裴秀

裴秀
裴秀
字	季彥
出世	224年
死	271年
國籍	晉朝
籍貫	河東聞喜
職業	官員、地圖學者
仔女	裴頠; 裴浚
父母	裴潛（父）

裴秀（粵拼：pui4 sau3；224年—271年），字季彥（gwai3 jin6），河東聞喜人（而家山西聞喜），係西晉嘅官員、地圖學者，出身自河東裴氏，佢阿爺係東漢官員裴茂，佢老豆係曹魏官員裴潛。

生平

裴秀自細好學，有風操，八歲就識寫文章。佢阿叔裴徽有盛名，所以賓客好多。裴秀十幾歲時，但凡拜訪裴徽嘅人，都會順便探埋裴秀。不過裴秀生母地位微賤，大婆待薄佢哋母子，但係由於佢嘅仔嘅名聲，啲賓客都對佢生母幾客氣，大婆知咗後再都唔蝦佢哋。於是時人話裴家後繼嘅領袖有裴秀。

渡遼將軍毋丘儉將裴秀推薦畀大將軍曹爽，於是曹爽闢拜佢做掾屬，畀佢繼承老豆爵位清陽亭侯。244年老豆過身，裴秀服喪後同兄弟均分家產。248年改任黃門侍郎。之後雖然曹爽畀朝廷誅殺，但裴秀未受牽連。無耐裴秀做廷尉正，喺司馬昭做安東將軍、衞將軍同吳、蜀作戰時，裴秀擔任司馬，佢提嘅意見多數都採納咗。之後改任散騎常侍。

257年諸葛誕起兵反司馬昭，裴秀同陳泰、鍾會一齊做參謀，參加司馬昭嘅討伐軍。平定諸葛誕後，裴秀轉任尚書，封爲魯陽鄉侯。260年，曹髦反抗司馬昭被殺，裴秀出計立曹奐爲帝，於是由鄉侯升爲縣侯，改任尚書僕射。咸熙初年，荀顗負責定禮儀，賈充負責定法律，裴秀負責改官制。裴秀提出恢復周代嘅五等爵制度，於是好多支持司馬氏嘅人都封咗爵，共計六百幾人。於是裴秀封爲濟川侯，以高苑縣濟川墟作爲佢嘅侯國。

司馬昭原本未諗定繼承人，當時有意想封司馬攸，司馬炎驚無份，想求助裴秀，於是裴秀同司馬昭推薦司馬炎，就噉樣令司馬炎定爲繼承人。司馬炎上位後，拜裴秀做尚書令、右光祿大夫，同王沈、賈充一齊做開府。司馬炎稱帝建立晉朝後，裴秀封爲左光祿大夫、鉅鹿郡公，食邑三千戶。

郝詡曾經同朋友寫信讚裴秀。後來裴秀畀有司、李憙等起訴，話劉尚爲裴秀侵佔官家稻田，要治裴秀罪，但朝廷落詔話裴秀咁大功勞，唔應該因爲少少瑕疵而掩蓋佢嘅功勞，所以只係懲罰咗劉尚嗟。

268年，朝廷落詔加封裴秀做司空。司空呢個位幾高下，而且主管土木、田地，所以裴秀唔使似喺尚書令時咁忙，可以睇到各地嘅地理狀況同地理資料。加埋裴秀天生聰明，又隨軍做過參謀，關注過各地嘅山川形勢，佢見到《尚書・禹貢》記嘅嘢咁耐，啲嘢都變曬，有啲則係誤傳，所以作咗十八篇嘅《禹貢地域圖》，並且喺序中提出「製圖六體」。

裴秀創制啲規章制度，晉朝朝廷多數沿用佢創制嘅嘢，喺當時稱爲「當世名公」。泰始七年（271年），佢食寒食散，食咗呢種藥係要飲熱酒，但佢誤服凍酒，結果中毒身亡，享壽四十八歲虛歲。朝廷出詔書哀悼佢，並且頒佢諡號做元公（jyun4 gung1）。

咸寧初年，裴秀同石苞等並列爲王公，配食宗廟。裴秀有兩個仔：裴浚、裴頠，裴浚繼承爵位，做官到散騎常侍，早死；裴頠則又係出名嘅人。

地圖學

裴秀嘅《禹貢地域圖》係中國記錄最早嘅地圖集。呢份地圖集嘅繪畫時間大概喺泰始四年到七年間（268年～271年）。畫成之後就收埋咗唔畀人知。唐初官修目錄《隋書・經籍志》已經無記載呢份地圖集，隋代建築家宇文愷話：「裴秀《輿地》以二寸為千里，臣之此圖，用一分為尺」，可能佢見過圖集嘅殘卷，不過而家已經完全失傳。裴秀重將當時舊嘅天下大圖縮繪成1：1800000嘅方丈圖，呢個亦失傳咗。

而家流傳落嘅只有《禹貢地域圖》嘅序文，其中佢提出製圖六體，即係分率，准望，道里，高下，方邪，迂直。而家對前三樣睇法一致，分率即係比例尺，准望即係標嘅方向，道里即係兩點嘅距離。至於高下、方邪、迂直，有比較多解釋，一般認爲意思係高取下、方取斜、彎取直，即係測量時由於地形高低、道路彎曲，只能求到曲線距離，要將佢計成直線距離先再標喺圖度。

喺裴秀之前，中國喺繪製地圖方面嘅經驗幾成熟下，但無理論化。裴秀提出製圖六體後，就畀中國古時嘅繪圖師遵守，比如唐代賈耽、宋代沈括都以製圖六體做規範。喺西洋地圖投影法傳入中國前，製圖六體一直係中國古代地圖嘅繪製準則，對中國嘅地圖學發展影響極大。

而家中國有個獎項叫做裴秀獎，獎畀優秀嘅地圖作品。

參攷資料

房玄齡。〈列傳第五：裴秀傳〉. 《《晉書》》。
陳壽。〈魏書：和常楊杜趙裴傳 — 裴潛傳〉. 《《三國志》》。｢子秀嗣。……秀，咸熙中為尚書僕射。〈文章敘錄曰：秀字季彥。弘通博濟，八歲能屬文，遂知名。大將軍曹爽辟。喪父服終，推財與兄弟。年二十五，遷黃門侍郎。爽誅，以故吏免。遷衛國相，累遷散騎常侍、尚書僕射令、光祿大夫。咸熙中，晉文王始建五等，命秀典為制度，封廣川侯。晉室受禪，進左光祿大夫，改封鉅鹿公，遷司空。著易及樂論，又畫地域圖十八篇，傳行於世。盟會圖及典治官制皆未成。年四十八，泰始七年薨，諡元公，配食宗廟。……〉｣
歐陽詢。〈卷六・地〉. 《《藝文類聚》》。
〈宇文愷傳〉. 《《隋書》》。
〈裴秀傳〉. 《《中國古代科學家傳記》》。