丁奉
| 丁奉 | |
|---|---|
 | |
| 東吳 將領 | |
| 死 | 271年 |
| 活躍時期 | 252年～271年 |
| 仔女 | 丁溫 |
| 遞啲名 | |
| 字 | 承淵 |
丁奉（粵拼：ding1 fung6；？—271年），字承淵（sing4 jyun1），廬江安豐人（而家河南固始），三國時期東吳要將。佢嘅細佬係丁封，有仔丁溫，都一齊做東吳將領。後生嗰時做小將，多次跟其他將領征伐，時時勇冠三軍，曾隸甘寧、陸遜、潘璋等人帳下，又驍勇又有計謀。後期解救壽春、誅殺孫綝，多次立功，從小將位置長成爲大將軍。
生平[編輯]
丁奉出世喺廬江安豐（而家河南），佢開始自己嘅事業係憑住喺吳軍嘅服役，喺甘寧領下做個隊長小將，之後又轉屬過陸遜、潘璋。喺各個戰陣，佢都衝鋒打頭、戰鬥到好㷫，立低幾多戰功榮譽。之後丁奉做偏將軍，成爲三國時武將之一。佢自孫權時歸附孫吳，孫權死後佢歸附孫亮同孫休（喺《三國演義》中一路同員將徐盛一齊帶軍，但史實係徐盛好早過身）。
252年，孫亮即位，丁奉做冠軍將軍，封爵都亭侯。當年發生東興之戰，魏國派諸葛誕、胡遵打東興，吳國派諸葛恪帶軍上陣。當時諸將認爲，敵方聽聞諸葛恪來咗，自然會走夾唔唞，唯有丁奉話：「唔啱。對方動用佢境內許都、洛陽嘅大軍攻來，一定做咗計劃，點會無收穫就走呢？咪以爲敵人唔來，應該諗做好準備來打贏佢哋。」諸葛恪上咗岸後，丁奉同將軍唐咨、呂據、留贊一齊延山向西行。丁奉話：「而家我哋各位行遲咗步，若果敵方佔據地利，則好難同佢爭。」爲咗行快啲，佢自己帶住三千人抄近路。當時打北風，丁奉帶住三千人用咗兩日先佔據咗徐塘。當時天氣凍落雪，敵方將領開酒會，丁奉見佢前營兵少，對佢班部下講：「封侯獲賞，就喺今日！」於是叫士兵將重甲換成輕裝，帶短兵器上陣。敵人見到都笑，無防備佢哋。丁奉領兵突擊，破開前營陣線。啱好呂據大軍來到，魏軍潰敗。之後丁奉晉升爲滅寇將軍，封爲都亭侯（一說都鄉侯）。
255年，魏將文欽起事失敗投降吳國，丁奉任命爲虎威將軍，同孫峻去壽春接文欽，喺高亭同魏國追兵打。丁奉帶矛上馬，衝入陣中，斬首數百，繳獲軍器。之後封爲安豐侯。
256年農曆十月，孫峻死後，孫綝同呂據相鬥，孫綝落令畀丁奉同孫綝堂兄孫憲、施寬坐船去佔據江都，去討伐呂據。
257年，魏大將諸葛誕喺壽春投降吳國，魏軍包圍壽春。吳國先係派朱異、唐咨去救佢，然後派丁奉、黎斐去解圍。丁奉喺黎漿屯兵做前鋒，因爲戰功拜做左將軍。
258年，孫休即位。孫休同張布密謀誅殺權臣孫綝，張布話：「丁奉雖然唔擅長行政，但個人有智謀，可以成大事。」孫休召丁奉話：「孫綝作爲權臣權傾一時，會圖謀不軌，想同將軍你一齊誅殺佢。」丁奉話：「孫綝啲兄弟友黨好多，驚人心唔同，冇辦法一下子制服佢，可以喺臘會時，用陛下嘅親兵誅殺佢。」孫休用咗佢條計，喺會上請咗孫綝，而張布同丁奉向左右使眼色，當場誅殺咗孫綝。於是丁奉遷任大將軍，加持爲左右都護。永安三年（260年），假節領徐州牧。
263年，司馬昭嘅將領鄧艾去打蜀國，劉禪派人去東吳求救（演義寫爲諸葛亮嘅仔諸葛瞻寫信求救），老將丁奉帶軍去救蜀，辦法係帶軍去攻擊壽春，來牽扯魏軍，但救蜀唔成功。之後嘅吳主係孫皓，丁奉遷任右大司馬、左軍師。寶鼎三年（268年），孫皓命令丁奉同諸葛靚一齊去打合肥嘅司馬駿，丁奉同晉國嘅大將石苞通信，傾下閒偈，石苞因此撤職。建衡元年（269年），丁奉又帶兵去徐塘，去進攻穀陽。穀陽啲百姓知道咗後走曬，丁奉乜都得唔到。孫皓一嬲斬咗丁奉嘅導軍。
建衡三年（271年）丁奉過世。丁奉因爲有功而顯貴，逐漸爲人驕矜自傲。於是身後有啲人誹謗佢，於是孫皓追究穀陽件事，流放丁奉屋企人去臨川。
演義中就寫孫皓爲君荒淫，於是畀晉國討伐，司馬炎派杜預打東吳，嗰陣時丁奉已死，於是無咗骨幹，噉樣嘅因素合埋一份令東吳好快滅亡。
喺三國演義[編輯]
喺三國演義，丁奉爲將時，佢受命同徐盛帶軍去追劉備同孫夫人嘅車隊，嗰陣劉孫二人諗定走返去荊州。就喺嗰陣時，孫夫人喺車度惡鬧丁奉同徐盛，丁徐兩個人都驚咗，放條路畀佢哋過。
喺呂蒙追殺關羽場仗度，丁奉共徐盛係共同追擊關羽嘅將領，佢哋夾份整到關羽戰死。丁奉嘅軍伏喺山坑，佢哋自山坑以撘（dap6）地氣勢衝出，角鼓震天，圍困關公來打。
睇埋[編輯]
參攷資料[編輯]
- 陳壽（著）；裴松之（注）. 〈吳書：程黃韓蔣周陳董甘凌徐潘丁傳 — 丁奉傳〉. 《《三國志》》.
- 陳壽（著）；裴松之（注）. 〈吳書：三嗣主傳〉. 《《三國志》》.
（太平元年）冬十月丁未，遣孫憲及丁奉、施寬等以舟兵逆據於江都。