丁原
| 丁原 | |
|---|---|
 | |
| 東漢 官員、將領 | |
| 死 | 189年 洛陽 |
| 活躍時期 | 189年 |
| 遞啲名 | |
| 字 | 建陽 |
丁原（粵拼：ding1 jyun4；？—189年），字建陽（gin3 joeng4），係東漢末年嘅官吏、將領，亦係地方豪強之一。佢最後俾自己手下呂布殺害。
生平[編輯]
早年[編輯]
丁原出身窮家，雖然份人好粗，不過好夠膽，有武勇佢學過騎馬射箭。佢提拔到喺地方做官，去鎮壓劫匪，經常唔礙於艱難危險[1]。中平五年（188年）三月，丁原代替俾休屠各胡做低嘅張懿做咗并州刺史[2]，佢收編并州嘅殘軍吏民，之後轉拜騎都尉、武猛都尉，喺河內郡屯兵。期間佢錄用咗武勇聞名州里嘅呂布、張楊同埋張遼。[3][4][5]
喺洛陽[編輯]
189年，漢靈帝死，太子劉辯登基，即係漢少帝。外戚大將軍何進攬權輔政[6]。何進好唔鍾意啲宦官，因為嗰班宦官諗住殺咗自己，然後搵皇子協嚟做皇帝[7][8]。由於說服唔到佢個妹何太后去剷除宦官，何進派人出去話畀丁原，叫佢扮成反對宦官嘅樣，目的係逼太后同意罷職啲宦官。丁原受令，帶軍燒咗洛陽北方嘅孟津，要求帶兵到洛陽誅殺宦官，但件事畀何太后制止。[9]189年農曆八月，何進聽咗手下袁紹嘅意見，入長樂宮去見何太后，提議殺晒啲宦官。消息走漏咗，宦官張讓指揮幾十個士兵喺宮門埋伏，當何進出宮門嗰陣就一齊出嚟殺死佢[10]。袁紹帶軍攻入宮中，殺曬啲宦官。無幾耐之後，西凉軍閥董卓帶軍入駐洛陽，並且用武力嚟操縱朝廷。
遇害[編輯]
由於最初董卓帶嚟嘅軍隊只有三千人，於是佢想借兼併其他軍閥嚟壯大自身，丁原就係其中佢睇上嘅一個。董卓見呂布咁得丁原信任，於是用高官厚祿收買呂布，教唆呂布反佢上頭。呂布聽咗董卓嘅話殺咗丁原，然後帶軍降董卓[11]。丁原部將張楊帶住丁原軍部分唔肯投降董卓嘅士兵周圍流浪，而另一個部將張遼就同呂布一齊投靠咗董卓[12]。
喺三國演義[編輯]
喺羅貫中嘅小說《三國演義》入面，丁原喺荊州刺史，呂布喺丁原嘅契仔。丁原因為反對董卓廢少帝而同佢敵對，喺夜晚睇緊書嗰陣畀諗住投靠董卓嘅呂布殺害。
參考[編輯]
引用[編輯]
- ↑ 《英雄記》：原字建陽。本出自寒家，為人粗略，有武勇，善騎射。為南縣吏，受使不辭難，有警急，追寇虜輒在其前。裁知書，少有吏用。
- ↑ 《資治通鑑.卷五十九.漢紀五十一》：三月，屠各胡攻殺并州刺史張懿。
- ↑ 《三國志·魏書七·呂布臧洪傳》：刺史丁原為騎都尉，屯河內，以布為主簿，大見親待。
- ↑ 《三國志·魏書八·二公孫陶四張傳》:：武勇給并州，為武猛從事。
- ↑ 《三國志·魏書十七·張樂于張徐傳》：漢末，并州刺史丁原以遼武力過人，召爲從事
- ↑ 《資治通鑑.卷五十九.漢紀五十一》：戊午，皇子辯即皇帝位，年十四。尊皇后曰皇太后。太后臨朝。赦天下，改元為光熹……以後將軍袁隗為太傅，與大將軍何進參錄尚書事。
- ↑ 《資治通鑑.卷五十九.漢紀五十一》：碩時在內，欲先誅何進而立協
- ↑ 《資治通鑑.卷五十九.漢紀五十一》：進既秉朝政，忿蹇碩圖己，陰規誅之。
- ↑ 《後漢書·卷六十九·竇何列傳》：使武猛都尉丁原燒孟津，火照城中，皆以誅宦官為言。太后猶不從。
- ↑ 《後漢書·卷六十九·竇何列傳》:八月，進入長樂白太后，請盡誅諸常侍以下，選三署郎入守宦官廬……乃率常侍段珪、畢嵐等數十人，持兵竊自側闥入，伏省中。及進出，因詐以太后詔召進。入坐省闥……於是尚方監渠穆拔劍斬進於嘉德殿前。
- ↑ 《資治通鑑.卷五十九.漢紀五十一》:董卓之入也，步騎不過三千，自嫌兵少，恐不為遠近所服…卓又陰使丁原部曲司馬五原呂布殺原而並其眾
- ↑ 《三國志·魏書十七·張樂于張徐傳》:何進遣詣河北募兵，得千餘人。還，進敗，以兵屬董卓。
睇埋[編輯]