戰國

  想搵第二個意思嘅話，請睇戰國 (搞清楚)。

  提示：呢篇文講嘅唔係戰國 (日本)。

戰國版圖

前260年時嘅戰國七雄勢力圖

前350年時嘅戰國形勢圖

戰國（粵拼：zin3 gwok3；有時喺後面加多個「時代」或者「時期」；前476年/前453年/前403年～前221年）係中國史上夾響春秋至秦代嘅一段時期。呢段時期中國本土分成幾個國，各國混戰不休。

戰國係喺春秋結束嘅第二年開始，佢同春秋夾埋就係東周時期，喺朝代上屬周朝一部分（後來周朝滅亡後有段朝代真空）。關於佢嘅開始有三種講法：一係前476年開始，呢個係《史記》分法；一係前453年開始，呢年三家滅知，當時晉國嘅知伯畀另外三家士大夫圍剿，最後晉國事實上分裂；重有種係前403年，呢年三家分晉，即係晉國正式畀三家韓、趙、魏瓜分。

「戰國」呢個名取自於西漢劉向所編注嘅書《戰國策》。國家之中以齊、楚、燕、韓、趙、魏、秦最主要（呢七國又稱為戰國七雄），另外重有衞、魯、宋、越、巴、蜀、中山等其他小國。

前256年周赧王病死，秦國攻入洛邑，西周公投降，周朝滅亡。前249年，秦相呂不韋又帶兵滅咗響鞏邑（家下河南鞏縣）嘅東周公。

後尾秦王嬴政（秦始皇）用咗十年時間，滅咗六國（韓國-前230年亡、趙國-前228年亡、魏國-前225年亡、楚國-前223年亡、燕國-前222年亡、齊國-前221年亡），統一中國。

秦滅六國

滅韓

• 前230年，秦王政派內史騰率軍突然南下過黃河，攻破韓國首都鄭（家下河南新鄭），韓王安投降，韓國滅亡。秦國響韓地起潁川郡，響陽翟（今河南禹州）起郡治。

滅趙

• 前229年，秦滅韓之後第二年，秦軍趁趙國旱災，分兩路打趙都邯鄲。
• 前228年，破趙軍，攻佔邯鄲，俘趙王，趙國滅亡。趙國公子嘉走到代（家下河北蔚縣東北），收拾好殘部自立做代王。
• 前222年，王翦個仔王賁率軍攻滅燕趙殘餘勢力，俘代王嘉。

滅魏

• 前225年，秦國將領王賁率兵出關中，攻佔咗楚國北部嘅十幾座城，保障咗攻魏秦軍側翼安全後，北上突襲重包圍魏都大梁（家下河南開封），魏軍依託大梁嘅城防工事死守，秦軍強攻對佢哋冇用，就引黃河水灌入城入便。三個月後，大梁城被水浸壞，魏王假投降，魏國滅亡。秦響魏國地區起碭郡。

滅楚

• 前226年，秦王派李信同蒙恬帶20萬軍打楚，楚將項燕帶軍抵抗，秦軍攻下平興（家下河南汝南縣東南）、寢（家下河南沈丘縣東南）進兵到城你（家下河南寶豐縣東），項燕反擊，打贏秦軍，李信打輸走咗。
• 前225年，秦王叫老將王翦帶60萬大軍再打楚，兩軍響陳相遇，王翦以逸待勞，按兵不動。
• 前224年，楚軍多次挑戰，秦軍唔同佢打，項燕就帶兵東歸，秦軍趁楚國撤退嗰陣打佢，並喺蘄大敗楚軍，又強過淮水，去到楚都壽春（家下安徽壽縣）城下。
• 前223年，秦軍乘勝追擊，攻佔楚都壽春，俘虜楚王，楚國滅亡。秦響楚地起九江郡。項燕敗走到長江南邊，立昌平君做楚王。滅咗楚國之後，王翦大軍繼續南下，造戰船過長江，消滅項燕餘部同埋昌平君。前222年攻陷楚國南部會稽。

滅燕

• 前228年，秦軍滅趙之後，王翦屯軍中山故地，準備下一步打燕國。
• 前227年，燕太子丹派荊軻去秦國，準備用獻督亢嘅地圖同秦國逃將樊於期嘅首級之名刺殺秦王，幻想造成秦國混亂，以化解滅亡嘅危機，結果陰謀敗露，荊軻被殺。
• 前226年，秦王用荊軻單嘢借口，派王翦帶兵打燕國，秦軍響易水打敗燕軍同前來支援嘅代軍，攻陷薊，燕王喜同太子丹率殘部走到遼東。後燕王喜殺太子丹，將佢個頭獻畀秦。
• 前222年，秦將王賁進軍遼東，殲滅燕軍，俘虜燕王，燕國滅亡。

滅齊

秦國重金收買咗齊丞相後勝，令齊國唔合縱抗秦，唔加強戰備。齊王建聽信咗後勝嘅主張。秦國滅五國後，齊王先知到秦國嘅威脅，慌忙將軍隊集結到西部邊境，準備抵禦秦軍嘅進攻。

• 前221年，秦王以齊拒絕秦使者訪齊為由，叫王賁率領秦軍伐齊，秦軍避開咗齊軍西部主力，由原來嘅燕國南部南下直奔齊都臨淄（今山東淄博北）。齊軍面對秦軍突然由北面來攻，措手不及，土崩瓦解。齊王不戰而降，齊國滅亡。秦響齊地設置齊郡同琅邪郡。