紫金山
提示：呢篇文講嘅唔係鍾山。| 紫金山 | |
|---|---|
 喺紫金山天文臺睇座山 | |
| 海拔 | 448.2米[1] |
| 位置 | 中國江蘇南京 |
| 座標 | 32°3′42.2″N 118°51′20.9″E / 32.061722°N 118.855806°E |
紫金山（粵拼：zi2 gam1 saan1；普通話拼音：Zǐjīn Shān）係位置喺中華人民共和國江蘇省南京市玄武區嘅山，標高448.2米[1]。又叫鐘山（zung1 saan1）、蔣山（zoeng2 saan1）、神烈山（san4 lit6 saan1）、金陵（山）（gam1 ling4 saan1）。
紫金山嘅名源自佢山岩泛紫色，有紫色嘅頁岩層，紫金即係紫銅，亦即純銅，銅又叫赤金，因爲座山銅色，以赤金嘅名嗌做金陵[2]。呢個就係南京雅稱金陵嘅來由，係因山立號[3]。金陵個名度，陵就係山噉解，後人冇再噉用詞，所以加多山字尾做金陵山[3]。紫金山風景好靚，自古有名，而家係中國嘅國家級景區，相當於係中國嘅國家公園。喺古代，紫金山素稱「鐘山龍蟠，石頭虎踞」，講嘅係南京城有鐘山同石頭山嘅山水形勢，所謂鐘山龍蟠，係話長江似條龍噉兜住咗鐘山，正因爲話南京地方有龍虎氣象，有定爲帝都嘅風水價值，所以南京成爲中國四大古都之一。
喺漢末時，秣陵縣尉蔣子文剿匪，戰死呢處兼葬喺呢度，啲人睇佢做呢座山嘅山神，於是有名叫蔣山。東吳時因爲孫權有祖先叫孫鐘，要避佢名諱，因而蔣山一度係正式名。孫權落葬呢度，佢係第一位葬紫金山嘅皇帝，皇陵亦隨山名叫蔣陵，民間俗稱吳王墳、孫陵崗，民國時種晒梅花，因而又叫梅花山，係中國四大梅園之一，譽爲「天下第一梅山」，現時係明孝陵景區嘅一部分。東晉時，十一位皇帝中有五位落葬紫金山（康帝、簡文帝、孝武帝、安帝、恭帝）。到明代，座山又叫神烈山，同朱元璋落葬嘅明孝陵有關[2]，朱元璋將成座紫金山列爲皇家禁區，山陽留畀自己同特許功臣，山陰賜畀其他功臣安葬。而到咗民國，呢度又有落葬孫中山嘅中山陵，因而紫金山擁有多處陵寢。汪精衛原本落葬喺梅花山，但國民政府還都後，話佢係漢奸，冇資格葬呢度，所以畀何應欽炸墳，而屍骨喺清涼山火化揚灰，汪墓嘅原位起咗觀梅軒。
話南京有帝都氣象嘅事好早就有，傳說話喺秦代，因爲睇到紫金山有紫氣昇，紫色喺古代係帝王高官嘅顏色，啲人話嗰度將來會出天子，秦皇自然唔想有人搶佢位，於是想搞衰金陵嘅風水，鑿穿座山，挖咗條河，呢條河係秦朝挖嘅，於是叫秦淮河，按風水講法，座山鑿崩咗，而秦淮河彎彎曲曲，歷代係煙花之地，叫做紅顏禍水禍君王，就噉樣令南京風水唔好。民間一直笑談話，定都南京嘅王朝之所以都風雨飄搖、唔長命，就係個風水畀秦皇搞禍咗。秦皇除咗壞佢風水，仲改金陵地名做秣陵，秣嘅意思係餵馬嘅草料，改名來貶低呢度[4]。
紫金山係中山陵、明孝陵、靈谷寺呢啲觀光地嘅位置所在。喺紫金山設置咗全長2350米嘅觀光吊車[5]，可以喺吊車度見到明孝陵、中山陵、靈谷寺。向山頂徒步時，可以利用紫金山東西兩麓做起點嘅山道。喺山頂整備有山頂公園，可以從山頂一下子望曬南京市內。
另外，喺山麓嘅站同山頂站之間有個紫金山天文臺站，嗰度可以去紫金山天文臺，呢個天文臺以發現多粒彗星同小行星而有名。
交通
[編輯]喺紫金山索道有巴士站，嗰度經停4條巴士綫：遊3路、20路、203路、315路（據2017年6月4號查）[6]。
攷
[編輯]- ↑ 1.0 1.1 〈測繪局公佈盤山等第二批31座著名風景名勝山峰高程新數據〉。《中華人民共和國中央人民政府》。2008年9月28號。喺2017年5月27號搵到。
- ↑ 2.0 2.1 張新國 (2015年)。《名勝趣談》。南文博雅。
- ↑ 3.0 3.1 〈南京名稱「金陵」的由來〉。《通南京網》。2012年7月21號。原著喺2016年7月26號歸檔。喺2017年5月27號搵到。
- ↑ 《建康實錄》。｢望氣者云：『五百年後金陵有天子氣。』因鑿鐘阜，斷金陵長隴以通流，至今呼爲秦淮。乃改金陵邑爲秣陵縣。｣
- ↑ 〈紫金山索道 1年後再見〉。《新浪香港》。2016年4月8號。喺2017年5月31號搵到。
{{cite web}}: CS1 maint: url-status (link) - ↑ 〈紫金山索道公交車站〉。《公交網》。喺2017年6月4號搵到。