韓信
提示：呢篇文講嘅唔係韓王信。
韓信（前230年—前196年）係西漢開國名將，同張良、蕭何一齊叫「漢初三傑」。
早年
[編輯]早年嘅韓信好窮，有時要去人哋度黐餐或者有好心人畀嘢佢食先唔使捱餓。
從軍初期
[編輯]秦朝末年，韓信加入項梁軍，項梁死咗之後就做咗項羽嘅部下，佢曾經幾次向項羽提出計策，但項羽冇用到。
劉邦受封漢王之後，韓信離開咗楚軍，去咗投靠漢軍。韓信最初冇畀漢方重用，後尾因為涉嫌犯軍法面臨處斬，到行刑嗰陣，有十三個人已經畀人斬咗，輪到韓信嗰陣，佢見到夏侯嬰，就話：「上不欲就天下乎？何為斬壯士！」夏侯嬰聽到就覺得好奇，就放咗韓信，仲向劉邦推薦韓信，劉邦畀韓信做治粟都尉。後尾喺蕭何嘅推薦下，劉邦終於畀韓信做大將。[1]
助漢滅楚
[編輯]楚漢戰爭開始咗之後，前205年，劉邦喺彭城慘敗後，魏王魏豹離開咗漢方陣營，劉邦派韓信領兵攻打魏豹，韓信突襲魏國都城安邑，捉咗魏豹。
之後韓信打敗咗代國，然後帶住幾萬人攻打趙國，喺井陘擊敗號稱二十萬人嘅趙軍，捉咗趙王趙歇。韓信派人出使燕國，成功遊說燕王歸附漢王。
之後韓信攻打齊國，齊國向項羽請救兵，韓信喺濰水擊敗齊王田廣同楚將龍且嘅聯軍，龍且戰死咗，韓信陸續控制曬齊國嘅地方。前203年，韓信自立為「假齊王」，劉邦收到韓信嘅通知之後雖然好嬲，但係家下仲未係時候同韓信反面，就封韓信做齊王。
呢個時候項羽派人遊說韓信脫離漢王，蒯徹都勸韓信脫離漢王自立，但係韓信話漢對佢有恩而冇接納到。
前202年，韓信帶兵參與垓下之戰。項羽死後，劉邦改封齊王韓信做楚王。
被殺
[編輯]《史記·淮陰侯列傳》話項羽敗亡後，佢嘅部將鍾離眛以前係韓信老友，就投靠咗韓信。劉邦知道鍾離眛喺楚國之後，就叫韓信捉佢。之後有人向劉邦告狀話楚王韓信謀反，於是劉邦以出遊為名，叫啲諸侯嚟陳見佢，搞到韓信有啲驚，有人勸韓信斬咗鍾離眛然後去見劉邦，就可以冇事。韓信就同鍾離眛商量，鍾離眛喺自殺之前話：「漢之所以唔出兵攞埋楚，係因為眛喺你度。如果想捉我去討好漢，我今日死，你亦會跟住死。」韓信攞住鍾離眛個人頭去見劉邦，劉邦下令武士捉住韓信，之後帶佢返洛陽，降封佢做淮陰侯。前196年，呂后殺韓信，殺埋佢三族啲人。[1]
歇後語
[編輯]- 韓信點兵——多多益善