鄧艾

出自維基百科,自由嘅百科全書
跳去導覽 跳去搵嘢

鄧艾195年264年),字士載,義陽棘陽人[1]曹魏後期將領。

鄧艾
Deng Ai Qing portrait.jpg
清朝人畫嘅鄧艾畫像
曹魏 太尉
195年
264年
活躍時期 240年~264年
仔女 鄧忠
遞啲名
士載

生平[編輯]

早年[編輯]

鄧艾細嗰陣時就無咗老豆,屋企好窮,細嗰陣時就有口吃嘅毛病;曾經喺汝南嗰度放牛。12歲同亞媽搬去潁川時,見到死咗嘅太丘長陳寔嘅碑文上面寫住「文為世範、行為士則」,於是自己改名做鄧範,字士則。後尾由於有個族人同佢同名,所以改咗叫鄧艾[2]。鄧艾早年因為自己嘅才學而被人舉薦做典農都尉,但係因為佢口吃而乜任何升遷。因為佢好仲意軍事,所以每次去到高山大澤,一定會喺度測量同埋繪製地形,並且規劃點樣紮營佈防。當時啲人成日取笑鄧艾[3],但係鄧艾並唔在意。後尾佢做咗典農綱紀,係見到太尉司馬懿之後得到司馬懿嘅賞識,做咗太尉府嘅掾屬,之後又升咗做尚書郎[4]

屯田墾荒[編輯]

由正始元年(240年)開始,魏國準備喺淮河兩岸大規模嘅屯田,嚟儲備軍糧。鄧艾被派咗去視察[5],視察完之後寫咗本《濟河論》嚟表明自己計劃嘅具體方案,司馬懿十分滿意佢提出嘅方案,並且用咗拒嘅方案嚟屯田。[6]251年,司馬懿病死咗,佢個大仔司馬師繼承咗佢嘅官職。鄧艾先係喺汝南嗰度做太守,跟住又升咗做兗州刺史,加埋振威將軍,鄧艾每到一個地方做官就係度屯田墾荒。

曲城之戰[編輯]

249年秋,蜀國將領姜維進攻曹魏嘅雍州,諗住拉攏羌胡返蜀國。司馬昭郭淮同埋陳泰帶兵抵禦,鄧艾亦都有參與其中[7]。鄧艾進攻蜀軍控制嘅曲城,切斷嗰度嘅交通同埋水源,搞到曲城嘅蜀軍困窘不堪。姜維知道後即刻走返蜀國。鄧艾係白水嘅北岸嗰度屯兵,以防蜀軍反攻。冇耐之後,姜維又派廖化帶兵返嚟,係白水南岸扎營,同鄧艾對峙[8]。鄧艾分析認為,姜維係派廖化駐守白水南岸,係諗住從北面嘅洮城偷襲[9]。鄧艾於是即刻搶佔咗洮城,姜維果然帶兵嚟攻洮城,見座城已經被鄧艾搶咗,只好撤軍返蜀漢,魏軍因此而冇輸到,鄧艾因為嚟份功績而被封做關內侯,升任討寇將軍[10]曹髦做咗皇帝之後,封鄧艾做方城亭侯[11]。後尾鄧艾由於參與咗對毌丘儉之亂嘅鎮壓而進封方城鄉侯,行安西將軍。[12]

狄道之戰[編輯]

正元二年(255年),司馬師病危,蜀將姜維趁機派幾萬人攻打隴西,蜀軍向狄道嗰邊進軍。魏將王經奮力抵抗,但係佢喺洮西被姜維打敗,被姜維包圍係狄道城入面[13]。同年八月,司馬昭任命鄧艾擔任安西將軍、假節、領護東羌校尉[14],同陳泰等人一齊抗蜀。陳泰同鄧艾軍會合之後,兵分三路前往隴西,佢哋避開蜀軍,偷偷咁行到狄道東南咁山上,係山上點火同埋打鼓嚟同城入面聯絡,守軍見到援軍嚟咗,士氣大振。姜維指揮手下進攻嗰座山,但係被魏軍打敗。嗰時陳泰話要截斷蜀軍嘅退路,九月,姜維將軍隊撤去鐘堤[15]

段谷之戰[編輯]

255年姜維係隴西輸咗,退守鍾堤。鄧艾認為姜維一定會再嚟多一次,所以加強防備。256年六月,姜維約咗蜀將胡濟上邽嗰度會合[16]。姜維原先諗住行祁山,知道鄧艾係嗰度有準備之後改行董亭進攻南安。鄧艾軍搶佔咗武城山,姜維見冇咗地利,打唔落嚟,於是係夜晚渡過渭水往東行,攻打上邽。兩軍係段谷嗰度撞到,因為胡濟冇按照規定過嚟幫手,所以蜀軍打輸咗場仗,傷亡慘重[17]。魏國因此封鄧艾做鎮西將軍、都督隴右諸軍事,並且進封鄧侯,分五百戶,封佢個仔鄧忠做亭侯。[18]

不戰而勝[編輯]

257年,魏將諸葛誕聯合東吳係淮南起兵反叛司馬昭。司馬昭抽調咗關中嘅兵力去討伐諸葛誕。姜維趁機攻打魏國嘅秦川。嗰時魏國係長城屯咗好多軍糧,但係防守好弱。鄧艾同埋魏將司馬望都驚姜維會攻打長城,於是佢哋兩軍聯合埋一齊。姜維軍係芒水嘅山上紮營,司馬望軍同鄧艾軍就係近水嘅地方起咗座寨。蜀軍挑戰咗魏軍好多次,但魏軍就係不肯出嚟,兩軍就咁樣長期對峙。第二年(258年),魏國鎮壓咗諸葛誕嘅叛變,姜維知道後只好撤返蜀國。鄧艾就咁升做征西將軍,前後總共增加咗六千六百戶食邑。[19]。262年姜維又再起兵攻打魏國,攻到洮陽境內。鄧艾係洮陽以東的侯和嗰度阻擊蜀軍,蜀軍大敗,損失慘重。[20][21]

偷渡陰平[編輯]

263年秋,大將軍司馬昭命鄧艾帶三萬幾人去纏擾係沓中屯田的姜維[22],雍州刺史諸葛緒帶三萬幾人阻斷姜維返漢中嘅路,鍾會帶領十幾萬大軍進攻漢中,廷尉衛瓘做監軍。鍾會攻陷漢中,姜維只好退守劍閣,鍾會打唔落嚟。十月,鄧艾親自帶兵行陰平小路[23],諗往偷襲蜀國嘅首都成都。佢哋攻到江油,嗰度嘅守將馬邈嚇到投降[24]。鄧艾又攻陷涪陵同埋綿竹,蜀漢衛將軍、諸葛亮嘅亞仔諸葛瞻係綿竹戰死。蜀國嘅百姓嚇到匿入山林入面[25]。蜀主劉禪投降鄧艾,蜀漢滅亡[26]

居功自傲[編輯]

蜀漢滅亡之後,鄧艾擅自任命劉禪做驃騎將軍[27],並且恢復其它蜀國官員嘅職位,允許佢哋重操舊職。佢曾經同蜀國嘅官員講道:「你吔因為有我,所以先有今日。如果你們遇到嘅係吳漢嗰種嘅人,你吔早就滅亡喇。」又話:「姜維自係一時嘅英雄,因為遇到咗我,所以先至窮途末路。」[28]。一直都唔仲意鄧艾嘅鍾會趁機向司馬昭冤枉鄧艾要造反[29],而鄧艾係處置投降嘅蜀漢君臣嗰陣時冇按照司馬昭嘅指示去做,亦都加深咗司馬昭嘅疑忌,司馬於是叫鍾會將鄧艾捉返去長安,鍾會派監軍衛瓘緝拿鄧艾[30]。鍾會謀反失敗被殺之後,鄧艾嘅部將諗住救返鄧艾,衛瓘驚俾鄧艾報復,於是派田續殺咗鄧艾、鄧忠父子。鄧艾係洛陽仔女亦都被殺曬[31]

參考[編輯]

引用[編輯]

  1. 《三國志·魏書·王毌丘諸葛鄧鍾傳》:鄧艾字士載,義陽棘陽人也。
  2. 《三國志·魏書·王毌丘諸葛鄧鍾傳》:讀故太丘長陳寔碑文,言「文為世範,行為士則」,艾遂自名範,字士則。後宗族有與同者,故改焉。
  3. 《三國志·魏書·王毌丘諸葛鄧鍾傳》:每見高山大澤,輒規度指畫軍營處所,時人多笑焉。
  4. 《三國志·魏書·王毌丘諸葛鄧鍾傳》:後為典農綱紀,上計吏,因使見太尉司馬宣王。宣王奇之,辟之為掾,遷尚書郎。
  5. 《三國志·魏書·王毌丘諸葛鄧鍾傳》:時欲廣田畜谷,為滅賊資,使艾行陳、項已東至壽春
  6. 《三國志·魏書·王毌丘諸葛鄧鍾傳》:宣王善之,事皆施行。
  7. 《三國志·魏書·王毌丘諸葛鄧鍾傳》:嘉平元年,與征西將軍郭淮拒蜀偏將軍姜維。
  8. 《三國志·魏書·王毌丘諸葛鄧鍾傳》:三日,維遣廖化自白水南向艾結營。
  9. 《三國志·魏書·王毌丘諸葛鄧鍾傳》:艾謂諸將曰:「維今卒還,吾軍人少,法當來渡而不作橋。此維使化持吾,令不得還。維必自東襲取洮城。」
  10. 《三國志·魏書·王毌丘諸葛鄧鍾傳》:艾即夜潛軍徑到,維果來渡,而艾先至據城,得以不敗。賜爵關內侯,加討寇將軍
  11. 《三國志·魏書·王毌丘諸葛鄧鍾傳》:高貴鄉公即尊位,進封方城亭侯。
  12. 《三國志·魏書·王毌丘諸葛鄧鍾傳》:以破欽等功,進封方城鄉侯,行安西將軍。
  13. 《三國志·蜀書三·後主傳》:與魏雍州剌史王經戰於洮西,大破之。經退保狄道城。
  14. 《三國志·魏書·王毌丘諸葛鄧鍾傳》:乃以艾為安西將軍,假節、領護東羌校尉。
  15. 《三國志·蜀書十四·蔣琬費禕姜維傳 》:魏徵西將軍陳泰進兵解圍,維卻住鐘題。
  16. 《三國志·蜀書十四·蔣琬費禕姜維傳》:與鎮西大將軍胡濟期會上邽。
  17. 《三國志·蜀書十四·蔣琬費禕姜維傳》:濟失誓不至,故維為魏大將鄧艾所破於段谷,星散流離,死者甚眾。
  18. 《三國志·魏書·王毌丘諸葛鄧鍾傳》:甘露元年詔曰:「……今以艾為鎮西將軍、都督隴右諸軍事,進封鄧侯。分五百戶封子忠為亭侯。」
  19. 《三國志·魏書·王毌丘諸葛鄧鍾傳》:二年,拒姜維於長城,維退還。遷征西將軍,前後增邑凡六千六百戶。
  20. 《三國志·魏書·王毌丘諸葛鄧鍾傳》:景元三年,又破維於侯和
  21. 《三國志·蜀書十四·蔣琬費禕姜維傳》:五年,維率眾出漢、侯和,為鄧艾所破
  22. 《三國志·魏書·王毌丘諸葛鄧鍾傳》:使艾與維相綴連;
  23. 《三國志·魏書·王毌丘諸葛鄧鍾傳》:冬十月,艾自陰平道行無人之地七百餘里
  24. 《三國志·魏書·王毌丘諸葛鄧鍾傳》:先登至江由,蜀守將馬邈降。
  25. 《資治通鑑·卷七十八·魏紀十》:聞艾已入平土,百姓擾擾,皆迸山野,不可禁制。
  26. 《三國志·魏書·王毌丘諸葛鄧鍾傳》:劉禪遣使奉皇帝璽綬,為箋詣艾請降。
  27. 《三國志·魏書·王毌丘諸葛鄧鍾傳》:承制拜禪行驃騎將軍
  28. 《三國志·魏書·王毌丘諸葛鄧鍾傳》:艾深自矜伐,謂蜀士大夫曰:「諸君賴遭某,故得有今日耳。若遇吳漢之徒,已殄滅矣。」又曰:「姜維自一時雄兒也,與某相值,故窮耳。」
  29. 《三國志·魏書·王毌丘諸葛鄧鍾傳》:因鄧艾承制專事,密白艾有反狀
  30. 《三國志·魏書·王毌丘諸葛鄧鍾傳》:司馬文王懼艾或不從命,敕會並進軍成都,監軍衛瓘在會前行,以文王手筆令宣喻艾軍,艾軍皆釋仗,遂收艾入檻車。
  31. 《三國志·魏書·王毌丘諸葛鄧鍾傳》:艾父子既囚,鍾會至成都,先送艾,然後作亂。會已死,艾本營將士追出艾檻車,迎還。瓘遣田續等討艾,遇於綿竹西,斬之。子忠與艾俱死,餘子在洛陽者悉誅