牡丹江

出自維基百科,自由嘅百科全書
Jump to navigation Jump to search
座標: 46°19′24.4″N 129°32′27″E / 46.323444°N 129.54083°E / 46.323444; 129.54083
牡丹江
Flag of the People's Republic of China.svg 中國
省/州/邦 吉林省黑龍江省
延邊州牡丹江市哈爾濱市
屬於 松花江
支流
 - 左邊支流 黃泥河大石河干巴河珠爾多河都陵河塔拉河海浪河北安河
 - 右面支流 沙河官地河東村河鐵嶺河
城市 敦化寧安牡丹江
源頭 牡丹嶺北麓
 - 位置 中國吉林延邊敦化
 - 座標 43°1′30.1″N 127°55′20.5″E / 43.025028°N 127.922361°E / 43.025028; 127.922361
河口 松花江
 - 位置 中國黑龍江哈爾濱依蘭
 - 座標 46°19′24.4″N 129°32′27″E / 46.323444°N 129.54083°E / 46.323444; 129.54083
長度 726千米(451哩,1,452里)
流域面積 31,000 km²(11,969 mi²
流量
 - 平均流量 181 /s(6,392 ft³/s
牡丹江幹流(深色綫)
牡丹江幹流(深色綫)
支流、河口、河源、湖泊等地理信息可查[1]

牡丹江粵拼maau5 daan1 gong1滿文ᠮᡠᡩᠠᠨ
ᡠᠯᠠ
穆麟德Mudan ula
,義「彎曲嘅江」[2]普通話拼音:Mǔdān Jiāng),係位於亞歐大陸中國東北地區,係松花江第二大支流[3],以及係中游最大嘅支流,屬黑龍江水系。牡丹江全長726公里,流域面積3.1萬平方公里[3],流過中國兩個省:吉林黑龍江。佢發源自吉林敦化嘅牡丹嶺北麓[4],之後一路向北流,流過黑龍江牡丹江市,最後喺哈爾濱依蘭縣城附近滙入松花江。

牡丹江幹流好長,喺當中形成三個湖,兩個喺上游,一個喺下游。上游幹流喺張廣才嶺老爺嶺嘅山區,河谷窄,流過敦化市區之後、喺沙河滙入之前,有西崴子水庫;喺寧安南部(屬黑龍江省牡丹江市)更有出名嘅鏡泊湖,鏡泊湖係以前火山噴發,啲岩漿塞住河道形成嘅,係中國最大、世界第二大嘅堰塞湖[5],鏡泊湖南北長45公里,東西最闊6公里,岸綫曲折,號稱「百里長湖」[6]

過咗鏡泊湖嘅吊水樓瀑布後就係中游,河谷闊啲,有串珠狀嘅河谷盆地分佈,流過寧安、牡丹江市區後,到樺林;過咗樺林就係下游,下游河谷又窄返,形成蓮花湖;等過咗依蘭嘅長江屯後,先入到平原[3][1]。因爲流域多山,牡丹江係發展水電嘅重點地區,同時因爲氣候濕潤,流域內有豐富嘅森林資源[3]

水資源方面,佢支流好多,有唔少水庫,其中都陵河起咗個工商行水庫,塔拉河口有大山水庫,除咗呢兩條大支流,重有呢啲水庫湖泊同佢幹流有關:新房子水庫西河水庫江南水庫東靠山泡連水泡北安水庫[1]

流經牡丹江市區嘅河段

航運方面,牡丹江中下游行得大船,其中牡丹江市係內河,係松花江流域三大河港之一[7]。透過滙流嘅松花江,啲船可以通去黑龍江呢條國際江河,出到俄羅斯,抵達伯力,最終出到渥荷次喀海。雖然地處高寒地區,冰封期比較長,但條江封凍時會有冰上運輸[7]

[編輯]

牡丹江個名唔係漢文名,而係官話音譯嘅滿文,意思係「彎曲嘅江河」。又可能因爲佢發源自牡丹嶺,所以噉叫。滿文嘅Mudan ula(官話音譯:穆丹烏拉,普通話拼音:Mùdān wūlā)原本專指上游河段,嗰段河好彎曲,所以滿洲人話佢「彎」(mudan),清末時推及成條江,兼且換字寫成「牡丹江」,漢化到睇唔出滿文痕跡[4]。同樣源出滿文嘅又有穆丹江muk6 daan1 gong1[8]。根據漢化名「牡丹江」又有別名牧丹江muk6 daan1 gong1[註 1]

而喺之前,牡丹江有多個名。《新唐書》稱呼做忽汗河fat1 hon6 ho4[註 2][註 3],《金史》稱做活羅海川wut6 lo4 hoi2 cyun1),「活羅海」又轉音成鶻里改(鶻讀核,wat6 lei5 goi2),又據當時語音寫成同音嘅「胡里改」;《元史》繼承《金史》稱呼胡里改江wu4 lei5 goi2 gong1),又寫忽呂古江fat1 leoi5 gu2 gong1);明代《遼東志》寫成忽兒海河fat1 ji4 hoi2 ho4),同樣明代朝鮮嘅《龍飛禦天歌》寫做火兒阿河fo2 ji4 aa3 ho4[註 4]

清代時,以鏡泊湖爲界,以上(上游)稱爲勒富善河lak6 fu3 sin6 ho4滿文ᠯᡝᡶᡠ
ᡧᠠᠨ
ᠪᡳᡵᠠ
穆麟德lefu šan bira
,義「狗舌草河」[2];普通話拼音:Lèfùshàn Hé)[註 5];鏡泊湖以下(中下游)稱爲瑚爾哈河wu4 ji5 haa1 ho4;普通話拼音:Húrhā Hé)[註 6]。瑚爾哈河又變音成庫爾瀚江fu3 ji5 hon6 gong1;普通話拼音:Kùrhàn Jiāng)[註 7],因爲佢流過寧古塔城,所以又叫寧古塔河ning4 gu2 taap3 ho4)。

有攷據認爲,金元明三代河名,同清代中下游河名係一脈相承嘅,而唐代嘅「忽汗」同清代嘅「庫爾瀚」係呢個一脈相承嘅河名嘅轉化,對應嘅滿文書面係ᡥᡡᡵᡥᠠᠨ(穆麟德:Hūrhan),意思係「大圍網」[2],噉係因爲滿洲民族長期係漁獵維生,於是地名就表現出來[4]

神話[編輯]

喺滿洲民間有個噉嘅神話傳說:滿洲人嘅祖先靺鞨人請天神降伏咗惡魔,將佢壓喺馬紀嶺度,於是啲人有安樂日子過。不過惡魔嘅徒弟忽爾汗唔忿,要幫師傅報仇,佢喺長白山游離浪蕩,見人就食,當佢遊蕩到北坡時,見到條大江,佢諗起啲人住喺條江下游,於是變成一樖大槐樹,控制住河源,於是條江乾咗,啲人冇水就生存唔到。忽爾汗話畀啲人聽,想要水就要每個月貢對童男童女畀佢食,啲人只能照做[8]

之後有個叫穆丹嘅後生仔唔想族人受噉嘅殘害,搵祭司諗計,祭司指佢去搵天神,穆丹搵着天神,天神見佢誠心降魔,就畀把神斧佢,話可以劈山山開、斬樹樹冧,斬邪魔化身嘅嗰樖樹九九八十一下,邪魔就會消散,不過每斬九下,邪魔就會降災一次,等佢贏咗,江河有返,但個人就會永遠變成嚿石[8]

啲族人爲佢踐行,之後穆丹行咗好耐搵到呢樖大槐樹,呢樖樹有十個𡃁仔圍埋咁粗、七七四十九丈高,樹頂有黑雲罩住。佢斬第一下,把神斧就震到膊頭痹,樹身先得個印。佢一口氣斬咗九下,樹身噴出血水,霎時間天昏地暗、飛砂走石,㧺到佢痛;斬到第二劫時,樖樹發出怪聲,四週圍變凍,穆丹畀雪珠㧺;第三劫時,佢見到自己死咗嘅老豆,老豆嗌佢咪斬樹,樖樹會幫佢得道成仙,穆丹話佢唔想成仙而想爲民除害;第四劫時佢已經好攰,個天反而雲開日朗,出現個靚女來勾引佢,不過穆丹冇受誘惑;第五劫時,樹身飛出四十九條蛇去咬佢,佢繼續斬樹;第六劫時佢攰到冧低,瞓咗唔知幾耐,當佢醒咗想繼續斬樹發覺冇咗力,佢見到有條靑蛇舐咗樖草,每舐一下條蛇就會變長一闋。穆丹知道嗰樖係仙草,於是都跟住舐,立即有返力[8]

斬到第72下時,樖樹裂開,忽爾汗跳出來,帶埋四個徒弟圍攻佢,喺忽爾汗拈住穆丹條頸時,把神斧飛出去,自己斬咗樖樹三下,穆丹見到乘機抄返斧頭又斬多六下,斬夠81下,忽爾汗倒地不起,樖樹亦都消失,而啲泉水重新湧出,恢復咗江水,但穆丹佢喐唔到,最後變成巨石,後來啲人話牡丹嶺嘅牡丹峰就係嗰嚿大石,啲人紀念佢,條江起名做穆丹江,後來個名轉化成牡丹江[8]

[編輯]

  1. 牡丹江嘅上游河段位於朝鮮族地區,漢字名「牡丹江」拼成諺文,照常音讀拼做모단강(文觀部式轉寫:Modan gang),但「牡丹」呢個詞喺朝鮮文有流音化讀法,所以又拼모란강(轉寫:Moran gang)。喺中文、韓文,「牡丹」又叫「牧丹」,因此又有諺文寫목단강(轉寫:Mokdan gang)。
  2. 重有種稱呼做「忽汗海」,一般認爲係指鏡泊湖,但有觀點認爲,「海」係「河」古音嘅轉音,所以呢個名亦可能係指牡丹江[4]
  3. 喺隋唐漢音,「忽」字呼骨切,曉母沒韻入聲;「汗」字有三切:胡安切、古寒切、候旰切,呢度用匣母翰韻去聲嘅讀法。「忽汗」呢個詞,王力擬音[huət ɣɑn],高本漢、董同龢、周法高都擬音爲[xuət ɣɑn],李方桂擬音[xuət ɣân][9]
  4. 根據資料推測嘅滿洲音,「忽汗」係[xuχɑn],「活羅海」係[xuluχɑi]或者[xuluχɛ],「鶻里改」、「胡里改」係[xuliqai];「忽呂古」係[xulyku];「忽兒海」係[xurχɑi],「火兒阿」係[xurɴɑ][4]
  5. 「勒富善河」係《欽定盛京通志》寫法。《盛京、吉林、黑龍江等處標記戰績輿圖》轉音寫成埒富陳河(埒讀劣,lyut6 fu3 can4 ho4;普通話拼音:Lièfùchén Hé),其中「陳」音係滿文口頭音,由[ʂɑn]變音成[t͡ʂʰən][4]
  6. 呢個名有大量寫法。「瑚爾哈」係《欽定盛京通志》寫法,對應嘅滿文口音係[χʊrχɑ];《吉林通志》寫成胡爾哈河,《吉林外紀》寫做湖爾哈河,同「瑚爾哈河」同音,《吉林外紀》又寫呼兒哈河fu1 ji4 haa1 ho4,官話拼音:Hūrhā Hé);《盛京、吉林、黑龍江等處標記戰績輿圖》寫成呼爾哈河fu1 ji5 haa1 ho4),官話同「呼兒哈河」同音;《柳邊紀略》寫做虎兒哈河fu2 ji4 haa1 ho4)、虎爾哈河fu2 ji5 haa1 ho4),對應官話拼音都係Hǔrhā Hé[4]
  7. 「庫爾瀚江」係《黑龍江述略》記載,呢個音喺《龍沙紀略》轉音成呼拉哈河fu1 laai1 haa1 ho4;普通話拼音:Hūlāhā Hé),《吉林外紀》省音成呼蘭河fu1 laan4 ho4;普通話拼音:Hūlán Hé)[4]

[編輯]

  1. 1.0 1.1 1.2 "天地圖". (原先內容喺2016年3月4號歸檔). 喺2015年11月2號搵到. 
  2. 2.0 2.1 2.2 編:栗林 均、呼日勒巴特爾. 『御製満珠蒙古漢字三合切音清文鑑』満州語配列対照語彙 (PDF). 《東北アジア研究センター叢書 第30号》 (用日文寫). 東北大學東北亞研究中心. 
  3. 3.0 3.1 3.2 3.3 "細數我們龍江那些饒有名氣的大江大河". 新浪黑龍江. 2013年4月22號. (原先內容喺2016-03-05歸檔). 喺2015年11月3號搵到. 
  4. 4.0 4.1 4.2 4.3 4.4 4.5 4.6 4.7 王岸英 (2008年第1期(總第68期)). "牡丹江流域滿語地名之翻譯考證" (PDF). 民族翻譯. (原先內容 (PDF)喺2016年3月5號歸檔). 喺2015年11月2號搵到.  檢查日期值喺: |date= (詳情)
  5. "Lake in China—Jingpo Lake 中國的湖—鏡泊湖". 滬江漢語. 2013年4月18號. 喺2015年11月3號搵到. 
  6. "鏡泊湖簡介". 鏡泊湖管委會. (原先內容喺2016年7月6號歸檔). 喺2015年11月23號搵到. 
  7. 7.0 7.1 "我國主要内河航運幹綫佈局及其主要河港". 程璐(主編)《中國經濟地理》. (原先內容喺2016年3月4號歸檔). 喺2015年11月17號搵到. 
  8. 8.0 8.1 8.2 8.3 8.4 陳慶浩·王秋桂(主編) (1989年). "牡丹江的傳說". 中國民間故事全集 - 遼寧民間故事集(二). 遠流出版. 第 114頁~117頁頁. ISBN 9573200694. 
  9. "漢字古今音資料庫". 臺灣大學中國文學系、中央研究院資訊科學研究所.