鍾離牧

出自維基百科,自由嘅百科全書
跳去: 定向搵嘢
鍾離牧
東吳 官員、將領

會稽山陰(而家浙江紹興)

武陵郡
活躍時期 216年~263年
繼任 鍾離禕(都鄉侯)
老豆 鍾離緒
仔女 鍾離禕
鍾離盛
鍾離徇
遞啲名
子幹

鍾離牧粵拼zung1 lei4 muk6;?—?),字子幹zi2 gon3),會稽山陰人(而家浙江紹興),係三國東吳嘅將領、官員。

生平[編輯]

鍾離牧係漢朝魯國相鍾離意嘅七世孫,老豆係鍾離緒,做樓船都尉,阿哥係鍾離駰。鍾離牧細個時個人好吽(ngau6),唔精叻,不過佢阿哥鍾離駰逢人就講:「鍾離牧肯定叻過我,唔好睇輕佢。」當時啲人不以爲然。

後來鍾離牧搬去永興縣住,親自耕田,種咗20幾畝禾穀,臨熟時,縣度有個人話笪地係佢嘅,要佢交曬啲田同米,鍾離牧話:「呢度本來因爲笪田荒咗,先至來耕嗟。」結果佢真係交曬出來。縣長聽講咗,捉咗呢個人,想繩之以法,鍾離牧爲佢求情。縣長話:「閣下傾慕承宮[1],想學佢噉做,但我作爲長官,應該依法治理民衆,點可以枉法來順你意呢?」鍾離牧話:「呢度係會稽郡內,我係睇在你嘅意思先搬來住,而今你因爲少噉啲穀米就殺咗呢個人,我又點會夠膽重留響度呢?」於是鍾離牧收拾好準備返山陰縣,縣長親自阻止佢,放咗嗰個人出監,嗰個人知醜,親自同老婆一齊將攞到嘅六十斛米還返畀鍾離牧,不過鍾離牧閂門唔受,於是佢將啲米放喺路邊,無人夠膽攞走啲米。就噉樣鍾離牧出咗名。

建安二十一年(216年),陸遜征討鄱陽,鍾離牧亦帶住2000人去充軍[2]。231年,潘濬征討武陵蠻,鍾離牧想帶住3000人士兵去支援,但吳國朝廷唔準,結果令潘濬陷入無咗援軍嘅狀況[2]

之後鍾離牧做郎中。赤烏五年(242年),佢改任太子輔義都尉,無耐改任爲南海(而家廣東)太守。當時高涼(而家陽江一帶)有仍弩呢啲山賊作亂,鍾離牧過郡界討伐佢哋,用咗一旬左右就降服曬;揭陽又有曾夏率領嘅賊,喺當地作亂咗十幾年,鍾離牧派使者安撫佢哋,自此呢班人變成良民。鍾離牧喺南海郡任職四年,最後因爲病咗而離任。

之後佢召入朝廷做丞相長史、司直、中書令。之後建安、鄱陽、新都三個郡嘅山民叛亂,朝廷派出鍾離牧做監軍使者平定咗騷亂,降服咗頭目黃亂常俱,將佢哋嘅部下編入吳軍。於是鍾離牧封爲秦亭侯,拜命爲越騎校尉。

永安六年(263年),魏國兼併蜀漢,而武陵嘅五谿同蜀漢接界。五谿當地係夷人領地,朝廷驚佢哋會因此而叛亂,於是派鍾離牧做平魏將軍、武陵太守,去武陵管治當地。魏國派郭純試住做武陵太守,將涪陵人搬入遷陵,屯駐喺赤沙,引誘五谿夷人造反。結果有啲夷人真係響應咗郭純,進攻酉陽縣,震驚咗武陵郡。鍾離牧問啲人:「西蜀滅國,邊境畀魏國入侵,有咩辦法抵禦?」啲人個個都話:「呢兩個縣都係山區,又係夷人嘅地頭,唔可以用軍隊驚擾佢哋,一驚擾到夷人佢哋就會集結。最好等佢慢慢安定,派人安撫佢哋。」鍾離牧就唔係噉睇:「唔啱。而家外界勢力入侵,引誘啲人民,要趁佢嘅滲透未夠深來撲滅佢,就好似救火貴在快字。」於是鍾離牧決定出兵平亂。當時撫夷將軍高尚勸佢話:「以前潘濬督兵五萬來討伐五谿夷人,當時有蜀漢嘅劉氏幫手,先至平定到啲夷人。今日既無舊時嘅外援,而郭純又佔據咗遷陵,你帶三千人深入險境,真係睇唔出有咩勝算。」鍾離牧一於話佢聽:「非常之事,使乜遵循守舊?」於是鍾離牧帶兵日夜行軍,深入山區兩千里,斬殺惡民、叛亂首領、黨羽百餘人,郭純嘅勢力就散咗,平定咗五谿。於是鍾離牧擔任爲公安都督、揚武將軍,封做都鄉侯。之後又改任爲濡須都督。

之後又以前將軍假節,做武陵太守,最後鍾離牧死喺做武陵太守任上。佢死嘅時候,屋企無咩剩餘嘅財產,啲士民都追思佢。鍾離牧有三個仔,大仔鍾離禕繼承佢嘅爵位,代佢領兵,二仔鍾離盛做官,三仔鍾離徇做將軍。

評價[編輯]

  • 陳壽評價鍾離牧,將佢同其他平靖吳國內亂嘅功臣相比,話佢「蹈長者之規」。
  • 徐眾對於佢喺永興讓米救人嘅事評價唔高,佢引用孔子嘅話,認爲佢「讓非其義,所救非人」,對於噉嘅衰人就唔應該讓佢又救佢,認爲鍾離牧噉做唔係真正嘅仁義。
  • 始興太守羊衜寫信畀滕胤,喺信度讚鍾離牧,話雖然同佢唔係好熟,但睇佢喺南海嘅治績,「威恩部伍,智勇分明」,加之操守清純,有古人之風。

參攷資料[編輯]

[編輯]

  1. 承宮係漢代人,曾經喺蒙陰山度種禾,臨熟時啲人話笪田係佢嘅,承宮就讓曬畀佢,於是就噉出咗名。
  2. 2.0 2.1 《會稽典略》記錄鍾離牧嘅話:「大皇帝時,陸丞相討鄱陽,以二千人授吾,潘太常討武陵,吾又有三千人,而朝廷下議,棄吾於彼,使江渚諸督,不復發兵相繼。」