秦朝

出自維基百科,自由嘅百科全書
Jump to navigation Jump to search

秦朝係指戰國時代秦國一統中原開始直到佢亡國嘅時期,由前221年前207年,歷三位君主。

前史[編輯]

秦朝之前係周朝其中一個諸侯國秦國,喺關中平原。春秋時期嘅諸侯國因為周室衰落,冇力量維繫封建制度,所以成日發生強國兼併弱國嘅事。去到戰國時期,唔少諸侯國都變法圖強,競爭就更加激烈。其中秦國就係因為商鞅變法而變強,歷經多次戰爭而打敗其他諸侯國。而喺長平之役之後,幾乎佔有咗一半嘅天下。然而長平之役嘅主將白起喺前257年畀秦昭襄王賜死,雄才大略嘅秦昭襄王喺前251年死埋,繼位嘅秦孝文王、秦莊襄王都相繼喺三年內去世。前247年,幼主秦王政繼位,但朝政大權掌握喺秦太后同埋呂不韋手中。呂不韋擁有秦國大權,佢曾經招攬食客去編撰《呂氏春秋》,並喺前249年帶兵滅咗東周國。

戰國後期,六國入面得返趙國同楚國有能力抗秦。趙國士卒精銳,又有良將李牧,而楚國幅員遼闊,士兵眾多。為咗抵制秦國嘅侵略,楚國嘅春申君喺前241年打算聯合楚、趙、魏、韓、燕聯軍攻擊秦國嘅函谷關,但都係畀秦國打敗,楚國所以遷都壽春。秦國就乘機猛攻魏國,魏國嘅形勢緊急,但最後秦國因為國內發生咗大事而暫緩攻擊。咁係因為秦王政開始大個仔,呂不韋驚繼續同秦太后幽會會瀨嘢,就改咗搵舍人嫪毐入宮去服侍太后。嫪毐亦因為咁得寵,太后為佢生咗兩個仔,仲封佢做長信侯,可以專決到國政。前239年,秦王政嘅細佬成蟜打緊趙個陣,就因為驚咗嫪毐而投降趙國。前238年,秦王政發現咗件事,就處死咗打算作反嘅嫪毐,仲幽禁埋太后、驅除咗呂不韋入蜀(呂不韋就中途死埋)。秦王政掌權之後,聽從宗室大臣嘅建議,驅除呂不韋嘅食客(主要係三晉人)。但係客卿李斯就上書《諫逐客書》,講返外卿對秦國有咩貢獻。秦王政因而再度重用李斯,而且招攬咗尉繚、韓非等嘅外國人。尉繚有個建議,叫李斯派辯士、間諜去賄絡六國嘅名人政要,成為秦嘅線人。如果唔接受賄絡,就暗殺咗佢哋。呢個方法成功令到六國離心離德,再配合埋軍事行動,令到六國喺十年內先後畀秦國滅咗。而韓非就提倡用法家嘅「法、術、勢」三派論點為一體用嚟治國,得到秦王政嘅重視,亦都成為咗秦廷施政嘅原則。但係,韓非最後畀李斯害死,未能夠執政秦廷。

建設[編輯]

秦始皇統一全國之後,為咗溝通關中同埋其他地區,以免地方發生叛亂,於是起咗馳道同埋靈渠,實行「車同軌」(統一車軌間距)。而為咗抵禦北方嘅匈奴,秦皇就將戰國時期秦、趙、燕嘅長城連埋一齊,成為「萬里長城」。同時,為咗防範六國遺民起兵搞事,秦皇下令夷平城墩。沒收百姓嘅武器,將入面嘅銅製武器鑄成十二金人,放喺咸陽,又起咗阿房宮、興樂宮之類嘅離宮同埋驪山秦始皇陵,當中後者包括兵馬俑。但據目前嘅考古證據,阿房宮其實未起得成,但因為已經畀人燒咗,亦都無從考究。而且,為咗安定六國遺民,秦始皇五度出巡關東,進行咗封禪同埋刻石。

交通建設方面,陸路有馳道、直道、棧道、五尺道同埋嶺南新道,而水路就有溝通中原同埋嶺南嘅靈渠。秦馳道以首都咸陽為中心向四面八方延伸,加強咗關中同關東、江南等地嘅聯繫,而且當六國遺民起兵搞事個陣,秦軍都可以即刻過去處理。馳道起係平坦嘅地方,闊五十步,每隔三丈就種一棵樹,馳道嘅兩邊會用金屬錐夯築厚實。靈渠打通咗長江嘅湘江同珠江嘅灕江,溝通咗中原同嶺南地區。當百越遺民起兵搞事個陣,秦軍都可以經靈渠、灕江、珠江直達嶺南重鎮番禺(今廣東廣州)平亂。