杜預

出自維基百科,自由嘅百科全書
跳去: 定向搵嘢
杜預
晉朝 官員、將領
勢力 曹魏西晉
222年[註 1]
京兆杜陵
285年[註 1]
鄧縣
活躍時期 255年~285年[註 1]
前任 杜恕(豐樂亭侯)
繼任 杜錫(當陽縣侯)
老豆 杜恕
仔女 杜錫
杜耽
杜尹
遞啲名
元凱
諡號 成侯
其他名 杜武庫

杜預粵拼dou6 jyu6222年285年[註 1]),字元凱jyun4 hoi2),京兆杜陵人(而家陝西西安東南),原本係三國曹魏嘅人,晉朝建立後改爲入仕西晉,係西晉緊要嘅文臣、武將。因爲才藝多樣,時人稱爲杜武庫dou6 mou5 fu3)。佢出身自京兆杜氏,佢阿爺係曹魏名臣杜畿,老豆係杜恕

杜預嘅才能文武兼全,外加佢有平定東吳嘅功勞,結束三國局面,因爲寫入小說《三國演義》而有好多人知道佢。杜預當時亦係位文官,係個有好多計策嘅經濟家,佢劃定政策,幫晉朝變得富強。

小史[編輯]

杜預係杜畿嘅內孫,杜畿做過三國時曹魏嘅尚書僕射。杜預老豆係杜恕,曾做過幽州(而家北京一帶)刺史。

杜預自少年時就才兼文武。佢學問淵博,經常自豪噉講:

立德呢樣嘢我唔敢諗,不過立功名於後世我就做得到。(德不可以企及,立功立言可庶幾也。)

杜預幾沉迷左丘明嘅書《左傳》,經常帶佢喺自己身邊。當佢去埞,佢經常喺自己馬上帶書,所以啲人話杜預有「左傳癖」。

杜恕因爲同魏國權臣司馬懿有矛盾,令佢收監入獄,雖然之後放返出來,但貶爲庶人,死喺流放地。由此喺一段長時間內,杜預唔得曹魏朝廷重用。

魏時任官[編輯]

喺司馬懿同佢嘅仔司馬師死後,司馬師嘅細佬司馬昭繼任攬權,繼位晉王。杜預娶咗司馬昭嘅妹高陸公主,令佢起用爲尚書郎,繼襲阿爺嘅爵位豐樂亭侯,之後轉做相府軍事。

263年,杜預喺鍾會領下去打蜀漢,任職鎮西長史。264年頭,鍾會滅蜀漢之後,又謀反司馬昭,結果被殺。杜預諗計令佢自己甩到罪。

文官[編輯]

制定法律[編輯]

265年,司馬昭嘅仔司馬炎頂替老豆做晉王,之後廢咗魏元帝曹奐,創立晉朝,即位晉武帝。

杜預共將軍賈充參加制定律例,之後佢自己做註解,上奏朝廷。佢強調法律嘅根本係:

  • 法律必須「直」(直接)同「簡」(簡單),詞語必須明白到啲平民好易曉,知道有乜嘢唔犯得。啲嘢明白,噉違犯嘅人少咗,亦就減少咗刑罰。
  • 法律必須符合分級清晰嘅要求。

佢嘅意見畀人接受,部法律亦得頒佈用喺全國。泰始律喺268年頒行,有20篇、620條,係按住儒家學說嘅原則制成嘅法律。

組織人事[編輯]

晉朝初頭時,杜預任職河南尹。佢注重將京都建設成朝廷嘅民衆教化中心。之後,佢交付任務去撰草文本來察覈官吏嘅升降。杜預分析之前各時期各種察覈方法嘅優、弱點,之後佢指出話:爲咗評估官員優劣,最好方法係設專門嘅考覈官。

具體做法係:每年各個官吏組織薦舉出優秀嘅人,記爲「優」,再搵出差嘅人記爲「劣」,然後上奏畀朝廷知。連續六年後,上級機關總結出人選。連續六年攞到「優」嘅人會提拔到更高;連續六年攞到「劣」嘅人會免任;六年中優多過劣嘅人會繼續喺原位任職;劣多過優嘅人會降到下級。

國家建設[編輯]

晉武帝任用杜預做度支尚書[註 2]。佢上奏畀武帝,主張「立藉田,建設邊界地方,討論處理軍隊、國家嘅關重事務」。

佢督促啲人去做水利工程,起糧庫,定價五穀,調整食鹽轉運,制定稅收法律。佢提出超過50條嘅建議,都得武帝批準。

佢睇嗰陣時嘅曆法唔夠正確,唔符合太陽嘅軌道,佢奏呈畀武帝一份《二元乾度曆》。呢份曆法後尾流行得好開。

佢又話喺孟津區域(喺黃河邊),水勢險到啲好易反,由於噉,佢奏請武帝喺富平過河。雖然有反對意見,不過杜預仲係捍衛自己嘅觀點。晉武帝批準咗起橋。橋起好咗,皇帝同各位官員走來橋度視察飲酒。武帝舉起酒盞,讚揚佢話:

若無咗卿,點會有呢條橋呢!(非君,此橋不立也。)

278年秋天,個天落咗好多日蝗蟲四處橫行成蝗災。杜預奏書講清農業嘅艱難情形,提出分3萬5千隻水牛畀受緊天災嘅地方來耕田用。

由於佢貢獻咗好多大計策畀晉朝,當時命名杜預做「杜武庫」,意思上讚佢淵博、聰明過人。

武將[編輯]

反間吳國[編輯]

晉武帝登基喺三國末年,嗰陣時蜀漢已經滅咗。南邊只得番弱過晉朝嘅東吳。吳帝係孫皓,佢殘暴,好失人心;不過,東吳有長江險阻。因爲噉,喺朝廷,除咗少數人如羊祜、杜預同張華有意想打吳國外,大部分人都驚咗戰爭而唔贊成。

大將羊祜喺朝中揸兵權,多次提議打吳國,但啲大臣未想出兵住。過咗多年後,羊祜老咗病咗,死之前羊祜薦舉杜預畀晉武帝。武帝聽咗,封杜預做平東將軍。到羊祜死時,佢封做鎮南大將軍、都督荊州諸軍事,頒畀佢追鋒車。

杜預去到邊關,集中操練軍士,揀出精銳。之後杜預出兵打頭一場仗,利用吳將張政防備疏忽,打贏吳軍。

張政係東吳名將,輸咗場仗好醜,於是輸咗嘅信息唔敢報畀吳主孫皓。杜預知咗件事,於是派人帶從張政度攞到嘅戰利品畀孫皓。孫皓好憎於是罷職張政,派武昌嘅劉憲換低佢。

完成準備後,杜預上書畀晉武帝,求佢起大軍打吳國來統一中國。佢分析明來聽:

「……而家敵軍只集中防守(長江)下游,而忽略上游……賊勢已窮,無得守得全呢兩處。佢哋無可能畀西面增兵,噉會令京都空虛。呢個係破吳嘅好機會……」

晉武帝批準杜預嘅奏本。不過,晉帝無畀佢遞啲大將如王濬做總指揮,而係派寵臣賈充做大都督。

消滅東吳[編輯]

279年12月[註 3],20萬晉軍分六路從水、陸進攻東吳。杜預帶勁軍自襄陽南下到江陵。

280年正月,杜預喺江陵駐軍。佢分軍包圍而唔進攻,佢自上游斬斷吳軍嘅退路,又自下游斷咗吳軍嘅進路。另外,佢派參軍樊顯、尹林共太守周奇引軍沿江西進,打入城邑,佔得啲城。

之後杜預派周旨、伍巢半夜帶軍配合王濬打樂鄉城。吳國都督孫歆好慌,精神紊亂。孫歆帶軍出去打王濬,但敗陣,走夾唔唞。周旨佈置伏兵,溝入敗走入城嘅吳軍,侵入樂鄉城,直至孫歆嘅帳下,生擒孫歆。

樂鄉嘅主將被捉,吳軍大亂。杜預落令加緊圍困江陵。吳將伍延派人詐降,喺城度秘密佈置軍兵來偷襲晉軍,但唔得。杜預督促晉軍強攻入城,消滅吳軍,佔據江陵。

東吳上游嘅防守綫無咗,自長江到湘江、廣州嘅各地方都陸續畀晉軍接收。將領王濬嘅大軍進入建業,生擒孫皓。不過,王濬貪功,上奏朝廷話佢自己攞到都督孫歆嘅頭。之後杜預帶孫歆返來,個個人先知咩回事,喺京城洛陽嘅人都笑呢件事。

杜預將吳人將士同埋佢哋啲家眷搬去江北來補充入嗰度嘅人口。佢又任命啲人喺南郡做長史,來睇住啲地方。晉朝新入手嘅地方好快回復穩定。

戰後計策[編輯]

杜預凱還,封做當陽縣侯,食邑9600戶。佢嘅仔杜耽亦得封做亭侯。

返咗襄陽後,佢上奏武帝話自家代代做文官,只有佢做武官,所以想辭職,但武帝唔准。

中國一統喺晉朝手中。杜預繼續實現一系列計策來發展國家。佢話:「天下雖已安穩,但戰爭危機唔係冇」(天下雖安,忘戰必危)。佢實施呢啲主張:

  1. 繼續訓練軍士,起多啲學堂。結果佢鎮治嘅江漢地方教化得好廣。
  2. 起啲營寨保衛邊疆,注重啲重要嘅地方。
  3. 造水利淋田,割地分區,畀啲人耕,令人民同朝廷共同有利。
  4. 開楊口水路。之前只有自沔漢到江陵嘅水路,過一千里。想北上時只能徒步。杜預開咗條自夏水到巴陵長超過一千里嘅河路,噉啲人行過時減少咗長江嘅險阻,自桂州到京都運載糧食嘅路亦得開通。

由於呢啲功勞,當時南中國嘅人民感恩佢,嗌佢做「杜父」。佢哋仲作出歌仔歌頌杜預:

後世無叛由杜翁,孰識智名與勇功。(後世人咁安穩都係杜翁功勞,邊個識佢才智過人、功勞大呢!)

當時杜預係個盡心公事嘅人。提出嘅意思定咗,佢會堅決實現佢,經常檢查多次,所以做嘢好少失敗。

晉朝朝廷喺統一中國後,皇帝掛住享樂,對於平吳一事將領王濬、王渾爭功,互相打擊。杜預喺南方鎮守,多次派人帶錢銀去賄賂朝中權貴。有人問佢點解噉做,佢答:

我驚畀啲人陷害,唔係想𠱁權貴。(吾但恐為害,不求益也。)

285年,杜預死,虛壽63歲。晉武帝追贈佢做征南大將軍、開府儀同三司,謚號「成」。

睇埋[編輯]

參攷資料[編輯]

  • 房玄齡. "列傳第四:杜預傳". 《晉書》. 
  • 陳壽(著);裴松之(注). "魏書 — 任蘇杜鄭倉傳:杜恕傳". 《三國志》. 詔封恕子預為豐樂亭侯,邑百戶。……預字元凱,司馬宣王女婿。王隱晉書稱預智謀淵博,明於理亂,常稱「德者非所以企及,立功立言,所庶幾也」。大觀群典,謂公羊、穀梁,詭辨之言。又非先儒說左氏未究丘明意,而橫以二傳亂之。乃錯綜微言,著春秋左氏經傳集解,又參考眾家,謂之釋例,又作盟會圖、春秋長曆,備成一家之學,至老乃成。尚書郎摯虞甚重之,曰:「左丘明本為春秋作傳,而左傳遂自孤行;釋例本為傳設,而所發明何但左傳,故亦孤行。」預有大功名於晉室,位至征南大將軍,開府,封當陽侯,食邑八千戶。 
  • 房玄齡. "志第十六:食貨志". 《晉書》. 杜預上疏曰:……東南以水田為業,人無牛犢。今既壞陂,可分種牛三萬五千頭,以付二州將吏士庶,使及春耕。 
  • Trịnh Phúc Điền, Khả Vĩnh Quyết, Dương Hiệu Xuân(字未定,僅參攷:鄭福田、可永決、楊號春) (2006年). "卷一". Tướng soái cổ đại Trung Hoa(漢喃:將帥古代中華;中譯:中華古代將帥) (用越南文寫). 青年出版社(Nhà xuất bản Thanh niên家出版青年). 

[編輯]

  1. 1.0 1.1 1.2 1.3 據《晉書》嘅《武帝紀》,杜預死於太康五年閏十二月,據兩千年中西曆轉換,對應嘅西曆係285年1月23號到2月21號之間。而據《晉書》嘅《杜預傳》,佢享年虛歲六十三歲,亦即西曆生年約喺222年。255年係司馬昭上臺執政嘅年份,之前杜預由於老豆嘅帶罪身份,累及佢唔受委任,喺同司馬昭嘅妹結婚後,佢就因此獲得官職,所以杜預約喺255年後開始活躍。
  2. 度支尚書似而家嘅財政部長,負責預算支出。
  3. 晉滅吳之戰開始於晉咸寧五年十一月(農曆),查兩千年中西曆轉換,當年農曆十一月開始於西曆279年12月21號,到280年1月18號止。