步騭

出自維基百科,自由嘅百科全書
跳去: 定向搵嘢
步騭
東吳 丞相、官員、將領
247年
活躍時期 200年~247年
前任 陸遜
繼任 朱據
遞啲名
子山

步騭(騭讀質,粵拼bou6 zat1;?—247年),子山zi2 saan1),臨淮淮陰人(而家江蘇淮安),係三國東吳嘅官員、將領,做過東吳丞相。佢原本係住喺吳地嘅學者,後漢末年時做咗首領孫權嘅軍師,自此入仕東吳。

生平[編輯]

少年[編輯]

《三國志・步騭傳》嘅出土殘片,東晉嘅隸書抄卷,保留住傳記後半同評語前半,喺敦煌藏經洞出土,而家收喺敦煌研究院。

步騭喺細個時因爲時勢亂,走咗江東避難,當時好窮。同廣陵嘅同歲人衛旌好老友,一齊種瓜自食,日頭耕田夜晚讀書,後來步騭從書本度學到咗好多嘢。

會稽有豪族焦征羌,做人幾霸道,步騭同衛旌喺地頭搵食驚畀佢蝦,於是將種嘅瓜畀佢來𠱁下佢。不過焦征羌好傲慢,令衛旌惡頂,想走,係步騭阻咗佢,話係買佢怕先來,而家又走盞激嬲人哋。於是佢哋等咗好耐先見到焦征羌。見到佢時,佢自己坐住靚位,而佢哋兩個坐出面,又令衛旌覺得屈辱;食嘢時,焦征羌食靚嘢,而佢哋得啲粗菜淡飯,於是衛旌又唔食。反而步騭一路寵辱不驚。離開後,衛旌疾佢點解噉都忍得,步騭話:「我哋貧賤,所以主人用貧賤人嘅待遇來對我哋,噉合適啊,有乜好羞恥呢?」按《吳書》評議,話步騭係個生性寬雅沈深、能屈能伸嘅人。

入仕、治理嶺南[編輯]

建安五年(200年),孫權做討虜將軍,召步騭做主記,當年年尾,步騭以病咗辭呈,同諸葛瑾嚴畯一齊遊吳中,佢哋當時係有名聲嘅俊材。

之後又做咗海鹽長、車騎將軍東曹掾。喺孫權做徐州牧時,佢做咗治中從事。建安十五年(210年),做鄱陽太守。當年年中,改任交州刺史、立武中郎將,帶住千人南行。第二年,又做埋征南中郎將。

劉表設嘅蒼梧太守吳巨有異心,做嘢陽奉陰違。步騭裝咗個局誅殺咗佢,於是聲威大震。士燮帶住啲人歸服佢,自此東吳統治咗包括兩廣同越南北部在內嘅嶺南。益州大姓雍闓殺咗蜀漢嘅太守正昂,同士燮一樣歸服東吳,由步騭接收。由於呢啲功勞,步騭做埋平戎將軍,封爵廣信侯。

離任嶺南、征戰[編輯]

延康元年(220年),孫權派呂岱頂替步騭個位,步騭帶走萬人嘅交州勇士出到長沙。當時劉備東征孫權,武陵苗人想作反,於是孫權叫步騭據守益陽。劉備輸咗後,零陵、桂陽等地唔安穩,步騭平定曬呢啲地方。

黃武二年(223年),做咗右將軍左護軍,改封做臨湘侯。黃武五年(226年),屯駐搬到漚口。

東吳時期[編輯]

229年,孫權登基做吳帝,拜封步騭做驃騎將軍,兼做冀州牧。同年做埋西陵督,代替陸遜安撫吳蜀邊境。後來吳蜀分家,冀州畀咗蜀漢,就解除咗佢州牧職位。

太子孫登喺遷都後繼續留喺武昌,佢寫信畀步騭求教,步騭同佢推舉咗十一個人才(諸葛瑾、陸遜、朱然、呂岱[1]潘濬裴玄夏侯承、衛旌、李肅周條石幹)畀佢,同佢分析呢啲人有咩才能。

酷吏呂壹上臺後,佢負責監察百官,處理刑獄,但佢經常吹毛求疵,小小事就落重手判刑,而且濫用酷刑,害咗好多無辜官員,搞咗好多冤案出來。於是步騭上書畀孫權,講佢製造冤獄嘅事,之後孫權醒悟,誅殺咗呂壹。

步騭經常建言上疏,孫權對於佢啲意見都幾肯聽取,不過有啲荒謬嘅意見就唔睬佢。比如有次步騭上表話北面嘅敵人爲咗過江將啲沙袋掟入長江度填江,想過江侵犯東吳,要防一防佢好。孫權就話驚咩啊唔理佢。後來其他臣子都噉講,孫權就話:「讀親步騭嘅上表,都唔知笑好定嬲好。條江喺天地開闢時就生出,邊有道理用沙袋就填到條江先得㗎!」

赤烏九年(246年),步騭接替陸遜做丞相,但重會同門生教書,自己依然好讀書,衣着形象同儒生一樣。但佢啲妻妾服飾華麗奢侈,呢下就畀外人笑。

步騭督守西陵二十年,佢啲敵人都因爲佢嘅威信而敬佢。佢性格寬弘,喜怒唔形於聲色,當地人好尊敬佢。

就任丞相第二年佢就過咗身。佢有兩個仔,大仔步協繼承爵位同手下軍隊,兼做埋撫軍將軍,步協過身後,由孫步璣繼承爵位。二仔步闡,繼承咗西陵督,但後來因爲降畀東吳攻滅,結果步家畀東吳滅門,得番送去晉國洛陽做人質嘅孫仔倖存。

擔任過嘅各職務[編輯]

做過嘅官職:

  • 主記
  • 海鹽長
  • 車騎將軍東曹掾
  • 治中從事
  • 鄱陽太守
  • 交州刺史
  • 立武中郎將
  • 征南中郎將
  • 平戎將軍
  • 右將軍左護軍
  • 驃騎將軍
  • 冀州牧
  • 西陵都督
  • 丞相

封得嘅爵位:

  • 廣信侯
  • 臨湘侯

參攷資料[編輯]

[編輯]

  1. 按《三國志・步騭傳》原文,步騭列出咗過世多年嘅程普,但無列出呂岱,陳景雲認為呢度嘅「程普」係誤寫,應該係「呂岱」先係。