曹操
曹操（注意個「操」字讀「燥」；粵拼：cou4 cou3[1]；155年—220年），字孟德（maang6 dak1），安徽亳州人，細個時嘅乳名叫阿暪（aa3 mun4），有一個名叫吉利（gat1 lei6），係東漢末年出名嘅軍事家、政治人、文學家，三國時代魏國嘅奠基人同埋主要締造者。
東漢末年黃巾之亂爆發，嗰時擔任騎都尉嘅曹操奉朝廷嘅命令，到潁川鎮壓。平定亂事後嘅佢升為丞相。後來漢靈帝駕崩，宮廷經過一連串嘅混亂後，由董卓專權，曹操睇唔起董卓嘅專橫而返鄉下，然後用晒啲家產賣咗兵馬，對付董卓。196年，曹操已經喺兗州鞏固成一個勢力，嗰陣漢獻帝遷出長安，進入安邑，曹操聽從軍師荀彧嘅建議，迎接獻帝。成功後，將都城由洛陽搬去許昌，實行佢嘅挾天子以令諸侯。後來曹操消滅咗呂布、袁術等中原大敵，喺中原建立一大勢力。200年，喺官渡同河北嘅袁紹展開官渡之戰，最後曹操贏咗，再喺7年內平定成個河北，嗰陣嘅曹操已成為最強嘅諸侯。208年，曹操南征，荊州嘅劉表病死，細仔劉琮投降，雖然曹操攞咗成個荊州，但係喺赤壁之戰輸畀孫權同埋劉備，令到佢統一天下嘅機會就咁冇咗。211年，遠征西涼，平定馬超同韓遂等軍閥，馬超逃往漢中，而韓遂俾部下殺害，自嗰陣曹操擁有中國嘅北部。213年自封魏公，216年自封魏王，最後喺220年死咗，死後被追尊為「魏武帝」。
曹操死之後葬喺高陵，2009年12月俾人搵到。
攷[編輯]
- ↑ 現時有多人受普通話影響讀成咗「曹粗/cou4 cou1」，但實質上正讀係「曹燥/cou4 cou3」。「操」嘅粵音有兩個，意思唔同，可查粵語審音配詞字庫。根據《康熙字典》解釋，操讀陰平時意思係「把持」，讀陰去時意思係「所守、持念、執持之志行」。而古人嘅名同字係互補嘅，字好多時用來解返個名。曹操字孟德，「孟」據《康熙字典》嘅解釋，可以同「德」夾埋解得通嘅意思有「勉進」、「大」，個字可以解爲「勉進德行」、「大嘅德行」（所謂「高言孟行」），根據個字嘅意思，「操」嘅意思明顯係「節操」「操守」「操行」，所以應該係讀cou3。另外，可以參攷其他話嘅讀法：喺越南話，「曹操」讀Tào Tháo，操嘅讀音爲銳聲，而唔係平聲，對應入粵語就係陰去聲（越南話嘅聲調系統同粵語類似，四聲八調，漢越音系統可以做到同粵語一一對應）；喺閩南話，曹操嘅操字亦讀陰去（白話字：chhò），來源可見呢度（海墘閩語論壇）（閩南話嘅音韻系統亦同粵語類似，部分字音可以做到對應轉換）。
| 前任： 董卓 |
漢朝丞相 208年—220年 |
繼任： 曹丕 |
 |
維基同享有多媒體嘅嘢： 曹操 |
