呂布

出自維基百科,自由嘅百科全書
跳去導覽 跳去搵嘢
呂布
Lü Bu Portrait.jpg
呂布畫像
東漢 左將軍、溫侯
?年
199年
活躍時期 ?~199年
仔女 呂氏
遞啲名
奉先

呂布粵拼leoi5 bou3;—199年2月7號),字奉先fung6 sin1東漢末期軍閥,五原郡九原(響依家內蒙古包頭)人[1]。先後做過丁原同埋董卓嘅部將,曾經喺袁紹嗰度做過嘢,後尾趁劉備袁術交戰嗰時佔領徐州,成立一個獨立嘅勢力。建安三年喺下邳曹操做低。呂布弓馬騎射好叻,後世啲人讚佢:「人中有呂布,馬中有赤兔。」

生平[編輯]

早年[編輯]

中平六年(189年),呂布因為驍勇善戰而喺并州任職。刺史丁原兼任騎都尉後駐守河內郡,任命呂布做自己嘅主簿[2][3]西涼軍閥董卓入京後,誘使呂布殺咗丁原,事後,董卓任命呂布做騎都尉,非常信任同埋喜愛佢,董卓甚至將佢當成自己仔女對待,呂布善長騎射,力氣過人,被人叫做「飛將」。之後董卓又任佢做中郎將,封都亭侯。[4]

謀殺董卓[編輯]

董卓性格多疑,唔開心嗰時曾經向呂布丟手戟,另一方面呂布又同董卓的婢女有親密嘅關係,呂布驚件事被董卓知道,所以心入面十分之不安。[5]嗰陣時,司徒王允士孫瑞同埋楊瓚幾個人諗住暗殺董卓,於是佢哋去拉攏呂布,呂布答應佢哋之後成功將董卓刺殺,因此而做咗奮威將軍,假節,儀比三司,進封溫侯,同王允一齊控制朝政。[6]

征戰中原[編輯]

董卓死後,佢嘅部下李傕同埋郭汜攻入長安,呂布打輸之後走佬。呂布之後曾經投靠過袁術同埋袁紹等諸侯,但係由於佢驕傲自大嘅性格而搞到無人肯收佢。後尾呂布趁曹操徐州嗰時入主兗州,但係好快就被曹操趕翻出兗州。之後呂布投靠徐州牧劉備,並且趁劉備同袁術打交嗰時攻入徐州,自立做徐州刺史[7]

兵敗下邳[編輯]

建安三年(198年),曹操聯合劉備一齊攻打呂布,呂布退守下邳,最終由於手下叛變而戰敗。[8]呂布被綁到曹操面前時,呂布唔明白梗講:「平時我對我啲手下咁好,估不到大難臨頭嗰時佢哋全部都忘恩負義背叛我!」曹操笑道:「你將自己嘅妻妾丟喺屋企,出去玩你啲下屬嘅女人,咁都叫對佢哋好?」呂布啞口無言[9]。呂布要求鬆綁,曹操笑住回答:「綁老虎唔可以唔緊。」呂布又講道:「曹公你所顧忌嘅係我,宜家我已經降服你喇,天下嘅憂患已經大大減少。只要由我嚟率領騎兵,曹公你率領步兵,就可以統一天下。」愛才嘅曹操欣賞呂布嘅武勇而考慮收留,劉備勸說:「君不見丁原、董卓之事乎?(您唔記得咗丁原同埋董卓嘅前車之鑑喇?)」主簿王必亦都上前勸曹操處死呂布,曹操聽咗之後擰頭話道:「本嚟仲想俾你條活路,但係有人認為唔妥,所以只好將你殺咗。」呂布喺死前大鬧:「劉備你最唔可以信任!」[10]。最後呂布同陳宮、高順三個人一齊被吊死,佢哋個頭喺許都嘅市場示眾。[11]

參考資料[編輯]

引用[編輯]

  1. 《三國志·魏書七·呂布臧洪傳》:呂布字奉先,五原郡九原人也。
  2. 《後漢書·呂布傳》:呂布字奉先,五原九原人也,以弓馬驍武給并州,刺史丁原原為騎都尉,屯河內,以布為主簿
  3. 《三國志·魏書七·呂布臧洪傳》:刺史丁原為騎都尉,屯河內,以布為主簿
  4. 《三國志·魏書七·呂布臧洪傳》董卓入京都,將為亂,欲殺原,併其兵眾。卓以布見信於原,誘布令殺原。布斬原首詣卓,卓以布為騎都尉,甚愛信之,誓為父子。布便弓馬,膂力過人,號為飛將。稍遷至中郎將,封都亭侯。
  5. 《三國志·魏書七·呂布臧洪傳》:卓性剛而褊,忿不思難,嘗小失意,拔手戟擲布。布拳捷避之,為卓顧謝,卓意亦解。由是陰怨卓。卓常使布守中閤,布與卓侍婢私通,恐事發覺,心不自安。
  6. 《三國志·魏書七·呂布臧洪傳》:時允與僕射士孫瑞密謀誅卓,是以告布使為內應……布遂許之,手刃刺卓。語在卓傳。允以布為(奮威)將軍,假節,儀比三司,進封溫侯,共秉朝政。
  7. 《三國志·魏書七·呂布臧洪傳》:備東擊術,布襲取下邳……布自稱徐州刺史。
  8. 《三國志·魏書七·呂布臧洪傳》:建安三年……太祖自征布……圍之三月,上下離心,其將侯成、宋憲、魏續縛陳宮,將其衆降。布與其麾下登白門樓。兵圍急,乃下降。遂生縛布
  9. 英雄記》:布謂太祖曰:「布待諸將厚也,諸將臨急皆叛布耳。」太祖曰:「卿背妻,愛諸將婦,何以爲厚?」布默然。
  10. 《三國志·魏書七·呂布臧洪傳》:布曰:「縛太急,小緩之。」太祖曰:「縛虎不得不急也。」布請曰:「明公所患不過於布,今已服矣,天下不足憂。明公將步,令布將騎,則天下不足定也。」太祖有疑色。劉備進曰:「明公不見布之事丁建陽及董太師乎!」太祖頷之。布因指備曰:「是兒最叵信者。」
  11. 《後漢書·劉焉袁術呂布傳》:布及宮、順皆縊殺之,傳首許市。