鏡泊湖

出自維基百科,自由嘅百科全書
Jump to navigation Jump to search

座標: 43°48′55″N 128°53′15.7″E / 43.81528°N 128.887694°E / 43.81528; 128.887694

Disambig.svg
呢版講嘅係地球上嘅湖,想搵土衞六同名嘅湖,睇下【鏡泊湖 (土衞六)】;想搵撤銷咗嘅同名政區,睇下【鏡泊湖市】。
鏡泊湖毛公山

鏡泊湖粵拼geng3 bok6 wu4)係位於中國黑龍江省寧安縣嘅天然湖,地處完達山區,離中國同朝鮮嘅國界幾近,隔咗個延邊州。鏡泊湖係堰塞湖,係由4800年前火山爆發,啲熔岩塞住咗牡丹江上游河道,於是積水成湖[1]

鏡泊湖好大,南北長45公里,東西最闊6公里,最窄300米,一般闊500~1000米,湖水面積79.3平方公里,平均水深40米,個湖北深南淺,最淺得1米[2],湖北部有最深水位達70米,儲水量約16億立方米[1][3]。呢個湖係高山堰塞湖,海拔353米[3],因爲多山,湖岸綫好曲折,號稱「百里長湖」。憑住接近80 km²嘅湖面,鏡泊湖係中國最大嘅堰塞湖,亦係世界第二大嘅高山堰塞湖[3][4]

[編輯]

「鏡泊湖」嘅名出自《明志》,意思係話佢水平如鏡,《吉林省分圖》透過官話諧音,寫成鏡波湖geng3 bo1 wu4普通話拼音:Jìngbō Hú,「鏡泊湖」拼音:Jìngpò Hú)[5]

《新唐書》叫湄沱湖mei4 to4 wu4),清代時叫畢爾騰湖bat1 ji5 tang4 wu4滿文ᠪᡳᠯᡨᡝᠨ穆麟德Bilten,義「水澤、水淀」[6];普通話拼音:Bì'ěrténg Hú)[註 1][5]。有攷據認爲,根據「湄沱」嘅中古漢音,有可能係轉音自古代滿洲話[註 2],呢個詞嘅現代滿文係ᠮᡝᡳᡨᡝ(穆麟德:meite),意思係「截」[5]。換言之,「湄沱湖」嘅意思可能係「截住嘅湖」,啱好鏡泊湖又真係熔岩堰塞湖。而又考證,滿文嘅「Bilten」可能亦係轉自「meite」,首先「b」同「m」有轉換關係,即係「b」塞化自「m」;然後經過緩讀增音,加咗音素;接住作爲當地一大自然地標,bilten諧成水體通名,有咗「水澤」嘅意思[5]

因爲鏡泊湖係牡丹江嘅組成部份,所以有時江名亦係湖名。比如鏡泊湖又叫過湄沱河忽汗海。其中「忽汗海」嘅「海」可能係「河」嘅漢文古音嘅再轉,將佢指稱去「鏡泊湖」可能係按照現代語言理解嘅結果[5]

[編輯]

鏡泊湖地區西北部有火山群,一百萬年前開始不斷噴發,以致形成百餘里長嘅玄武岩臺地。火山最後一次噴發係4800年前,呢次嘅熔岩塞住牡丹江河道,於是形成鏡泊湖,之外重形成小北湖、鑽心湖、鴛鴦池等一系列大大細細嘅堰塞湖[1]

鏡泊湖地處中國東北,長期係各個漁獵民族嘅領地。渤海國時期,遷都到呢度一帶,設置嘅五京十五府六十二州當中,呢度屬上京龍泉府嘅湖州。渤海亡國後,屬過遼國金國等。

滿洲國成立、日本勢力佔據當地後,鏡泊湖一帶多咗好多日本人,佢哋係日本派去滿洲嘅漁農開拓團,入殖鏡泊湖嘅叫秋田漁業開拓團,喺康德六年(1939年)入殖,呢個日本開拓團來自秋田縣[8]。佢哋喺當地調查研究,開發森林、發掘古蹟[9],起咗總容量3.6萬千瓦嘅水電廠,供電畀牡丹江、延吉[10]。1940年代到1950年代間,有俄羅斯正教會古儀式派嘅信徒(白俄人)喺鏡泊湖一帶度住,佢哋屬無僧派之中嘅禮拜堂派,後來中國政府驅逐東北嘅俄羅斯人,於是啲俄人遺蹟慢慢冇曬[11][註 3]

景區[編輯]

鏡泊湖而家開闢成國家級景區,成個景區由三部份組成:百里長湖、火山口原始森林、渤海國上京龍泉府遺址,總規劃面積達1726平方公里[1]。喺1982年,國務院評定鏡泊湖做首批國家重點風景名勝區;2006年,世界教科文組織評佢做世界地質公園,作爲地質公園嘅面積有1400平方公里;2008年,國際休閒產業協會聯合國國際生態安全合作組織中國國際名牌協會一齊評佢爲中國十佳休閒旅遊勝地之一;2010年,鏡泊湖評選爲中國國家5A級景區[1]

吊水樓瀑布

鏡泊湖景區嘅旅遊資源有72處,包括48處自然景觀,佔67%,24處人文景觀,佔33%。鏡泊湖作爲百里長湖,喺群山之中彎彎曲曲,又水平如鏡,山水相應,景色怡人。有諸如白石砬子、城牆砬子、老鴰砬子、珍珠門、毛公山、大孤山、小孤山、道士山等等景點[1]。其中北面湖水流出嘅地方有吊水樓瀑布,落差20米,豐水期時三面都有水,長一百米,水流量達每秒4000立方米[1]。吊水樓瀑布係中國緯度最高嘅大瀑布,因爲景色壯麗,列爲鏡泊湖第一景點[2]

鏡泊湖除咗風景好,夏天時亦係避暑去處,當地5月~9月期間平均温度10℃~20℃,因爲有山水森林,空氣亦清新;成個景區除咗有湖光山色,亦因爲火山地貌兼具火山口地下原始森林熔岩隧道[1]。其中當地嘅大型熔岩隧道喺中國比較罕見,係中國目前發現規模最大、最完整嘅熔岩隧道[1]。條熔岩隧道位於地下森林東南13公里處,據科學家推測,係四千到八千年前嘅火山噴發形成嘅,個樣好似桂林嘅石灰岩溶洞(喀斯特地貌),不過成因同溶洞唔同,係啲熔岩流曬後形成嘅空洞。探測過嘅隧道當中,最短幾十米,長嘅有500米以上,一般闊5米、高3米[2]

景區內嘅渤海鎮係渤海國京師所在,喺775年遷都來呢度,叫做上京龍泉府,係五京之首。當時個京城分三部份,仿照唐長安城建造:宮城、內城、外城。後來契丹亡佢國時,毀滅咗都城,但留低咗城基殘垣琉璃井。渤海京城遺址係中國保存得最好嘅中世紀都城遺址[2],係國家級重點文物,好有科考、人文景觀價值[9][2]

生物[編輯]

鏡泊湖嘅雜魚有72種咁多,比如有鯉魚紅尾鰲花重唇魚大白魚。鏡泊湖出產嘅鯽魚雖然細條,但啲肉鮮甜,清代時係皇家貢品。另外湖度重出產一種叫黃瓜香嘅魚,呢種魚本身有青瓜香味[12]。除咗魚,鏡泊湖度重有淡水珊瑚[4]

除咗魚類,景區內重有60種獸類、27種鳥類、15種爬行類、11種兩棲類,有諸如東北虎金錢豹黑熊鹿等動物。其中有種特別嘅羊叫懸羊,呢種羊瞓覺時可以用角將自己掛喺樹度、懸崖度,所以叫懸羊[12]

植物方面,鏡泊湖地區嘅植被保存得幾好,覆蓋率達九成以上,當地屬温帶闊葉混交林,主要有紅松林、紅松闊葉混交林、落葉闊葉林。主要樹種有蒙古櫪、水曲柳五味子山葡萄狗棗獼猴桃遼東冷杉杜松。景區西部嘅小北湖林場有大面積原始森林,火山口附近有大面積落葉松[1]

[編輯]

  1. 「畢爾騰湖」出自《欽定盛京通志》、《吉林通志》,《水道提綱》寫成必爾滕湖bit1 ji5 tang4 wu4;普通話拼音:Bì'ěrténg Hú),《吉林外紀》寫成必爾特恩bit1 ji5 dak6 jan1;普通話拼音:Bì'ěrtè'ēn),都係同一滿文嘅唔同官話轉寫[5]
  2. 「湄」字武悲切,明母脂韻平聲;「沱」字徒河切,又徒可切,定母歌韻,有平、上二聲。「湄沱」呢個詞,王力擬音[mi dɑ],高本漢擬音[mji dʰɑ],董同龢擬音[mjĕi dʰɑ],周法高擬音[miei dɑ],李方桂擬音[mji dâ][7]
  3. 呢批白俄人住嘅村,根據日文資料,叫做チンバフ村(Chinbafu村,中文、俄文名未知),呢條村喺牡丹江市南面、鏡泊湖一帶,不過確切位置唔知。呢條村嘅白俄人移民自細鱗河村(普通話拼音:Xìlínhé;俄文:Силинхэ,拉丁化:Silinkhe;日文:シリンヘ,拉丁轉寫:Shirinhe),佢哋嘅宗教教導者叫查善·尼抗·伊格那切域池(Чашин Никон Игнатьевич,拉丁化:Chashin Nikon Ignat'yevich)。佢哋係走難來中國嘅俄國人,一度喺黑龍江開枝散葉,但日後中國局勢好唔穩定,諸如滿洲國、蘇聯軍攻佔、國共內戰、中蘇交惡等,而家散到七七八,啲遺蹟都好少見[11]

[編輯]

  1. 1.0 1.1 1.2 1.3 1.4 1.5 1.6 1.7 1.8 1.9 "鏡泊湖簡介". 鏡泊湖管委會. (原先內容喺2016年7月6號歸檔). 喺2015年10月17號搵到. 
  2. 2.0 2.1 2.2 2.3 2.4 "鏡泊湖". 華夏經緯網. 2003年7月19號. 喺2015年10月19號搵到. 
  3. 3.0 3.1 3.2 "Jingpo Lake: More Than Natural Scenery" (用英文寫). 中國網. 2006年11月24號. 喺2015年10月17號搵到. 
  4. 4.0 4.1 "Lake in China—Jingpo Lake 中國的湖—鏡泊湖". 滬江漢語. 2013年4月18號. 喺2015年10月19號搵到. 
  5. 5.0 5.1 5.2 5.3 5.4 5.5 王岸英 (2008). "牡丹江流域滿語地名之翻譯考證" (PDF). 民族翻譯. 2008年第1期(總第68期). (原先內容 (PDF)喺2016年3月5號歸檔). 喺2015年10月18號搵到. 
  6. 編:栗林 均、呼日勒巴特爾. 『御製満珠蒙古漢字三合切音清文鑑』満州語配列対照語彙 (PDF). 《東北アジア研究センター叢書 第30号》 (用日文寫). 東北大學東北亞研究中心. 呢份係上卷,下卷係呢個[失咗效嘅鏈]
  7. "漢字古今音資料庫". 臺灣大學中國文學系、中央研究院資訊科學研究所. 
  8. "日本移民侵華罪證專題檔案:滿洲漁農開拓團". 黑龍江檔案信息網. 2015年9月8號. 喺2015年10月19號搵到. 
  9. 9.0 9.1 "鏡泊湖人文與歷史". 鏡泊湖管委會. (原先內容喺2016年7月6號歸檔). 喺2015年10月18號搵到. 
  10. "牡丹江鏡泊湖發電廠的紅色記憶". 國家電網報. 英大網. 2012年10月12號. (原先內容喺2016年3月5號歸檔). 喺2015年10月19號搵到. 
  11. 11.0 11.1 阪本秀昭. "旧満州シリンヘ村における正教古儀式派宗教会議について(譯:有關舊時滿洲細鱗河村嘅東正教古儀式派嘅宗教會議)" (PDF) (用日文寫). 天理大學學報 第60卷第2號. 喺2015年10月19號搵到. 
  12. 12.0 12.1 "自然生態". 鏡泊湖管委會. (原先內容喺2016年7月6號歸檔). 喺2015年10月19號搵到. 

睇埋[編輯]

連出去[編輯]