孫策

孫策（粵拼：syun¹ caak³；175年—200年），字伯符baak³ fu⁴，吳郡富春（而家浙江杭州富陽）人。

事業

孫策阿爸孫堅喺佢17歲嗰時（191年）喺荊州中黃祖埋伏而傷重死亡，之後吳家大業就由年輕嘅孫策接管。孫策為喪父一事懷恨在心，為咗據有部隊同領地繼而為父報仇，多次喺袁術答應下幫助作戰，但係袁術多次反悔，最後終於親自率領阿爸舊部去江東，脫離袁術。由於孫策豪爽正直嘅性格，容易周圍結交豪傑，所以先後同周瑜、張紘相識，同周瑜結拜為兄弟。

197年，孫策終於建立咗自己嘅武裝力量同埋根據地，東山再起，得到其他軍閥同東漢朝廷嘅認可。

198年，東漢朝廷封孫策為吳侯，拜討逆將軍。

199年，孫策率軍大敗宿敵黃祖，同阿爸報仇。

200年，孫策喺出去打獵的時候被許貢嘅門客刺殺，冇幾耐傷重死咗，終年二十六歲。孫權做皇帝之後，追諡孫策「長沙桓王」。

屋企

孫策係孫堅大仔，有四個細佬，由大到細分別係孫權、孫翊、孫匡、孫朗。

孫策有愛妻大喬。

孫策有一仔兩女：

• 孫紹，先封吳侯，後改封上虞侯。
• 大女係朱紀嘅老婆。
• 細女係陸遜嘅老婆。