龐淯

出自維基百科,自由嘅百科全書
跳去: 定向搵嘢
龐淯
曹魏 官員
遞啲名
子異

龐淯(淯讀玉,粵拼pong4 juk6;?—?),字子異zi2 ji6),酒泉表氏人[註 1],係東漢末年、三國初年曹操呢派軍閥嘅官員。

生平同事蹟[編輯]

龐淯阿媽係龐娥親,喺嗰時係有名嘅烈女。

初頭龐淯做涼州從事,擔任職務係破羌長(破羌縣屬涼州金城郡)。當時武威太守張猛造反,殺咗涼州刺史邯鄲商,落令話邊個敢去弔喪邯鄲商,佢就殺邊個。龐淯聽咗之後,放棄官職,日夜趕程,去到邯鄲商被害嘅地方哭喪;然後收埋匕首喺身去搵張猛,諗住見到就殺佢。張猛睇龐淯係義士,落令唔準害佢,於是龐淯忠烈嘅名聲揚咗開去[1]

之後,酒泉太守徐揖請龐淯做主簿。嗰陣時啲強豪作亂,佢哋慣開隱瞞地頭上戶籍嘅壯丁數,以此漏稅來對抗政權。徐揖猛烈鎮壓郡中嘅黃氏強豪,不過黃家嘅一個成員黃昂因爲喺遞處而逃脫甩,集合咗過千人包圍郡城。龐淯離開咗老婆仔女,趁夜跳出城去外,去張掖、敦煌呢兩個郡求援兵。開頭呢兩個郡懷疑強豪件事,以呢個理由推託唔出兵。龐淯諗住自殺畀佢哋睇,於是感動到佢哋,應承出軍救助,但嗰陣酒泉郡城已經破咗,徐揖亦都被害。龐淯幫徐揖收屍,送返去鄉下,爲佢守三年喪。曹操聽到呢啲事,召佢做掾屬[2]

曹丕稱帝後,拜龐淯做駙馬都尉,然後升做西海太守,又封爵關內侯。之後召佢返來,拜做中散大夫。唔清楚龐淯幾時過身,過身後佢嘅仔龐曾繼承咗爵位[3]

參攷資料[編輯]

[編輯]

  1. 而家係甘肅張掖高臺縣駱駝城鄉。

[編輯]

  1. 陳壽. "魏書:二李臧文呂許典二龐閻傳 - 龐淯傳". 《三國志》. 初以涼州從事守破羌長,會武威太守張猛反,殺刺史邯鄲商,猛令曰:「敢有臨商喪,死不赦。」淯聞之,棄官,晝夜奔走,號哭喪所訖,詣猛門,衷匕首,欲因見以殺猛。猛知其義士,敕遣不殺,由是以忠烈聞。 
  2. 陳壽. "魏書:二李臧文呂許典二龐閻傳 - 龐淯傳". 《三國志》. 太守徐揖請為主簿。後郡人黃昂反,圍城。淯棄妻子,夜逾城出圍,告急於張掖、敦煌二郡。初疑未肯發兵,淯欲伏劍,二郡感其義,遂為興兵。軍未至而郡城邑已陷,揖死。淯乃收斂揖喪,送還本郡,行服三年乃還。太祖聞之,闢為掾屬。 
  3. 陳壽. "魏書:二李臧文呂許典二龐閻傳 - 龐淯傳". 《三國志》. 文帝踐阼,拜駙馬都尉,遷西海太守,賜爵關內侯。後徵拜中散大夫,薨。子曾嗣。