漢奸

出自維基百科,自由嘅百科全書
漢奸海報

漢奸粵拼hon3 gaan1),又寫做漢姦,如果根據《現代漢語辭典》定義,意思係「中華民族之中投靠外國侵略者,甘心受驅使,出賣祖國利益嘅人」。不過「漢奸」呢個詞喺歷史上唔同時間都曾經有過唔同意思[未記出處或冇根據]。最初喺漢族王朝以背叛漢民族,投靠同漢族為敵嘅異族漢人,針對民族而唔係國家[未記出處或冇根據],例如歷史上秦檜就曾經因為同金國搞關係,結果長期俾人叫做漢奸賣國賊。

鴉片戰爭發生之後,喺面對其他國家侵略壓迫,中華唔同族群嘅人都變咗生死與共嘅整體,已經再無分民族,由於漢人中國人主體,漢變成中國人泛稱。而喺抗戰嗰陣,有啲中國人投靠日本人掉轉頭打返中國人,呢啲掉轉鎗頭嘅人都俾人叫做「漢奸走狗」,針對呢類漢奸,愛國僑領陳嘉庚提議「敵未退出我國土即言和當以漢奸國賊論」,由國民參政會第二次大會通過,之後被譽為「古今中外最偉大的一個提案」[1]。於是國民政府响1938年訂立《懲治漢奸條例》,1945年又立《處理漢奸條例》漢奸成為一個有法律意義嘅罪名[2][3]。不過呢兩條條例喺1968年4月已經廢止咗。

2007年全國兩會嗰陣,中國社會科學院學術委員兼全國政協委員喻權域提出「漢奸言論懲治法」,以歐洲國家都有關於禁止為納粹翻案言論法例做例子,認為中國都應該有樣學樣,立法懲治漢奸言論。不過呢個提案畀人話影響言論同新聞自由而受到反對[4]

詞源[編輯]

漢奸呢個詞,係《辭源》入面搵唔到,即係話喺五四之前,並無漢奸呢個詞,就算有都唔常用。而喺二十五史入面搵,就可以喺民國初年編纂嘅《清史稿》入面搵到漢奸呢個詞,即係話呢個詞唔會早過清朝開始有人用,而漢奸呢個詞喺《清史稿》總共出現過18次,大部份都係同鴉片戰爭有關,而第一次出現漢奸係喺卷 296 一份奏疏入面提到四川總督張廣泗「信漢奸王秋等,恐生他虞」,乃乾隆年代間初期苗族人反對改土歸流政策,有關漢人同呢啲苗族人勾結之事[5]

史上俾人叫「漢奸」嘅人[編輯]

政治[編輯]

香港民主黨前主席李柱銘喺2007年10月17號美國華爾街日報》撰文,內容話希望美國總統喬治布殊透過北京主辦2008年夏季奧林匹克運動會呢個機會,要求中國改善人權。之後,喺香港嘅親北京政黨、媒體猛話李柱銘賣國,重有好多文章都批評李柱銘係「漢奸」。不過李柱銘就話俾人叫漢奸真係莫名其妙[6][7]。之後天主教香港教區主教陳日君對呢啲嘢發表意見,話如果李柱銘咁都算漢奸,咁佢都唔介意做埋一份漢奸,覺得呢啲言論係搞笑[8]

不過泛民主派就聯署譴責呢啲指責係抹黑,係有人使橫手歪曲民主黨立場兼誤導街坊[9][10][11]

其實李柱銘成日因為同美國嘅關係而俾一啲親中報章叫佢做「李漢奸」,首先由前香港特首董建華喺一次立法會答問大會上公開話佢唱衰香港[12][13],之後親中政黨同報章都開始話李柱銘係漢奸。

「漢奸帽子」[編輯]

除咗李柱銘成日俾人話漢奸,重有其他俾人話漢奸嘅例子,例如電影明星章子怡,就因為喺電影入面扮日本藝妓而俾人話佢係漢奸[14][15]。另一個明星趙薇亦因為喺一個表演着過一件印有類似日本國旗圖案嘅衫而畀人話佢漢奸。

指控中國共產黨係漢奸嘅觀點[編輯]

內文:指控中國共產黨係漢奸嘅觀點

中國共產黨政府不時會針對一啲異見或者民主運動人士(包括香港、中國內地等地),話佢哋係漢奸。但有啲人就會引用歷史事件或者其他觀點反駁,話真正嘅漢奸其實係中國共產黨,或者係中共嘅一啲領導人物。

[編輯]

上海淪陷時期,電影公司俾日本人全面控制,呢個時期拍嘅電影,都俾人叫做「漢奸電影」,不過真正俾人話係為日寇侵略中國效勞嘅戲主要只有四套:《博愛》(1942)、《萬世流芳》(1943)、《萬紫千紅》(1943)、《春江遺恨》(1944)[16]

除咗咁,重有一啲電影係以漢奸做題材,例如2007年上畫嘅電影《色戒》,由李安執導,改篇自張愛玲同名小說,就係講一個漢奸嘅故事。

抗戰嗰陣拍嘅抗戰電影,亦經常出現漢奸作惡嘅情節,其中一啲出名嘅漢奸角式好似有湯司令、胡漢三、王柬芝、胡傳魁、翻譯官、張金龍、王連舉、何志武[17]。另外李小龍電影《精武門》入面,一個叫「胡翻譯」(魏平澳飾)嘅漢奸角色亦相當家傳戶曉,雖然呢個角色係作出嚟,不過佢成個形象同個性幾乎成為漢奸代表。

參考[編輯]

  1. 為什麼要當漢奸,新華網
  2. 台灣歷史辭典 - 懲治漢奸條例
  3. 灣歷史辭典 - 處理漢奸案件條例. 原著喺2012年1月18號歸檔. 喺2007年10月30號搵到.
  4. 政協委員喻權域提議漢奸言論判監[失咗效嘅鏈]
  5. 「漢奸」詞源考[失咗效嘅鏈] 蘋果日報 2007-10-21 文化生活
  6. 分析:香港的“漢奸政治”餘波未了?,BBC 中文網
  7. 港議員呼籲美國對中國施壓引起爭議,BBC 中文網
  8. 陳日君:指李柱銘漢奸可笑 互聯網檔案館歸檔,歸檔日期2007年10月30號,.,明報新聞
  9. 香港「漢奸」熱 互聯網檔案館歸檔,歸檔日期2007年11月1號,.,自由時報《林保華專欄》
  10. 李柱銘奧運言論風波 互聯網檔案館歸檔,歸檔日期2007年10月29號,.,明報專題
  11. 亞洲華爾街:中國妖魔化李柱銘可能起反效果
  12. 建華駁斥有議員歪曲事實 指一味唱衰對港無益. 原著喺2005年4月24號歸檔. 喺2007年11月1號搵到.
  13. 董建華怒斥民主黨:只懂“唱衰”香港
  14. 滿. 原著喺2008年7月2號歸檔. 喺2007年11月1號搵到.
  15. 明星處境尷尬 中國的文化怪象[失咗效嘅鏈]
  16. 中國電影史上的一個洞 互聯網檔案館歸檔,歸檔日期2007年12月11號,.香港電影評論學會
  17. . 原著喺2008年4月1號歸檔. 喺2007年10月31號搵到.