鄧芝

出自維基百科,自由嘅百科全書
跳去: 定向搵嘢
鄧芝
Deng Zhi 2016 Han Zhao Lie Miao.jpg
漢昭烈廟嘅鄧芝塑像
蜀漢 官員、將領
178年
251年
活躍時期 214年~251年
繼任 鄧良(陽武亭侯)
仔女 鄧良
遞啲名
伯苗

鄧芝粵拼dang6 zi1178年251年[註 1]),字伯苗baak3 miu4),義陽新野人(而家河南新野),係三國時期蜀漢嘅大臣、將領。佢阿媽係鄭天生,佢嘅仔係鄧良

身世[編輯]

鄧芝字伯苗,義陽郡新野縣人[註 2]

鄧芝係鄧禹嘅後裔,鄧禹係東漢嘅開國功臣,係漢光武帝嘅幫手,做官到司徒。

劉備時[編輯]

東漢末年時好亂,鄧芝爲咗避開中原一帶嘅混亂,轉去益州中文益州(包括而家四川)住。由於喺呢笪地唔順利,佢好憂自己嘅前途。佢於是搵着一個本地嘅睇相佬,個名叫張裕,來問佢自己嘅將來。張裕判定話,佢會做成大將軍,當佢70歲時會封侯。鄧芝感覺張裕啲話唔係好信得過。

鄧芝聽話巴西太守(屬益州)龐羲結納人才,於是去搵佢。佢畀龐羲收納,然後交付佢職務,喺郫縣主管看住糧食、官吏嘅財產(邸閣督)。

214年,劉備入佔西川,龐羲歸降,鄧芝同之前噉封做細官職。一日,劉備咁啱行過郫城,即係鄧芝做緊官嘅地方,傾咗一局偈後,發現到佢有才。於是鄧芝好快升級做郫縣縣令,然後升做廣漢太守。佢做嘢好勤敏,證明到佢本身嘅實事能力。鄧芝係清廉正直嘅人,名聲傳到好遠[1]

由於噉嘅原因,廣漢管治得好好,鄧芝得以召入蜀漢嘅權力中心成都度任職。

劉禪時[編輯]

外交家[編輯]

223年,喺之前劉備打吳國,喺夷陵輸得好慘,走返去白帝城後就喺呢年過世。太子劉禪繼位,即係後主,丞相諸葛亮做輔政。

嗰陣時蜀國啱輸咗場仗,北面有曹魏雄猛,東面係啱交戰過嘅東吳。雖然吳王孫權因爲驚曹魏威脅而主動同蜀國恢復和平,但之後又反面,煽動蜀國喺南中嘅將領反蜀,如雍闓、朱褒(呢班將領捉咗太守張裔交畀東吳),又封劉璋個仔劉闡做益州州牧,來刺激劉闡爭奪西川,因爲劉璋死喺劉備手上[2][3]。爲此諸葛亮對東吳方面好擔心[4]

鄧芝去搵諸葛亮,勸佢派人出使東吳來鞏固返外交關係。諸葛亮於是推舉佢去出使。鄧芝到吳國,不過吳主孫權特登唔接見佢。佢於是主動上表求見孫權,喺上表中佢話:「呢次我來亦係爲咗吳國,唔只係爲蜀國自己。」

孫權睇咗上表就召見鄧芝。見佢時,孫權講咗佢嘅憂慮,理由係蜀主劉禪嘅本性柔弱,令佢猶豫不決,而佢擔憂蜀國會弱下添,喺遞日會畀魏國滅咗。鄧芝立即說服孫權[5]

如果結合兩國嘅優點,我哋會變成如同脣齒咁緊密嘅聯邦,進可做天下之主,退亦可共北方造成鼎立之勢。如果大王走去降魏,噉魏國君主一定又再稱霸,上求大王親身去朝見,下求太子走去做人質。如果大王唔噉服從,魏國會攞呢個做依據來引軍討伐。到嗰陣時候,蜀國會就噉隨機應變而順流而下。噉嘅形勢,江南肯定唔再係大王嘅嘢嘑。

孫權畀佢說服,於是決定割斷同曹丕嘅關係,繼續同蜀交好,派張溫去出使蜀國來確定聯盟關係,同時畀張裔返蜀國。

出於呢次鄧芝去出使,喺南中反蜀嘅將領亦無咗來自東吳嘅外援。所以諸葛亮安心帶軍平南,無遇到好多阻礙。

之後鄧芝又去第二次出使東吳。孫權講下蜀吳二國嘅遠景,共同佔領、分割魏國嘅領土,然後共享太平。鄧芝坦率反駁呢樣,話到時兩國會繼續交戰,直到統一天下,所以唔會共同存在。孫權受觸動,好讚佢咁坦率。孫權寫信畀諸葛亮讚鄧芝,肯定咗話吳同蜀之間恢復返交好,都係鄧芝嘅功勞[6]

將軍[編輯]

228年,諸葛亮帶軍打魏國。鄧芝安排去共趙雲支勁軍作戰。佢得以封做揚武將軍、中監軍。贏咗幾場仗後,蜀軍輸咗,失守街亭,退返去漢中。趙雲同鄧芝亦畀魏軍喺箕谷打敗[7],亦都退返來,不過損失唔大。

234年,諸葛亮過世,鄧芝封做前軍師、前將軍、陽武亭侯,領袞州刺史。之後佢封做江州都督。呢度係近荊州嘅區域,接住東吳邊界。孫權同老友鄧芝經常聯絡,喺佢在職嘅時間內,佢收到好多孫權嘅禮物。

243年,鄧芝任職爲車騎將軍,呢個職位只低於大將軍同驃騎將軍,之後發畀佢假節。

248年,喺涪陵嘅人殺死都尉叛亂。鄧芝接令引軍去鎮壓,殺死叛亂將軍,令涪陵安定返。

251年,鄧芝過世,享年73歲[註 1]。喺爲將時,佢只欽服少數人,其中佢特別敬重姜維[8]

評價[編輯]

鄧芝將錢財睇得好淡,好盡心噉關愛士兵。喺超過二十年嘅爲將生涯,鄧芝同士兵同甘共苦,唔區隔上下身份。佢亦賞罰嚴明,喺公事上好決斷,唔爲自己本身中飽私囊,所以就算係佢嘅老婆仔女亦不免捱餓捱凍。佢死之時,喺屋企無咩奢侈財產[8]

鄧芝爲人直率,唔掩飾自己嘅感觸情緒,由於噉有好多士大夫對佢唔多恭敬和氣[8]

喺小說三國演義[編輯]

羅貫中嘅《三國演義》提及到鄧芝從諸葛亮度受命去出使東吳嘅事,喺夷陵之戰劉備過世後,佢要去吳國設立返孫劉聯盟。孫權嘅謀士張昭建議話喺宮殿前放一隻大鑊,入面倒滿滾油。喺鄧芝入去面見時,佢對孫權表示唔尊敬嘅態度,孫權威脅話會掟佢入滾油鑊。不過,憑住本身嘅智謀,佢保全性命同時成功說服孫權再立同蜀漢嘅聯盟。

擔任過嘅職務同爵位[編輯]

  • 郫城府邸閣督
  • 郫令
  • 廣漢太守
  • 尚書
  • 中監軍
  • 揚武將軍
  • 前軍師
  • 前將軍
  • 袞州刺史
  • 陽武亭侯
  • 江州都督
  • 車騎將軍

睇埋[編輯]

[編輯]

  1. 1.0 1.1 據《三國志·蜀書·宗預傳》,延熙十年(247年),鄧芝嘥宗預,話佢六十歲咁老重帶兵,宗預答話:「你七十歲(虛歲)都帶兵啦,我六十歲(虛歲)點解就唔帶得兵啊?」由此可知,鄧芝喺247年時虛歲七十歲,所以得出佢嘅出世年係178年。
  2. 而家中國河南新野嘅西南面。

[編輯]

  1. 據《中華古代將帥》第675頁。
  2. 據《孔明諸葛亮大傳》第447頁。
  3. 據《細說三國》第252頁。
  4. 據《中華古代將帥》第676頁。
  5. 據《中華古代將帥》第677頁。
  6. 據《中華古代將帥》第678頁。
  7. 據《中華古代將帥》第651頁。
  8. 8.0 8.1 8.2 據《中華古代將帥》第679頁。

參攷資料[編輯]

  • 陳壽(著);裴松之(注). "蜀書:鄧張宗楊傳 — 鄧芝傳". 《三國志》. 
  • 陳壽(著);裴松之(注). "蜀書:鄧張宗楊傳 — 宗預傳". 《三國志》. 延熙十年,為屯騎校尉。時車騎將軍鄧芝自江州還,來朝,謂預曰:「禮,六十不服戎,而卿甫受兵,何也?」預答曰:「卿七十不還兵,我六十何為不受邪?」 
  • Trịnh Phúc Điền, Khả Vĩnh Quyết, Dương Hiệu Xuân(字未定,僅參攷:鄭福田、可永決、楊校春) (2006). "集一". Tướng soái cổ đại Trung Hoa(漢喃:將帥古代中華;中譯:中華古代將帥) (用越南文寫). 青年出版社(Nhà xuất bản Thanh niên家出版青年). 
  • Trần Văn Đức(字未定,僅參攷:陳文德) (2008). Khổng Minh Gia Cát Lượng đại truyện(孔明諸葛亮大傳) (用越南文寫). 文學出版社(Nhà xuất bản Văn học家出版文學). 
  • 黎東方 (2003). 《細說三國》. 上海人民出版社. 
  • 黎東方、王子今 (2002). 《細說秦漢》. 上海人民出版社. 
  • 易中天 (2006). 《品三國》. 上海文藝出版社.