孟獲

孟獲
地方豪強
遞啲名

孟獲（粵拼：maang6 wok6；生卒年不詳），三國時期益州建寧郡人。佢係蜀漢南方南中一帶嘅豪強（喺而家中國雲南一帶），入過雍闓嘅叛軍，後尾投降蜀漢，官至御史中丞。

喺三國演義度，孟獲講成係南蠻首領，佢聯合南方各部落侵擾蜀漢，最後由諸葛亮出馬收復咗佢。其中呢個收復過程係個好出名嘅古仔，叫做「七擒七縱孟獲」，即係話諸葛亮捉咗孟獲七次咁多，然後次次又放過佢，而諸葛亮噉樣做嘅目的係想令孟獲心服口服，最終令蜀漢南邊安定無事。喺七擒七縱之後，孟獲卒之臣服於蜀漢。

不過雖然小說入面係噉寫，不過喺正史入面，孟獲係漢人而非咩南蠻頭目。實際上佢係當地一方豪強，喺當地人度有好大嘅號召力。喺劉備死咗後，益州大族雍闓反叛，孟獲亦都侵埋去，最終要蜀漢出兵鎮壓。225年，雍闓殺咗，孟獲重喺度反抗，最後諸葛亮南征令佢服曬，而諸葛亮無屯兵喺雲南，而命令孟獲管理南方，因此最後佢做到御史中丞呢個官。

喺小說入面重寫咗孟獲嘅老婆祝融夫人同埋一系列嘅南中人物，不過呢啲都係小說爲咗豐富情節而創作嘅，喺史書度完全無根據嘅。至於七擒七縱，雖然諸如有一啲史書真係有寫，就連《三國志註》、《資治通鑒》都有記，不過而家嘅史家認爲，七擒七縱嘅地方彼此距離遠，雲南地方嘅地形又複雜，行軍再神速都唔會話食生菜咁易，而且個古仔係話諸葛亮春天出征，十二月就班師回朝，而喺當時去趟雲南都要三四個月，更加無可能短時間內喺呢七個地方打仗，所以而家認爲七擒七縱似乎係民間傳說多啲。

此外孟獲亦出現喺其他嘅文藝度。比如京戲《龍鳳巾》就有佢，兼有埋佢嘅女花鬘（作嘅），就話喺南征時佢嘅女捉咗，之後同關索拉埋天窗。而喺小說《孟獲與孔明》度，佢重同孔明變咗做老友添。