變成獨立嘅軍閥割據混戰。其中嘅曹操保護走返洛陽嘅漢獻帝，並且將首都搬到許昌，喺擊敗其他勢力之後，曹操喺建安五年（200年）嘅官渡之戰打敗割據河北嘅袁紹，大致掌控咗中國嘅北方。曹操以優勢嘅兵力南征荊州，但係喺建安十三年（208年）冬天嘅赤壁之戰俾孫權同埋劉備打敗，形成咗三國鼎立嘅雛型。建安二十五年（220年），曹操病逝，佢個仔曹丕迫漢獻帝禪位畀自己，改國號「魏」，史稱曹魏，至此東漢宣告滅亡，正式進入三國時期。隔年控制益州嘅劉備亦都以自己漢室宗親身份稱帝，國號仍然係「漢」，史稱蜀漢。劉備同孫權喺赤壁之戰後積極拓展自己嘅勢力，為咗爭奪荊州而多次征戰，最後劉備係夷陵之戰中戰敗，孫權攞到成個荊州南部。劉備病死之後，蜀漢丞相諸葛亮輔佐繼位嘅後主劉禪，並喺同年恢復同孫權嘅同盟。據有揚州、荊州同埋交州嘅孫權直到229年先至正式稱帝，國號「吳」，史稱孫吳。之後三國嘅局勢主要係蜀吳同盟對抗北方嘅曹魏，各國之間嘅疆域變化唔大。237年，遼東嘅軍閥公孫淵反叛曹魏，建國號「燕」，但好快就係魏滅燕之戰中滅亡。之後司馬氏逐漸控制咗曹魏嘅政權。263年，司馬昭為咗建立軍功嚟準備篡位而發動魏滅蜀之戰，蜀漢滅亡。兩年後司馬昭病死，佢個仔司馬炎逼魏元帝禪位畀自己，改國號「晉」，史稱西晉，曹魏滅亡。西晉最後喺280年發動晉滅吳之戰，消滅孫吳，統一中國。至此三國時期結束，進入晉朝。

疆域

三國政區地圖。藍色嘅部分係曹魏，綠色嘅部分係蜀漢，紅色嘅部分係孫吳，東北嘅遼東地區由遼東公孫氏實際控制。

參閱

• 《三國志》
• 《三國演義》
• 《資治通鑑.魏紀》
• 《英雄記》
• 《漢晉春秋》

睇埋

• 三國人物一覽