步闡

步闡
東吳 將領
死	272年 西陵
活躍時期	247年～272年
遞啲名
字	仲思

步闡（闡讀淺，粵拼：bou6 cin2；？—272年），字仲思（zung6 si1），臨淮淮陰人（而家江蘇淮安），係三國時東吳將領，係吳國丞相步騭嘅二仔，佢阿哥係步協。

赤烏十年（247年），佢老豆步騭過身，步闡繼承老豆職位西陵督，繼續鎮守西陵，同時加封昭武將軍，封做西亭侯。

甘露元年（265年）農曆九月，步闡上表吳帝孫皓，勸佢由建業遷都武昌。雖然陸凱以武昌地頭唔好、違背先皇呢啲理由勸阻，但孫皓重係採納步闡嘅意見，留丁固、諸葛靚留守建業。

鳳皇元年（272年）農曆八月，孫皓召步闡做繞帳督，不過步闡反而驚咗唔肯應，因爲佢哋步家不溜守開西陵，忽然間召佢離開，諗係咪佢失職，又驚去咗會出事，於是守住西陵唔走，重向晉國投降埋添。爲咗表示誠意，佢派自己嘅侄仔步璣同步璿（又講話係步璇一個）去洛陽做人質，於是晉國委任步闡做都督西陵諸軍事、衛將軍，儀同三司（意思禮遇等同三公），兼任侍中、交州牧，封做宜都公。喺兩個侄仔嘅講法中，嗰兩個人亦封咗官職爵位。

孫皓聽到步闡降晉，即刻派陸抗討伐佢，於是晉國派羊祜、楊肇去救步闡。初時西陵因爲地勢險固、糧穀充足，啲人試住去打但打唔落，於是啲人聽陸抗話圍死佢哋。之後步闡嘅救兵到，陸抗落計打退咗羊祜、楊肇，最後步闡卒之撐唔住，西陵攻陷咗。

攻陷咗後，步闡畀陸抗斬頭，誅滅家族同佢啲幕僚，自此步家沒落，得返喺洛陽做人質嘅侄仔倖存。

參攷資料

• 陳壽。〈吳書：張顧諸葛步傳 — 步騭傳〉. 《《三國志》》。｢（赤烏）十年（步騭）卒……協弟闡，繼業為西陵督，加昭武將軍，封西亭侯，鳳皇元年，召為繞帳督。闡累世在西陵，卒被征命，自以失職，又懼有讒禍，於是據城降晉，遣璣與弟璿詣洛陽為任，晉以闡為都督西陵諸軍事、衛將軍、儀同三司，加侍中，假節領交州牧，封宜都公。璣監江陵諸軍事、左將軍。加散騎常侍，領廬陵太守，改封江陵侯；璿給事中、宣威將軍，封都鄉侯。命車騎將軍羊祜、荊州刺吏楊肇往赴救闡。孫皓使陸抗西行，祜等遁退。抗陷城，斬闡等，步氏泯滅，惟璿紹祀。｣
• 陳壽。〈吳書：三嗣主傳 — 孫皓傳〉. 《《三國志》》。｢甘露元年……九月，從西陵督步闡表，徙都武昌，御史大夫丁固、右將軍部諸葛靚鎮建業。……凰皇元年秋八月，征西陵督步闡。闡不應，據城降晉。遣樂鄉都督陸抗圍取闡，闡眾悉降。闡及同計數十人皆夷三族。｣
• 陳壽。〈吳書：陸遜傳 — 陸抗傳〉. 《《三國志》》。｢鳳皇元年，西陵督步闡據城以叛，遣使降晉。……抗遂陷西陵城，誅夷闡族及其大將吏，自此以下，所請赦者數萬口。｣
• 許嵩。"卷第三校勘記". 《《建康實錄》》。｢九月，西陵督步闡上表，請徙都武昌，後主納之。鎮西將軍陸凱見揚土百姓泝流供給為患，又時政多謬，黎元窮匱，乃進表諫帝，言：『武昌土地，危險磽埆，非王都安國養民。故先帝嫌之，遷都於此，且黃龍初有謠云：｢寧歸建業死，不就武昌居。｣ 今陛下動，不遵先王之法，而複苦……是月，西陵督步闡反，降晉。……步闡字仲思，丞相騭次子。以功封西陵亭侯，繼業督西陵。至是，後主征入為繞帳督。闡以累世在西陵，卒見徵命，自以為失職，懼讒，乃不應召，據城降晉，使兄子璇往洛陽為質。後主遣大將軍陸抗討擒之，夷三族。……鳳皇初，步闡以西陵降晉，抗率諸將大破晉軍而梟闡首。｣ {{cite book}}: External link in |chapter= (help)