鄧良 (三國)

出自維基百科,自由嘅百科全書
鄧良
蜀漢 官員
勢力 蜀漢→晉朝
活躍時期 251年~晉朝年間
遞啲名

鄧良粵拼dang6 loeng4;?—?),義陽新野人(而家河南新野),係三國蜀漢嘅官員,係東漢司徒鄧禹嘅後代,蜀漢大將鄧芝嘅仔。

鄧良嘅老豆鄧芝係蜀漢後期嘅大將,封爵爲陽武亭侯。延熙十四年(251年),佢老豆過世後佢就繼承咗爵位,到景耀年間(258年~263年間)做官到尚書左選郎。

炎興元年(263年)冬天,曹魏將軍鄧艾喺綿竹打敗蜀漢嘅諸葛瞻,蜀漢後主劉禪諗住投降曹魏,於是派侍中張紹、光祿大夫譙周、駙馬都尉鄧良帶住印綬,去鄧艾軍中請降。張紹、鄧良喺雒縣同鄧艾相遇,鄧艾得到份降書十分之開心,立即發信報畀曹魏朝廷聽,嗌張紹、鄧良返去成都先。

蜀漢滅亡後歸咗曹魏,後來司馬氏篡魏,建立咗晉朝,鄧良就重新出仕,做咗晉朝嘅廣漢太守。

參攷資料[編輯]

  • 陳壽(著);裴松之(注). 書:鄧張宗楊傳 — 鄧芝傳. . 子良,襲爵,景耀中為尚書左選郎,晉朝廣漢太守。
  • 陳壽(著);裴松之(注). 書:後主傳. . 改元為炎興。冬,鄧艾破衛將軍諸葛瞻於綿竹。用光祿大夫譙周策,降於艾,奉書曰:……謹遣私署侍中張紹、光祿大夫譙周、駙馬都尉鄧良奉繼印綬……紹、良與艾相遇於雒縣。艾得書,大喜,即報書……遣紹良先還。