裴潛

出自維基百科,自由嘅百科全書
Jump to navigation Jump to search
裴潛
曹魏 官員、將領
勢力 劉表曹操曹丕曹叡曹芳
244年
活躍時期 208年~244年
繼任 裴秀(清陽亭侯)
老豆 裴茂
仔女 裴秀
遞啲名
文行
諡號 貞侯

裴潛粵拼pui4 cim4;?—244年),字文行man4 hang4),河東聞喜人(而家山西聞喜),係東漢末年、三國時人,原本跟劉表,後來入仕曹魏。佢出身自河東裴氏,係個世家大族,佢老豆係裴茂,有仔裴秀

生平[編輯]

裴潛雖然出身自士族,但佢阿媽身份低,令佢出身顯得微賤;佢細個時比較孬(jai5),所以佢老豆唔鍾意佢,於是佢努力發展仕途。

東漢末年天下大亂時,裴潛由中原避亂去荊州,當時嘅荊州牧劉表對佢以賓客之禮。當時一齊避難嘅密友有王粲司馬芝,裴潛同佢哋講:「劉表唔係嗰種稱到王嘅人,而家佢想偏安一處,離衰嗰日唔遠㗎喇。」於是裴潛向南行到長沙。

208年,曹操征服荊州,佢任命裴潛做丞相參軍事,出任三個縣嘅縣令,又再召入中央做倉曹屬。曹操問佢:「你之前同劉備一齊喺荊州,你認爲劉備份人點?」裴潛話:「若果佢喺中原,佢冇辦法平定到動亂,若果佢據險要自守,噉可以做得一方之主嘅。」

後來代郡大亂,曹操派佢做代郡太守。當時烏桓王同另外兩位大人各自稱單于,搞到郡度立立亂,前任太守都冇曬符。當時曹操想派精兵畀裴潛去鎮壓佢哋。裴潛話:「代郡人口多,好易驚動。啲單于咁亂都係佢哋個心慌嗟,而家派兵派得多,會嚇到佢哋反叛作亂,派兵派少咗又懾服唔到佢哋。所以唔好用兵逼佢哋,更適宜用計謀解決件事。」於是佢自己就噉入郡,啲單于幾驚喜,而裴潛用平靜嘅手法安撫佢哋。於是啲單于除帽叩頭,將之前搶劫到嘅女人、器械、財物還返曬來。之後裴潛誅殺郡度同單于勾結互通嘅官員,如郝溫郭端等數十人,震動咗北方邊境,令百姓歸心。裴潛喺代郡做官三年,之後召返中央做丞相理曹掾,當時曹操讚佢治理代郡嘅功勞。裴潛話:「我治理代郡,雖然對百姓寬仁,但對胡人好嚴。而家繼任嘅官肯定覺得我對佢哋太嚴,結果對啲胡人放鬆咗。佢哋啲胡人不溜驕縱慣,對佢哋放鬆肯定令佢哋對法制鬆懈,遞日出咗咩事嘈到公堂要講罰時,佢哋又肯定唔制。噉落去,代郡肯定又要亂㗎喇。」於是曹操後悔咁快召裴潛返來。結果數十日後,三位單于又作亂,唯有派曹彰做驍騎將軍去平亂。

之後,裴潛做地方官。先係做沛國相,然後做兗州刺史。219年,孫權攻打合肥,當時各個州都好緊張,曹操發號令要裴潛同豫州刺史呂貢召集出兵,當時裴潛以爲係尋常嘅召集令,於是收到令後慢慢整兵。溫恢見佢唔緊張,私底同佢講:「而家肯定係襄陽有急事先至召集你哋。之所以唔發緊急令,係唔想驚動其他將領。一兩日後你肯定收到密書催你出兵,張遼呢啲將領都會收到,張遼佢哋跟咗主公咁耐,梗知主公心意,到時你呢啲早收到詔令嘅人遲過張遼佢哋到,你肯定要受罰㗎!」裴潛聽咗信佢嘅話,立即整理輜重,輕裝出發,之後嘅事真係同溫恢諗嘅一樣,於是裴潛走甩咗處罰。之後曹操去到摩陂,見裴潛嘅軍隊整理得咁齊整,讚佢然後畀賞賜。

220年,曹丕繼位,之後又稱帝,召裴潛入朝廷做散騎常侍,之後外放爲魏郡、潁川兩地嘅典農中郎將,在任時佢提議允許典農中郎將亦有同郡太守一樣嘅人才推舉權限,提議採納後自此開通咗農政官員嘅晉升通道。之後裴潛改任荊州刺史,賜爵位關內侯。

227年,曹叡繼位,於是裴潛召去中央做尚書,然後又外放做河南尹,之後轉做太尉軍師、大司農,封爵做清陽亭侯,食邑二百戶。然後又召去朝廷做尚書令,期間佢改革人事制度,但之後因爲老豆過身所以辭官,畀朝廷拜做光祿大夫。

正始五年(244年)裴潛過世,朝廷追贈佢做太常,頒諡號貞侯,由佢嘅仔裴秀繼嗣爵位。臨死時佢落遺囑話要薄葬,於是裴潛嘅墓度得一張凳、幾件瓦器,就冇其他陪葬嘞。

喺《三國志》陳壽評話:「恆常間持平常心,係做得國家頂樑柱嘅人才」(裴潛平恆貞幹,皆一世之美士也)。喺《魏略》裴潛嘅傳記同徐福嚴幹李義張既游楚梁習趙儼韓宣黃朗呢九個人嘅傳記併埋一齊,話佢哋都係有難能可貴嘅質素嘅人。值得一提嘅係,爲《三國志》做註釋嘅裴松之裴徽嘅六世孫,所以裴松之喺註解裴潛傳時落咗好多筆墨介紹佢哋河東裴氏一族好多人。

參攷資料[編輯]

  • 陳壽(著);裴松之(注). "魏書 — 和常楊杜趙裴傳:裴潛傳". 《三國志》. 
  • 陳壽(著);裴松之(注). "魏書 — 劉司馬梁張溫賈傳:溫恢傳". 《三國志》. 建安二十四年,孫權攻合肥,是時諸州皆屯戍。……詔書召潛及豫州刺史呂貢等,潛等緩之。恢密語潛曰:「此必襄陽之急欲赴之也。所以不為急會者,不欲驚動遠眾。一二日必有密書促卿進道,張遼等又將被召。遼等素知王意,後召前至,卿受其責矣!」潛受其言,置輜重,更為輕裝速發,果被促令。遼等尋各見召,如恢所策。