蒙古話保育運動

出自維基百科,自由嘅百科全書
跳去導覽 跳去搵嘢

蒙古話保育運動粵拼mung4 gu2 waa6*2 bou2 juk6 wan6 dung6),又叫蒙語保育運動,喺呢一版入邊主要係介紹中國大陸內蒙古度嘅內容。就著相信係蒙古話內蒙古嘅培育環境,由1980年代到1990年代低迷化得好交關,內蒙古官方就開始有意識咁搞一系列保育蒙古話嘅項目工程。而喺2020年中開始,因為中共中央強化施壓咗內蒙古地方改變一路嘅蒙古話施政同雙語教學、強制地方嘅中小學統一用官話去教書以強化「中華民族共同體」意識,就引發咗系列社會運動同事件,獲得外界多咗關注返當地嘅語言文字嘅生存情況。

背景[編輯]

據分析話,中共由於建政嘅歷史淵源,同內蒙嘅蒙古族有過合作嘅經歷,所以係保持過好耐嘅「合作、共治」狀態。到咗習近平上台後開始強化打造返「中華民族共同體」意識,而同時期外蒙古同內蒙嘅書寫文字變革有所呼應,可能蘊含咗「反殖民族主義」而喺未來影響到蒙古社群嘅身份認同,呢個地緣政治考慮會係一個激化咗呢輪矛盾嘅誘因[1]

地方政府原初嘅保育活動[編輯]

內蒙古當地本身係一路有重視蒙古文嘅傳承發展,千禧年之後慢慢仲關注到蒙古語同文嘅信息化建設。喺2012年時候嘅內蒙古政府發佈過《關於加快推進蒙古語言文字信息化建設的意見》,到2013年再由地方財政度撥出咗專項資金,每年預留咗3000萬埋單俾蒙古文信息化建設。到咗2014年再制訂咗《內蒙古自治區蒙古語言文字信息化建設中長期規劃(2014-2020年)》,明確提出咗蒙古語同文嘅信息化建設,要涵蓋到蒙古社群日常嘅多方面。經過咗地方政府、企業、高校科研機搆等嘅共同參與,喺2015年嘅時候據官方數字內蒙古度已經有13個蒙古語言文字信息化項目完成咗驗收,其中包括咗梁金寶團隊經一年有突搞出嚟嘅蒙古文智能手機操作系統[2]。而喺科研方面,政府仲由民族工作經費度撥出一啲資金,資助埋蒙古語文嘅科研項目,據計由2014到2016年,累計用咗360萬去資助123個課題,以促進蒙古語文規範化、標準化嘅研究[3]

內蒙古地方政府仲關注到鄂倫春族、鄂溫克族、達斡爾族等較少傳承人嘅少數社群,中共自治區黨委、政府係協調埋呼倫貝爾市政府採取一啲行動,協調埋呢三個自治旗搞一啲保育活動。經過自治區民委組織專家學者,係編寫咗《鄂溫克語圖解詞典》、《達斡爾語圖解詞典》同《鄂倫春語圖解詞典》,其中《達斡爾語圖解詞典》經已由內蒙古文化出版社正式出版。另外呢三個自治旗嘅民族工作部門喺當地都有透過所屬研究會嘅平台,舉辦一啲當地話嘅會話培訓班,鼓勵返啲中青年、尤其係啲中小學生學返自己民族嘅語言同文化[3]

北京中央嘅推普意圖[編輯]

睇埋:推普

就著大中華到中共一路繼承嘅思路,所謂「現代化」好多時就同「漢化」劃等號,喺中共管治下嘅其他民族「脫貧」就應該學普通話。著「第二代民族政策」嘅提出,千禧年後北京當局有逐年咁限縮非漢語教育發展嘅趨勢。習近平接掌中共大權後喺2017年9月出席「深度貧困地區脫貧攻堅座談會」時候,表示話「部分民族地區社會文明程度低,很多人不學漢語、不懂普通話」。到咗2018年2月中共嘅教育部等多部門聯合發佈咗《推普脫貧攻堅行動計畫(2018-2020年)》,其中就將「普通話提升率」納入到地方扶貧工作績效考核嘅範疇度。而2020年係中共中央主要制訂嘅「決戰脫貧攻堅」、「全面建成小康社會」目標嘅收官年,政府就谷著要各地出績效,其中包括咗「確保家庭新增勞動力人口全部具有普通話溝通與應用能力」,據規定計劃喺9月尾前基本完成所有「語言扶貧」嘅任務[4]

民間運動嘅進程[編輯]

導火綫同零星反應[編輯]

引起當地語言生態突變嘅政策,似最早係喺2020年6月初喺通遼市披露先,嗰時係有中共上級代表團落去訪視,期間同啲地方人士強調咗要加強使用「通用國家語言」。到咗6月下旬,開始有報導放風話通遼市啲教師必須喺9月份開始轉用統編嘅語文教材。到7月6號,針對傳言政策嘅第一批請願開始喺wechat群組度流傳,但範圍仲係喺通遼本地度。內蒙古教育廳喺8月17號一個唔公開會議度,就首次宣佈咗會將呢個統一化政策擴展去成個內蒙古,仲落柯打俾所有下級行政機構,要佢哋第二日就開始實施個計劃。自治區主席布小林就話,「推進統編教材使用有利築牢中華民族共同體意識,各級幹部與教師要主動向學生、家長以及群眾宣講政策,保證學生正常上學」[5]

喺2020年8月30號,內蒙古自治區政府突然間係公佈咗「全區民族語言授課 學校小學一年級和初中一年級使用國家統編《語文》教材實施方案」,公開話蒙古族中小學有三門科目——語文,政治同歷史,要轉咗官話(「國家通用語言文字」)去教書,引起咗蒙古社群擔憂係會衝擊到當地一路做開嘅雙語教學體系[6]

大規模行動[編輯]

喺呢個消息傳出後,引發咗一部分支持蒙古話嘅人抗議呢個政策。喺公佈咗呢個政策嗰日,就已經有一個蒙古學生跳樓死咗[7]。喺8月31號同9月1號,南蒙古人權信息中心影到有唔少學生因為咁而喺街頭同校內抗議、發動罷課[8]。喺2020年9月4號,內蒙古阿拉善盟政府嘅一個蒙古族女公務員蘇日娜亦因為保育蒙古話壓力大而自殺,亦係呢個運動嘅第四單自殺事件[9]。喺9月7號,有成百個蒙古族裔同人權人士喺美國華盛頓嘅中國駐美大使館同埋國會山莊出面,去抗議中國政府喺內蒙打壓蒙古語言嘅教學,仲有去聲援內蒙民眾保護民族語言同文化嘅維權行動[10]。喺9月9號,當地嘅藍旗中學有成20到30個中學為咗抗議呢個政策而被打壓,政府開始禁錮啲學生強逼佢哋上堂,當中有學生係爬鐵絲網逃離學校去參與罷課[11]

官方對民間反應嘅打壓[編輯]

喺2020年中民間因為中央施壓導致嘅轉變激化,爆發連串示威後,當局未有軟化而係一路鎮壓,強硬咁推行返新嘅語文政策。

四圍咁刮人同拉人[編輯]

喺9月3號,巴彥淖爾市嘅公安局就發出咗《關於依法嚴厲打擊涉國家統編教材使用違法犯罪行為的通告》,話會嚴厲打擊啲唔滿當局新政策而參與運動嘅人士[12]。而喺前一日科爾沁區嘅公安分局就分四次發咗通緝令,有成129人話有涉及到8月31號嘅示威活動而俾通緝,仲話會獎人仔1000蚊俾有功協助差佬拉人嘅人[13][14]。內蒙古自治區政府都冇軟化俾中央逼使轉變政策嘅態度,公開話當地民眾嘅抗議係「受境外勢力煽動」。[15]內蒙古錫林郭勒盟阿巴嘎旗嘅維權人士楊金都麗瑪同老公都俾拉咗[16]

而據通遼嘅蒙古居民透露,當地啲蒙古人發起過反對活動後,就有8人被差人以涉嫌「尋釁滋事罪」扣查咗,其中包括咗喺9月上旬被拉嘅維權律師胡寶龍。胡寶龍喺俾人收監成三個禮拜,就經通遼市檢察院批准而正式咁坐監[17]

對反抗官員、教師嘅打壓[編輯]

到9月,巴彥淖爾市錫林郭勒盟就處分咗一啲未有執行中央統編教材施政嘅官員;喺9月7號,赤峰市政府係要求分流或轉職啲唔能夠執行新嘅統編教書任務嘅老師[18]。呢時候嘅內蒙政府主席布小林就放話,新政策係可以「築牢中華民族共同體意識」,要求各級官員、老師都要複讀返新政策俾社會民間,仲要保證啲學生返學[19]。內蒙古東烏珠穆沁旗教育局喺9月13號,仲正式宣佈咗停職三個一路堅持唔送仔女返校嘅老師[20]

中央政府嘅強推姿態[編輯]

外交部發言人華春瑩喺9月3號俾NHK記者訪問時話,國家通用語言文字係國家主權嘅象徵,學習同使用國家通用語言文字係每個(管治下)公民嘅義務[21]

喺9月23號,中共政府嘅教育副部長鄭富芝就內蒙強推統編教材嘅施政解話時話,「推行國家通用語言文字,這是中國法律的一項規定。并且讓所有的中國人學會、學好國家通用語言文字是有非常大的好處,可以便於大家更好交流」,「現在有些不同的看法,我認為是暫時的」。而喺同一日,中共內蒙古自治區黨委嘅統戰部長段志強,就喺中共中央統一戰線工作部官網發咗署名文,話推進國家通用語言文字教育係「構建中華民族共同體意識的必然要求」,仲話係會促進內蒙古嘅發展[22]

中共嘅總書記習近平喺2021年3月5號會見內蒙古兩會代表團嗰陣,有讚賞返內蒙古遵循返中央意思去大搞國家統編教材[23]

雙語政策俾強行改變同影響[編輯]

自從公佈咗要用官話取締蒙古語嘅教育政策後,喺2021年1月8號內蒙古自治教育廳出聲明宣佈停用中小學歷史教科書[24]。喺運動發生後,內蒙古自治區人民代表大會就過咗《內蒙古自治區促進民族團結進步條例》去防止呢類嘅運動再發生[25]。但有人發現唯獨呢條條例同其他省份(青海貴州等)有唔同嘅地方,例如呢條條例有「加強國家通用語言文字教育」同將「否定中華民族共同體」等當做刑事罪行處理,亦分析咁做係明顯針對上年9月發生嘅蒙古話保育運動[25]

喺推出呢個政策後,有蒙古人係擔心佢哋嘅語言文化因為咁而被滅絕[26]。亦有人認為,呢個新課程係將抹殺少數民族文化,令少數民族被佔優勢嘅漢族同化[27]

同撐粵語運動嘅對比[編輯]

喺呢個運動入面,有人將佢類比做「保衛粵語運動」[28]。喺運動發生後亦有傳有成千人被拉咗,並被送入轉化集中營,甚至傳出有多人死咗[29]

藏人作家茨仁唯色就認為話,由於粵同藏、蒙各自係有著唔同嘅語言地位,雖然秉持嘅同樣都係有普世價值嘅「民族平等,語言自由」,但因為政治風險嘅唔同、而會有民族唔平等嘅情況[30]

睇埋[編輯]

[編輯]

  1. 內蒙語言政策爭議:中國為何禁用蒙古語教學? 作者 侍建宇 獨立評論
  2. 蒙古语言文字传承:借信息化破“边缘化”危机 2015-11-26 中国新闻网
  3. 3.0 3.1 内蒙古自治区蒙古语文事业改革发展40年 互聯網檔案館歸檔,歸檔日期2021年3月14號,. 内蒙古自治区民族事务委员会 2018-12-21 中国民族报电子版
  4. 內蒙古強推漢語的政經動機 中共政軍所 陳穎萱政策分析員 財團法人國防安全研究院
  5. 四、近期內蒙古漢語教材抗爭事件觀察 政治大學民族系副教授藍美華主稿 中華民國大陸委員會
  6. "蒙語教學風波:模範自治區不再,北京不要朋友,寧要敵人?". 端傳媒. 2020-09-04. 喺2021-03-10搵到.
  7. "「我母語係蒙古話 死都係蒙古魂」內蒙學生墜亡引發大規模蒙語抗爭運動". 港語學. 2020-08-31.
  8. "Schools are empty, students take oath to defend the mother tongue" (英文). 南蒙古人權信息中心. 2020-09-01.
  9. "內蒙蒙古族公務員自殺 丈夫透露疑因保育蒙語壓力大 被公安要求封口". 立場新聞. 2020-09-05.
  10. "蒙古族裔人權人士集聚華府 抗議北京打壓蒙語". 中央廣播電視臺. 2020-09-08.
  11. "學校清洗蒙古話 學生爬3米鐵絲網逃離 5萬人參與白宮聯署響應捍衛母語運動". 港語學. 2020-09-11.
  12. "內蒙古巴彥淖爾:將嚴打非法遊行、鼓動罷課等行為". RFI - 法國國際廣播電台. 原著喺2020-10-13歸檔. 喺2021-01-25搵到.
  13. "扩散 | 科尔沁区公安分局协查通告(第一批)". 平安科尔沁. 2020-09-02. 原著喺2020-09-03歸檔. 喺2020-09-03搵到.
  14. "中國內蒙古爆發反漢語教學示威後,當地警方懸賞通緝上百名居民". BBC. 原著喺2020-09-03歸檔. 喺2020-09-04搵到.
  15. "內蒙抗議持續發酵 官方定性抗議為境外煽動". 自由亞洲電台. 2020-09-03. 原著喺2020-11-29歸檔. 喺2020-09-04搵到.
  16. 警察凌晨入室抓蒙古族学生 十余名牧民抵制双语教育被捕 互聯網檔案館歸檔,歸檔日期2020年11月17號,..自由亞洲電台.
  17. 秋後算帳來臨:反對「漢化教育」蒙古族律師胡寶龍被捕 互聯網檔案館歸檔,歸檔日期2020年10月9號,. RFA 2020-10-07
  18. "內蒙古漢語授課風波,多名官員涉「拒不執行國家決策部署」遭處分". 香港01.
  19. "內蒙通緝23人 涉反雙語教學示威". 星島日報. 2020-09-02. 喺2020-09-03搵到.
  20. "拒执行内蒙古教材新政 再有5人被处分". 原著喺2020-09-20歸檔. 喺2020-09-14搵到.
  21. 2020年9月3日外交部发言人华春莹主持例行记者会 互聯網檔案館歸檔,歸檔日期2020年9月6日,.,中华人民共和国外交部
  22. "内蒙古教改风波争议延烧 中国教育部:不同看法是暂时的". 原著喺2020-10-10歸檔. 喺2020-09-24搵到.
  23. "内蒙中小学全面使用国家统编教材?习近平人大最新表态".
  24. "鎮壓蒙古語運動後 內蒙古停用中小學歷史文化教科書". 港語學. 2021-01-15.
  25. 25.0 25.1 "內蒙立法「否定中華民族共同體」即屬犯罪 以防蒙古語運動再現". 港語學. 2021-02-08.
  26. "內蒙古通遼市爆發罷課 警方懸賞追緝抗議民眾". 中央廣播電臺. 2020-09-03.
  27. "加速消滅蒙語!內蒙官方宣布秋季起3科用漢語教學". 中央廣播電視臺. 2021-02-07.
  28. "「蒙語保育運動」類似「保衛粵語運動」嗎?". 中央廣播電視臺. 2020-09-16.
  29. "文史都被拔除!內蒙文化清洗行動升級 中共下令停用五套歷史教材". 中央廣播電視臺. 2021-01-19.
  30. 「蒙語保育運動」類似「保衛粵語運動」嗎? 2020-09-16 ☀ Rti 中央廣播電臺 新聞編輯

連出去[編輯]