曹叡

出自維基百科,自由嘅百科全書
跳去: 定向搵嘢

曹叡(叡讀銳,粵拼cou4 jeoi6205年239年1月22號),字元仲jyun4 zung6,係中國三國時代曹魏嘅第二位皇帝。曹叡能詩文,同魏太祖武皇帝曹操、魏高祖文皇帝曹丕兩仔爺並稱曹魏「三祖」,但係佢嘅文學成就同曹操、曹丕兩仔爺爭好遠。

生平[編輯]

曹叡係曹丕元配甄夫人所生,由細個就得到阿爺曹操嘅鍾愛,220年封做武德侯,第二年封齊公,再第二年封平原王。由於甄夫人得罪咗曹丕,所以曹丕冇即刻立曹叡做太子,有一段時間曹丕甚至想立另一個仔做太子。一直到226年曹丕就快病死,先至立曹叡做太子,又召曹真曹休陳群司馬懿,要佢哋接受遺詔,輔佐嗣主。五月十七日,曹丕喺嘉福殿駕崩,曹叡繼位,是為明帝。

曹叡登基之後,首先必須對抗內外敵人嘅攻擊,226年八月孫權進攻江夏、襄陽,227年孟達作反,去到234年為止,諸葛亮五次進攻曹魏,234年孫權攻打合肥。魏明帝成功打低孫權、諸葛亮等等呢啲內外戰爭。佢重用曹真、張郃、司馬懿等名將同諸葛亮作戰。234年諸葛亮瓜老襯之後,魏蜀邊境上嘅情況有所減緩,魏明帝開始喺洛陽大興土木,起宮殿,耗盡人力物力,大臣楊阜、高堂隆等人對此一再勸練,明帝雖然多未採納,但係都好大方,唔因為咁而問罪。同年,佢將便宜仔曹芳封為齊王。237年遼東公孫淵反魏,自立為燕王。嗰年,魏明帝下令司馬懿攻打遼東,司馬懿因此帶兵四萬,同夏侯霸等人出征遼東,大破燕軍,打殘公孫淵,成功收復遼東。

239年初,曹叡病重,召司馬懿同埋曹爽託孤,要佢哋輔佐年幼嘅曹芳,嗰日即逝世,在位13年,享年35歲,廟號烈祖,葬喺高平陵。