龐德

出自維基百科,自由嘅百科全書
 呢篇文講嘅唔係龐德公艾茲拉龐德占士邦
龐德
講緊龐德喺樊城之戰嘅畫
曹魏 武將
建安二十四年農曆八月(219年8月28號~9月26號間)[1]
樊城
活躍時期 202年~219年
遞啲名
令明
諡號 壯侯

龐德粵拼pong4 dak1;?—219年),又寫龐悳(悳同德),字令明ling6 ming4),南安狟道人(而家甘肅武山[2],係東漢末年、三國初年嘅人,原本係馬騰嘅將員,後來成爲曹魏嗰派軍隊嘅將領。佢出名在於佢參加咗三國時嘅兩場大戰,潼關之戰(211年)同樊城之戰(219年)。

事蹟[編輯]

龐德出世喺而家甘肅,出世年未知。喺佢少時,龐德就參加入政權度做嘢,佢當時嘅官職係從事,係佢居住緊嘅州郡嘅官吏[2]。中平年間,佢跟住馬騰,喺西涼刺史令下去打擊造反嘅羌、氐族人。由於屢立戰功,之後佢升官職做校尉[2]

跟馬超平亂[編輯]

建安年間,曹操出軍去黎陽打作亂嘅袁譚、袁尚,袁譚派郭援、高幹進攻河東來分散曹操兵力。曹操舉派鎮守關中嘅司隸校尉鍾繇去平亂,要佢督率關中諸將一齊合力打高幹、郭援[3]

早先馬騰、韓遂有衝突,鍾繇寄信畀佢哋幫佢哋分析利害,要求兩邊和解,於是鍾繇同馬騰結緣。所以呢下佢提議馬騰出軍配合討伐郭援同高幹。馬騰舉馬超帶住西涼軍做督軍從事,配合鍾繇嘅朝廷軍去平陽打郭援、高幹。龐德亦得舉做馬超部將,於是跟住佢去打呢場戰役[3]

據《三國志》而知龐德斬死咗叛亂軍主將郭援。《三國志》喺《馬超傳》同《龐德傳》肯定咗兩次呢個細節,據此,肯定到龐德殺咗郭援,割咗佢首級,喺呢場仗度,龐德「做先鋒進攻郭援、高幹,大破敵軍,親手斬低郭援嘅頭」[3][4]

另外,《魏略》記低呢件事更多細節:龐德斬得一個首級,唔知嗰個就係郭援。戰局散咗後,衆人都話郭援死咗,不過搵唔到首級。郭援係鍾繇嘅外甥。之後龐德嘅箭袋度跌咗個頭出來,鍾繇認到個頭就立即喊啦。龐德同鍾繇謝罪,鍾繇話:「郭援雖係我外甥,但佢係國賊。你又據何事來同我謝罪呢?」[3]

呢場仗之後,龐德自校尉升職到中郎將,重封到爵位都亭侯[3]

繼續征戰[編輯]

之後張白騎喺弘農領導叛軍,龐德又跟住馬騰去征伐,喺兩殽攻破張白騎。每當出戰,龐德「經常衝鋒陷陣打退敵軍,勇氣喺三軍之上」[5]

之後馬騰徵去做衛尉,龐德又做返馬超嘅屬下,同馬超一齊接管軍閥軍隊[5]

潼關大戰[編輯]

內文:潼關之戰

211年,龐德同馬騰嘅仔馬超帶軍喺潼關之戰中打曹操。西涼軍佔得長安潼關,不過之後曹操反攻勝利,打敗馬超軍。龐德共馬超走佬西面[5]

喺潼關場仗度,龐德始終係西涼軍嘅勇猛員將,喺各場仗中佢一直係衝鋒打頭嘅人,係西涼軍嘅主力員將。《三國演義》就話佢正係獻計畀馬超去佔長安城嘅人。

襲擊隴上[編輯]

喺潼關失敗咗後,佢共馬超同馬岱走咗入羌人控制嘅地方,之後不斷招兵買馬準備反攻曹軍。

213年,龐德同馬超喺隴上又再起兵打曹軍,佢哋支軍好快佔據到各個緊要地點如冀城。龐德交付到任務去鎮守冀城[5]

之後,下面各個串好咗嘅漢人將領反叛馬超,同曹軍配合打擊佢,佢無曬符唯有走去漢中投軍於張魯,龐德亦跟住佢嘅主家去咗嗰度[5]

轉跟曹操[編輯]

214年,馬超投降劉備,而龐德繼續跟張魯(《三國演義》寫話因爲病咗,於是龐德重留喺漢中)。215年,曹操進攻張魯,佔咗漢中,龐德跟住張魯投降曹軍(演義中寫爲曹操進攻陽平關中文陽平關時,張魯派龐德出戰曹操,因爲佢哋以前爲敵過。曹操睇龐德有才能,於是搵計捉咗龐德,然後招降佢。龐德就噉轉跟曹操)。曹操早就聽聞龐德驍勇善戰,於是封佢做立義將軍,賜爵關門亭侯,享祿300戶民(俸祿來自收租、稅)[6]

樊城戰陣[編輯]

內文:樊城之戰
關羽捉咗將領龐德嘅景象

219年,侯音、衞開喺宛縣造反叛離曹操。龐德引領本部軍隊合埋曹仁一齊圍打宛縣,斬侯音、衞開,然後南下喺樊城駐軍,進攻關羽[7]。《三國演義》寫話曹操封于禁做征南將軍(正史中係曹仁)、龐德做征西都先鋒,于禁共龐德起七道軍進攻關羽來解圍樊城。

喺樊城嘅各將領睇龐德嘅堂哥龐柔喺漢中服務於劉備,心度都思疑佢嘅忠誠[7]

於是佢慷慨宣佈:

我已領受國恩,就義應該以死來報答。我想親征去打關羽。今年若果我無殺到關羽,必係關羽來殺我。
(我受國恩,義在效死。我欲身自擊羽。今年我不殺羽,羽當殺我。)

之後龐德親征共關羽交戰,龐德支箭射中關羽額頭。(演義中寫爲,龐德畀關羽打,喺危急關頭,佢放箭射中關羽左臂。關羽喺斬龐德之後到樊城,又畀曹仁喺右手射入有毒藥嘅箭,令到關羽要養傷,之後係刮骨療傷嘅情節。)曹仁落令畀龐德喺樊城北面十里處屯軍,嗰陣時遇到個天落咗超過十日嘅大雨,漢江嘅水變大,樊城牆腳下嘅平地水深五六丈,龐德共諸將喺堤上避大水[8]

關羽因呢個機會指揮水軍用船去襲擊,四部大船上嘅兵一齊向堤上射箭。龐德着住身甲,揸住弓箭,身手非凡噉令啲箭都射中[8]

喺關羽猛烈進攻嘅壓力下,將軍董衡同部將董超想投降,都畀龐德斬死來提高精神戰鬥[8]

場交戰打得好惡,「自朝早打到午後」,關羽更加集中軍力猛打,啲箭無曬時,關羽又用短兵器接住打[8]。龐德同督將成何講:

我聽話良將唔會驚死來苟且甩身,烈士唔會毀名節來求生,今日,係我死喺度嘅日子。
(吾聞良將不怯死以苟免,烈士不毀節以求生,今日,我死日也。)

於是決心戰鬥到最後,越打越㷫,氣勢越强猛,而啲水逐漸升高,將士都出曬降。龐德共一位員將、兩個部隊指揮長,四個人一齊走,一齊拉弓放箭,坐住一隻細船諗定走返去曹仁嘅營寨[9]

水大導致船反咗,弓箭跌咗唔見曬,只能攬實隻船喺浪度浮,之後畀關羽捉住(演義寫成係周倉捉佢嘅)。龐德雖捉咗入敵人手中,但重氣勢軒昂,企直唔下跪[9]

關羽講話:「你堂哥人喺漢中,我想用你做將,唔早啲投降係爲乜?」[9]龐德鬧關羽話:

衰仔,乜嘢叫投降!魏王百萬甲兵,威振天下。你劉備只係尋常人咋,豈有能力匹敵!我寧願做魏國嘅鬼,絕對唔會做逆賊嘅虜將。
(豎子,何謂降也!魏王帶甲百萬,威振天下。汝劉備庸才耳,豈能敵邪!我寧為國家鬼,不為賊將也。)

於是龐德畀關羽殺咗[10]。《三國演義》中寫話關羽嘅水攻計令魏軍大敗,生擒龐德。由於佢唔投降,龐德畀關羽拉出去斬頭,關羽睇佢噉心中嘆息可憐,於是佢幫佢體面埋葬。

曹操聽聞後好心痛,喊到眼淚濕濕,於是封畀龐德兩個仔做列侯。曹丕升繼王位,立即派人到龐德墓賜佢諡號[10],有詔策話:

以前先軫被殺割頭,王蠋㓤股自刎,捨棄身體來殉節,古代已經讚美。想必侯喺軍中嘅果敢剛毅已經明瞭,爲國難亡身之舉亦已成名,當時有名,於義氣高及前人,寡人十分之嘆息崇敬,而家賜諡做壯侯。
(昔先軫喪元,王蠋絕脰,隕身徇節,前代美之。惟侯式昭果毅,蹈難成名,聲溢當時,義高在昔,寡人愍焉,諡曰壯侯。)

曹丕又賜龐德嘅四個仔(當中有龐會)爵位關內侯,都得到食邑百戶。龐會有老豆嘅勇烈風度,做官到職位中尉將軍,爵位列侯。

龐德嘅墳墓[編輯]

古時史書記有龐德畀關羽殺咗,但無講明佢條屍喺邊。據王隱喺《蜀記》嘅記載,鍾會平蜀時,派一隊官樂,運龐德屍骸返鄴縣安葬,喺大墓度身首一如生前噉[11]。如果係噉,即係龐德喺畀關羽殺死之後,佢條屍體運咗返去蜀地(有層道理係報功領賞時有得升級)。

不過,史家裴松之否認呢條記載,佢查話龐德死喺樊城,文帝即位,又派使者去龐德嘅墓,噉龐德嘅屍體就唔會喺蜀地[11]

家庭[編輯]

龐德有四個仔,其中一個叫龐會,另外三人未知名。喺《三國演義》度寫話佢個老婆係李氏。之外重有堂哥龐柔,當時喺蜀地做緊官。

喺《三國演義》[編輯]

喺作品《三國演義》,龐德自第58回出現。

喺成部作品中,龐德描寫成善戰嘅員將,有氣魄,而且鞠躬盡瘁、忠誠於主。雖然投軍於曹魏幾遲(當曹操喺漢中戰役勝利時,平張魯兼且生擒龐德),不過佢自身有本事、有武術才藝,龐德好快同嗰陣時魏軍各個領頭武將平起平坐,比如許褚、張遼、徐晃、夏侯兄弟。

關於外形,喺作品度無具體描寫佢嘅外形、容貌,只有一個細嘅枝節講到:「龐德着青袍銀鎧,手揸大刀,帶白馬,企喺陣前」(第74回)。書中形象主要通過佢嘅行動、講嘢同戰功來形容。

喺電子遊戲[編輯]

龐德係好多電子遊戲嘅人物原型,特別係遊戲真·三國無雙,喺呢個遊戲度,佢設置成勇猛嘅魏派武將,喺真·三國無雙4係西涼軍嘅主攻,喺呢版遊戲度,佢設置到似中古時嘅歐洲騎士噉,着住歐洲騎士式嘅盔甲,揸住兩隻戟。喺第五、六代嘅正篇佢無出場,因爲無埞擠,不過出現喺第六代嘅猛將傳,喺第七代度繼續出現。喺第七代佢嘅武器換成狼牙棒。

睇埋[編輯]

參攷資料[編輯]

  • 陳壽(著);裴松之(注). 十八 - 魏書:二李臧文呂許典二龐閻傳 - 龐德傳. .
  • 陳壽(著);裴松之(注). 一 - 魏書:武帝紀. . (建安)七年……小子尚代,譚自號車騎將軍,屯黎陽。秋九月,公征之,連戰。譚、尚數敗退,固守。……(建安)二十四年……八月,漢水溢,灌禁軍,軍沒,羽獲禁,遂圍仁。使徐晃救之。

[編輯]

  1. 西. 中華民國中央研究院資訊服務處.
  2. 2.0 2.1 2.2 陳壽(著);裴松之(注). 書:二李臧文呂許典二龐閻傳 - 龐德傳. . 龐德字令明,南安狟道人也。〈狟音桓。〉少為郡吏州從事。初平中,從馬騰擊反羌叛氐。數有功,稍遷至校尉。
  3. 3.0 3.1 3.2 3.3 3.4 陳壽(著);裴松之(注). 書:二李臧文呂許典二龐閻傳 - 龐德傳. . 建安中,太祖討袁譚、尚於黎陽,譚遣郭援、高幹等略取河東,太祖使鍾繇率關中諸將討之。德隨騰子超拒援、幹於平陽,德為軍鋒,進攻援、幹,大破之,親斬援首。〈魏略曰:德手斬一級,不知是援。戰罷之後,眾人皆言援死而不得其首。援,鍾繇之甥。德晚後於鞬中出一頭,繇見之而哭。德謝繇,繇曰:「援雖我甥,乃國賊也。卿何謝之?」〉拜中郎將,封都亭侯。
  4. 陳壽. 三十六 - 蜀書:關張馬黃趙傳 - 馬超傳. . 騰遣超隨繇討郭援、高幹於平陽,超將龐德親斬援首。
  5. 5.0 5.1 5.2 5.3 5.4 陳壽. 書:二李臧文呂許典二龐閻傳 - 龐德傳. . 後張白騎叛於弘農,德復隨騰征之,破白騎於兩殽間。每戰,常陷陳卻敵,勇冠騰軍。後騰徵為衛尉,德留屬超。太祖破超於渭南,德隨超亡入漢陽,保冀城。後復隨超奔漢中,從張魯。
  6. 陳壽. 書:二李臧文呂許典二龐閻傳 - 龐德傳. . 太祖定漢中,德隨眾降。太祖素聞其驍勇,拜立義將軍,封關門亭侯,邑三百戶。
  7. 7.0 7.1 陳壽. 書:二李臧文呂許典二龐閻傳 - 龐德傳. . 侯音、衛開等以宛叛,德將所領與曹仁共攻拔宛,斬音、開,遂南屯樊,討關羽。樊下諸將以德兄在漢中,頗疑之。
  8. 8.0 8.1 8.2 8.3 陳壽. 書:二李臧文呂許典二龐閻傳 - 龐德傳. . 後親與羽交戰,射羽中額。……仁使德屯樊北十里,會天霖雨十餘日,漢水暴溢,樊下平地五六丈,德與諸將避水上堤。羽乘船攻之,以大船四面射堤上。德被甲持弓,箭不虛發。將軍董衡、部曲將董超等欲降,德皆收斬之。自平旦力戰至日過中,羽攻益急,矢盡,短兵接戰。
  9. 9.0 9.1 9.2 陳壽. 書:二李臧文呂許典二龐閻傳 - 龐德傳. . 戰益怒,氣愈壯,而水浸盛,吏士皆降。德與麾下將一人,五伯二人,彎弓傅矢,乘小船欲還仁營。水盛船覆,失弓矢,獨抱船覆水中,為羽所得,立而不跪。羽謂曰:「卿兄在漢中,我欲以卿為將,不早降何為?」
  10. 10.0 10.1 陳壽. 書:二李臧文呂許典二龐閻傳 - 龐德傳. . 遂為羽所殺。太祖聞而悲之,為之流涕,封其二子為列侯。文帝即王位,乃遣使就德墓賜諡……
  11. 11.0 11.1 陳壽(著);裴松之(注). 書:二李臧文呂許典二龐閻傳 - 龐德傳. . 〈王隱蜀記曰:鍾會平蜀,前後鼓吹,迎德屍喪還葬鄴,冢中身首如生。臣松之案德死於樊城,文帝即位,又遣使至德墓所,則其屍喪不應在蜀。此王隱之虛說也。〉