推廣普通話

上海一間幼稚園入面掛嘅標語寫住：「大家請講普通話，語言文字規範化」

 推廣普通話（粵拼：teoi1 gwong2 pou2 tung1 waa6*2） （簡化字：推广普通话，拼音：tuīguǎng Pǔtōnghuà）係中華人民共和國政府喺中國大陸用各種手段推廣標準官話（官方稱呼叫做「普通話」）嘅措施同行為。中國嘅憲法將普通話定咗主要官方語言，而其他各種漢語族語言，雖然喺國際上大部分學者同語言學機構認咗係同普通話唔一樣嘅語言，但中國當局就將佢哋當成「漢語方言」。

而家中國各地嘅廣播同電視台喺大部分時間必須用普通話嚟講，淨係得廣東有用「粵語」嘅特權，係因為必須向香港做政治宣傳嘅原因。電視劇、電影都唔畀用「方言」嚟講，唔係嘅話冇得通過審查。最近有部分學校出現講半句「方言」俾老師鬧一鑊。

中國當局推廣普通話嘅目的係畀全中國人聽得明人哋講乜。但呢個運動從1998年9月第三個星期開始，一直搞到而家，中國南方有好多人都唔識自己嘅「方言」。另一方面，喺貧困地區冇辦法推廣，搞到全國重有差唔多半數以上嘅人唔識聽普通話。就因為噉搞到中央當局出現大力推廣普通話嘅現象，但南方好多城市嘅人都強烈反對推廣普通話。

由於推廣普通話嘅實際操作，往往變成消滅「方言」、消滅其他漢語族語言，因此「推普」同「滅方」往往相提並論，「推普滅方」成爲常用嘅四字詞。當中反映嘅係有啲人嘅「官話霸權主義」，覺得「中文」或者「漢語」可以由「官話（包括普通話）」嚟代表，矮化咗其他漢語族語言。

推普宣傳周

經過國務院批准，從1998年開始，每年9月份第3個禮拜係「全國推廣普通話宣傳週」。中央好識玩嘢，又搞「全國推廣普通話先進城市」，重畀全國人一齊提出宣傳口號，講得好有獎。例如中國嘅學校成日見到「講普通話，寫規範字」（簡化字：讲普通话　写规范字）、「講普通話，做文明人」（簡化字：讲普通话　做文明人），甚至有幼稚園同小學入面經常見到「講普通話從細路仔開始」（簡化字：讲普通话从娃娃抓起）、「唔講方言，唔講粗口，做個合格市民仔。」（簡化字：不讲方言，不讲脏话，做一个合格的小市民）嘅諸如類似標語。

部分人認為「講普通話，做文明人」嘅標語對講「方言」嘅人有一定嘅侮辱性，甚至出現「唔文明」或「野蠻」噉解。政府重將講普通話夾硬同「愛國主義」聯繫埋一齊，話講「方言」係魔鬼，搞到講方言啲人好𤷪𤺧。

法規

中共政府係跟據中華人民共和國憲法同埋《國家通用語言文字法》嚟推廣普通話。其中響中華人民共和國憲法第十九條係咁寫：「國家要推廣全國都通用嘅普通話。」（簡化字：国家推广全国通用的普通话）

另外響《國家通用語言文字法》入面，亦有清楚指出同國語相關嘅法例同規條，包括：

• 第二條：「我地國家通用嘅文字係普通話同埋規範漢字。」
• 第三條：「國家要推廣普通話，兼推廣埋規範漢字。」
• 第四條：「公民有學同埋用全國通用文字嘅權利。國家要為民人學習同埋用國家通用話提供適當嘅條件。而地方政府同埋有關部門亦都應該推行措施，去推廣普通話同埋規範漢字。」
• 第十條：「學校同埋教育機構要用普通話同埋規範漢字作為基本嘅教學用語。」
• 第十二條：「廣播電台、電視台要用普通話作為平時播音嘅語言。」
• 第十三條：「服務行業要以普通話作為平時會講嘅語言。」
• 第十九條：「當果個工作崗位要以普通話作為作為平時會講嘅語言，咁做呢份工嘅人就應該要識得講普通話。播音員、主持人、話劇演員、先生同埋國家機關工作人員（相當於公務員）嘅普通話水平，應該要達到政府規定嘅標準；如果唔達標，就要培訓。」
• 第二十條： 「對外國人嘅漢文教學入面，應該要教埋普通話同埋規範漢字。」

爭議

國際人權

喺聯合國《公民同政治權利國際公約》入面規定咗：「少數人都有用自己語言嘅權利。」，但到咗今日，中國當局重未批准呢個公約。

中共支持將大陸犯法嘢搬入特區

喺2021年，無數大陸教育培訓機構被立法封殺。然而，中共官方傳媒，包括《環球時報》，會表揚若干大陸公司，指渠哋去香港做啲喺大陸係犯罪嘅普通話教育生意係好事。

中共批評民國提高其他語言地位

中華民國喺民主進步黨執政期間，將國語以外嘅多種漢族同山地語言升格，後嚟重列為「國家語言」，中共黨媒《人民日報》對此抨擊。

睇埋

• 中華人民共和國國家通用語言文字法
• 推廣普通話宣傳周
• 世界語言權利宣言
• 語言權利
• 廣州撐粵語行動
• 舌尖上的粵語
• 蒙古話保育運動