甄夫人

出自維基百科,自由嘅百科全書
Jump to navigation Jump to search
甄氏
文昭皇后(追尊)
Lady Zhen Qing dynasty portrait.jpg
清代嘅甄夫人畫像
私人明細
夫君 袁熙
曹丕
仔女 曹叡
東鄉公主
尊位 夫人(生前)
皇后(身後)
諡號
甄逸
張氏
出世 光和五年十二月丁酉
西元183年1月26號
過世 黃初二年六月丁卯
西元221年8月4號(38歲)
鄴城
安葬 黃初二年葬鄴城
太和四年十二月改葬朝陽陵

朝陽陵

甄夫人粵拼jan1 fu1 jan4183年1月26號221年8月4號[註 1]),名唔知[註 2],中山無極人(而家河北無極),原本係袁熙嘅妻妾,後來做咗曹丕嘅正室夫人,諡。由於佢嘅夫君係曹魏第一個皇帝魏文帝曹丕,所以佢嘅諡號係同夫君嘅諡合爲文昭皇后man4 ciu1 wong4 hau6)。佢係魏明帝曹叡嘅母后,而魏明帝係呢個朝代嘅第二任君主。

喺佢在生當時,佢未曾得以封做皇后,只係得位甄夫人。名號「文昭皇后」係由曹叡喺做皇帝時追尊佢母后而得來。

甄夫人本身有幾多傳說而出名,喺民間流傳話甄氏係個絕色美人,令曹操同佢兩個仔曹丕同曹植都動心。《世說新語》更加話曹操打鄴城就係爲咗甄氏[1]

幼年時[編輯]

甄夫人係甄逸個女,係中山人(而家河北)。甄逸係鎮守上蔡嘅官,但喺185年時過身,嗰陣時甄夫人先兩歲[註 3]。雖然佢老豆過身,但甄夫人嘅家庭重幾闊手。東漢末年時,各軍閥混戰,佢同屋企人參加咗對當地居民嘅饑荒救濟。甄夫人父母有三個仔同五個女,其中甄夫人係啲女中最細嘅。

有次屋企帶班仔女去搵個名叫劉良嘅睇相佬,佢指住甄夫人話:「遞日呢個女仔會變成尊貴嘅人。」相比各個兄弟家姐,甄夫人明顯係個聽話嘅乖女,唔貪玩,而好專心於家政女工。

袁熙妾侍[編輯]

甄夫人大個咗時,正值袁紹喺河北做霸主,當時佢統治包括冀州、幽州、并州同青州。甄夫人係個絕色美人,喺後世有句唱:「東吳有二喬,北方甄宓俏」。到漢獻帝嘅建安年間(196年~220年),甄夫人同袁熙結婚,袁熙係袁紹嘅第二個仔。

一段時間後,袁紹派袁熙去鎮守幽州[註 4],不過甄夫人無跟去,而留喺鄴城,即係當時冀州首府,佢留低係爲咗服侍家婆。佢無同袁熙生到仔女。

曹丕正室[編輯]

200年,袁紹曹操官渡之戰中打敗,202年袁紹過世,袁氏勢力衰微。袁熙阿哥袁譚同細佬袁尚爭繼承權。曹操因此支離佢哋,打敗包括袁熙在內嘅袁氏兄弟。

204年,曹操攻落鄴城,生擒袁氏家眷。曹操嫡長子曹丕,嗰陣時17歲,而甄氏21歲,曹丕睇甄氏極其靚女,立即吸引佢。喺《三國演義》,曹軍勝利後,曹丕引軍直衝入袁家,睇到兩個女人互相攬住喊緊,佢哋講出分別係袁紹嘅老婆同二新婦(sam1 pou5/心抱)。到見曹操時,袁紹老婆知曹丕意,於是獻新婦畀曹丕,雖然嗰陣時佢嘅仔重在生。曹操望甄氏容顏,訖(ngat6)頭話:「實在應當係曹氏新婦。」雖然嗰陣時袁熙在生,曹丕重係娶咗佢。207年,袁熙共袁尚走佬去遼東,畀公孫康殺死,獻佢哋個頭畀曹操。

跟咗曹丕後,佢生出曹叡(205年)。佢哋兩個又有一個女,叫做東鄉公主。

之後,曹丕寵愛郭氏,冷落咗佢[註 5]

220年,曹丕取代老豆升做魏王,廢漢獻帝自立爲君,即係魏文帝。文帝定都喺洛陽,但忽視咗嘅甄夫人留喺鄴城,唔睬佢。喺畀皇帝忽略、傳唔到話後,佢作咗樂府辭《塘上行》,呢首詩可以讀得出一個婦人對丈夫相思極致嘅心,睇得到甄夫人深情無悔嘅心受緊傷害。

對於失寵,甄夫人好失意,有怨言。呢下激嬲咗曹丕。於是221年8月4號派人賜死甄夫人,葬喺鄴城,終年38歲。據《魏略》,話甄夫人嘅死同郭氏嘅陷害有關[2],正史雖然搵唔到直接嘅有關陷害嘅線索,但喺《三國志・周宣傳》講到周宣爲曹丕解夢,話有個貴族女子冤死,嗰陣時已經派使者賜死甄夫人,曹丕聽到噉講立即後悔,但追唔切個使者。因此對於郭氏有無陷害、係咪佢整死甄夫人呢樣嘢有比較多嘅講法[註 6]。但就算唔係佢陷害,正史中都明確講甄夫人嘅死肯定同郭氏受寵有關[3]。據《魏略》同《漢晉春秋》,喺佢死後,佢嘅口塞入好多糠,啲頭髮冚住面,噉樣先得埋葬[2][4]

到後一年(222年),郭氏得以立爲皇后。但係,因爲郭后無仔,於是甄氏嘅仔曹叡由郭氏來養。據《魏書》《魏略》,曹叡對於生母不得善終好介懷,因爲不得已先對郭后恭敬,郭后因爲無仔好惜(sek3)曹叡。曹丕覺得曹叡個心唔鍾意,於是想立其他仔做太子,比如曹禮,所以好長時間無封曹叡做太子[5]

226年,曹丕死,曹叡繼位,即係魏明帝。郭氏無仔,但佢係曹丕嘅皇后,於是變成皇太后,直到235年死。據《魏略》《漢晉春秋》,魏明帝從李夫人度得知甄氏嘅慘死,於是佢對郭太后非常之怨恨,幾次喊住問郭太后生母點死,郭氏好嬲噉講:「先帝(曹丕)頒佈佢死罪,同我有咩關係要來責問我?何況你係先帝嘅仔,乜可以追罪自己嘅死咗老豆,然後因爲老母死咗而逼死後母喎?」曹叡聽咗對佢嘅憎怨強下添。於是曹叡逼死咗郭太后,佢對生母嘅追痛令郭氏有講唔出嘅心悒,耐咗積成病而死。喺佢死後,曹叡落令似佢生母落得嘅辱屍遭遇噉去對待郭后,令佢無得風光大葬[2][4]。但喺正史之中,曹叡優待郭后嘅親族,亦厚葬郭后,喺西晉時因爲曹叡對郭后言行謹慎孝敬而睇佢係孝子典範[6]

魏明帝追思佢生母,於是追尊甄夫人做文昭皇后。

作品[編輯]

甄夫人有詩賦才能,喺畀文帝曹丕冷落咗後佢寫咗首《塘上行》,內容懇切,體現一個婦人對丈夫嘅心情,所以流傳後世。

塘上行
(原文)
蒲生我池中,
其葉何離離。
傍能行仁義,
莫若妾自知。
眾口鑠黃金,
使君生別離。
念君去我時,
獨愁常苦悲。
想見君顏色,
感結傷心脾。
念君常苦悲,
夜夜不能寐。
莫以賢豪故,
棄捐素所愛。
莫以魚肉賤,
棄捐蔥與薤。
莫以麻枲賤,
棄捐菅與蒯。
出亦復苦愁,
入亦復苦愁。
邊地多悲風,
樹木何修修。
從君致獨樂,
延年壽千秋。
tong4 soeng6 hang4
(粵拼注音)
pou4 sang1 ngo5 ci4 zung1
kei4 jip6 ho4 lei4 lei4
bong6 nang4 hang4 jan4 ji6
mok6 joek6 cip3 zi6 zi1
zung3 hau2 soek3 wong4 gam1
si2 gwan1 sang1 bit6 lei4
nim6 gwan1 heoi3 ngo5 si4
duk6 sau4 soeng4 fu2 bei1
soeng2 gin3 gwan1 ngaan4 sik1
gam2 git3 soeng1 sam1 pei4
nim6 gwan1 soeng4 fu2 bei1
je6 je6 bat1 nang4 mei6
mok6 ji5 jin4 hou4 gu3
hei3 gyun1 sou3 so2 oi3
mok6 ji5 jyu4 juk6 zin6
hei3 gyun1 cung1 jyu5 haai6
mok6 ji5 maa4 saai2 zin6
hei3 gyun1 gaan1 jyu5 gwaai2
ceot1 jik6 fuk6 fu2 sau4
jap6 jik6 fuk6 fu2 sau4
bin1 dei6 do1 bei1 fung1
syu6 muk6 ho4 sau1 sau1
cung4 gwan1 zi3 duk6 lok6
jin4 nin4 sau6 cin1 cau1
喺池塘邊度行
(釋義;轉譯成粵語白話詩)
蒲草喺我池塘中生時,
佢啲葉幾咁繁茂雅緻。
若果靠你踐行到仁義,
重不如妾身自知己事。
啲人把口真係太犀利,[註 7]
令到夫君你同我別辭。
諗起夫君離別我嗰陣,
我獨自一個就好怨恨。
夫君嘅形相周不時諗,
條氣鬱結傷脾又攻心。
經常記掛夫君咁傷身,
夜夜係噉無得好覺瞓。
唔好因爲豪賢嘅才華,[註 8]
忘卻從前素來嘅珍愛;
唔好因爲魚肉嘅輕賤,
就噉拋棄蔥同野韭菜;
唔好因爲麻紙嘅價賤,
就唔要菅蒯嘅造紙材。[註 9]
行出門口又係咁苦愁,
行入返屋更係添苦愁,
邊遠地方多有悲涼風,
吹得樹木都風冷颼颼。[註 10]
跟咗夫君要自求快樂,
噉先延年益壽歲千秋。

洛神賦[編輯]

洛神賦圖中文洛神賦圖》中畫嘅洛神

有意見話曹丕之外,甄夫人亦得曹操嘅另一個仔曹植暗戀。呢種講法嘅憑證係223年,喺甄氏死咗兩年後,曹植作咗《洛神賦中文洛神賦》講出對佢嘅痛惜之心。中國學者易君左中文易君左話:曹植夢見到甄氏喺洛水岸邊,佢贈畀曹植一隻枕頭。醒咗後,曹植將呢啲事淋漓盡致噉寫入《感甄賦》,而之後曹叡改名做《洛神賦》[7]

喺中國史學界,有意見話事實唔係噉。當曹操進入鄴城捉袁氏家眷時,曹植先12歲,所以就算甄夫人嫁畀曹丕,曹植對阿嫂有情意都好,佢都唔會對曹植有咩情意。《洛神賦》係曹植爲近洛陽嘅洛水嘅神所寫嘅,呢個神叫做洛神,又有名叫宓妃,係伏羲嘅女。若果曹植掛住甄夫人,就應該尊佢做漳河神,漳河近鄴城,即係甄氏嘅墓所在,而唔會嗌佢做洛神[8]

不過亦自此,甄夫人亦得名做「甄宓」、「甄洛」、「甄妃」或者「洛神宓妃」。

喺文化藝術[編輯]

TVB劇集《洛神》嘅海報

甄夫人由於佢嘅悲劇傳奇同埋佢絕色美人嘅傳說,經常成爲各種藝術作品嘅靈感,如影視小說。最出名係TVB嘅劇集《洛神》,講嘅係甄夫人同曹植嘅情事,由女演員蔡少芬飾演甄宓,男演員馬浚偉飾演曹植/曹子建,陳豪飾演曹丕/曹子桓,女演員郭羨妮飾演郭嬛(郭氏)。

舞臺劇藝術亦有關於甄夫人嘅戲。如越劇吳語越劇有戲《曹植與甄洛》;廣東大戲京劇都有戲《洛神》。歌仔戲中文歌仔戲呢個戲種亦有好多戲講甄夫人,如《金縷歌》、《燕歌行》……

另外,以甄氏做靈感嘅小說有南宮搏中文南宮搏嘅《洛神》。

王欣太日文王欣太(KING GONTA)嘅漫畫蒼天航路日文蒼天航路》(そうてんこうろ;Beyond the Heavens)講嘅係曹操嘅人生,裏面亦有人物甄夫人。喺故事度,甄氏起名做甄姚。

比較新近嘅係部大陸劇集《新洛神中文新洛神》,講嘅係甄夫人嘅生平。演員李依曉中文李依曉飾演甄宓,楊洋中文楊洋飾演曹植,張迪中文张迪 (男演员)飾演曹丕。

睇埋[編輯]

[編輯]

  1. 據《三國志》引嘅《魏書》,甄夫人出世喺光和五年十二月丁酉,喺黃初二年六月丁卯過世。查兩千年中西曆轉換得出,出世喺西元183年1月26號,喺221年8月4號過世。
  2. 《三國志》度有齊佢兄弟姊妹嘅名,就得佢無記名。曹植嘅《洛神賦》作爲名篇,有傳說話係寫畀甄夫人嘅愛情篇章,一啲人據此就話甄夫人個名叫甄洛jan1 lok6)或甄宓jan1 fuk6),「洛」出自「洛神」,喺神話洛神係伏羲氏嘅女,所以又叫「宓妃」,所以又得出佢嘅名叫「宓」;亦有啲人因此叫佢甄妃jan1 fei1)。《洛神賦》原名《感甄賦》,但甄夫人嘅仔魏明帝出於避諱,要求阿叔曹植去咗名中嘅姓氏,於是改成《洛神賦》。噉樣睇,既然講洛神嘅「洛」「宓」冇避到諱,噉講明呢兩個名都唔會係甄夫人嘅真名。另外又有神話話,洛神係嫁畀河伯嘅,後來河伯畀后羿射中,於是洛神做咗后羿老婆,所以就話洛神其實就係嫦娥,於是有一說話甄氏有小字嫦娥soeng4 ngo4),但同樣呢個亦只係傳聞,冇講明嘅根據。
  3. 《三國志》記:「父逸,上蔡令。后三歲失父。」古文記嘅歲數係虛歲,內文用嘅係實歲。
  4. 而家嘅北京天津同埋遼寧西部。
  5. 有種講法話郭氏想奪咗甄氏正室嘅位,於是搵計陷害佢。但呢種講法喺正史中搵唔到線索。
  6. 喺《三國演義》,就寫話郭氏同張韜勾結,張韜詐話喺甄夫人嘅宮度挖到木頭人偶,上面有曹丕嘅生辰來咒佢。於是曹丕賜死咗甄夫人。
  7. 「眾口鑠黃金」化自成語「眾口鑠金」,意思係輿論嘅力量好犀利,可以熔金。
  8. 「賢豪」係委婉講法,本意係賢達之士,呢度指曹丕嘅新歡郭氏。郭氏喺曹丕爭奪王位繼承人嘅過程中出咗好多橋,好幫得曹丕手。
  9. 「麻枲」嘅意思指麻質嘅紙,係比較粗糙嘅紙料;菅同蒯係兩種可以造紙嘅草。
  10. 「修修」係象聲詞,形容風聲。

[編輯]

  1. 《世說新語・惑溺篇》:魏甄后惠而有色,先為袁熙妻,甚獲寵。曹公之屠鄴也,令疾召甄,左右白:「五官中郎已將去。」公曰:「今年破賊正為奴。」
  2. 2.0 2.1 2.2 《魏略》曰:明帝既嗣立,追痛甄后之薨,故太后(指郭后)以憂暴崩。甄后臨沒,以帝屬李夫人。及太后崩,夫人乃說甄后見譖之禍,不獲大斂,被髮覆面,帝哀恨流涕,命殯葬太后,皆如甄后故事。
  3. 《三國志・文德郭皇后傳》:甄后之死,由后之寵也。
  4. 4.0 4.1 《漢晉春秋》曰:初,甄后之誅,由郭后之寵,及殯,令被髮覆面,以糠塞口,遂立郭后,使養明帝。帝知之,心常懷忿,數泣問甄后死狀。郭后曰:「先帝自殺,何以責問我?且汝為人子,可追讎死父,為前母枉殺後母邪?」明帝怒,遂逼殺之,敕殯者使如甄后故事。
  5. 《魏書》:「初,郭后無子,帝使母養平原王睿;以睿母甄夫人被誅,故未建為嗣。睿事后甚謹,后亦愛之。文帝始以帝不悅,有意欲以他姬子京兆王為嗣,故久不拜太子。」《魏略》:「文帝以郭后無子,詔使子養帝。帝以母不以道終,意甚不平。後不獲已,乃敬事郭后,旦夕因長御問起居,郭后亦自以無子,遂加慈愛。」
  6. (西晉)閻纘《上書理湣懷太子之冤》:及至明帝,因母得罪,廢為平原侯,為置家臣庶子,師友文學,皆取正人,共相匡矯。兢兢慎罰,事父以孝,父沒,事母以謹,聞於天下,於今稱之。
  7. 據《中國文學史》第256頁。
  8. 據《細說三國》第356頁到357頁。

參攷資料[編輯]

  • 陳壽(著);裴松之(注). "魏書 — 后妃傳:文昭甄皇后傳". 《三國志》. 
  • 陳壽(著);裴松之(注). "魏書 — 方技傳:周宣傳". 《三國志》. 無幾,帝復問曰:「我昨夜夢青氣自地屬天。」宣對曰:「天下當有貴女子冤死。」是時,帝已遣使賜甄后璽書,聞宣言而悔之,遣人追使者不及。 
  • 易君左 (1973年). 《中國文學史》. 華聯出版社. 
  • 黎東方 (2007年). 《細說三國》. 上海人民出版社.