切韻
《切韻》（粵拼：cit3 wan5）係隋朝陸法言作嘅韻書，作序於隋文帝仁壽元年（601年）。唐代，啲人爲咗科舉作詩而廣泛讀佢。最初佢立有193韻嘅韻目。
佢係現存最早、亦係影響力最大嘅韻書，入面記錄嘅音系係當時上層社會（士族）所講嘅中古漢語口音，可能綜合咗舊時洛陽（洛下雅音）同南京（金陵雅音）呢兩個地方嘅語音而成。喺相當長時間內，《切韻》失傳，後來喺敦煌石室搵到咗《切韻》殘卷，同《廣韻》對照，可以知道佢哋嘅音系係同一體系嘅，叫做「切韻音系」。同屬切韻音系嘅書，除咗《廣韻》，仲有《唐韻》《集韻》。
編寫[編輯]
據陸法言嘅序，喺開皇之初（580年代），有劉臻哋8個人聚集喺陸法言屋企[1]，喺嗰陣時有呢啲問題：各地方言各異，既存韻書嘅分韻亦都唔同。於是以蕭該、顏之推哋爲中心去決定分韻，成個概略由陸法言記低。呢份結果後尾長時間放置，喺十幾年後寫成五卷嘅《切韻》，成爲各種字書、韻書嘅參照。
內容[編輯]
《切韻》一共五卷，按韻嘅四聲分卷。第一、二卷係平聲，第三卷係上聲，第四卷係去聲，第五卷係入聲。然後喺聲調之內分韻。韻嘅數目有：平聲五十四韻、上聲五十一韻、去聲五十六韻、入聲三十二韻，合計193韻。一個韻中，啲同音字都收埋一齊，個發音記去最初嗰隻字嘅反切度。各隻字嘅釋義都非常之短。
喺《切韻》之前亦有韻書，但佢哋都冇流傳到現代。所以，《切韻》係成體系噉承傳漢字音嘅書中最古老嘅。以《切韻》做代表嘅音韻體系稱呼做切韻音系，係中古音一種。根據英文世界嘅研究成果，中古音要區分兩種，《切韻》做代表嘅語音叫做「Early Middle Chinese」（早期中古音），《慧琳音義》哋做代表嘅語音稱呼做「Late Middle Chinese」（晚期中古音）。
切韻系韻書[編輯]
《切韻》係工具書，經常修訂、加字。所以而家《切韻》原初書版冇留存落來，而留低咗改訂版；敦煌、吐魯番出土咗啲殘篇，一般認爲係佢嘅原書，但學者之間未有定論去判明呢啲殘篇嘅版本。呢啲改訂版本統稱做切韻系韻書。
運用現存嘅切韻音系韻書、加埋第啲書裏頭嘅引用，就能夠復原《切韻》嘅原貌，呢方面嘅學者有李永富、上田正等。
據《唐五代韻書集存》，主要嘅改訂有以下呢啲：
長孫訥言箋註本[編輯]
長孫訥言幫《切韻》增補咗字，加咗箋註。喺儀鳳二年（677年）作序。喺敦煌有殘卷。
王仁昫刊謬補欠本[編輯]
王仁昫改訂嘅版本。關於佢嘅成書年雖然有議論，但意見集中，唐蘭認爲係神龍二年（706年），周祖謨亦認爲係中宗復辟、將國號改返做唐時（706年～710年）[2]。二戰後發現咗完整版。另外仲有敦煌殘卷淨低。
除咗大幅增補字外，上聲、去聲各自增補一韻，夾埋成195韻。呢個版本簡稱爲《王韻》。佢對《切韻》加補、訂正嘅地方比較清晰明瞭，相比起《廣韻》，佢將《切韻》原本嘅特徵保留得更好。另外有樣嘢珍貴，佢喺各卷嘅擡頭記有《切韻》之前各種韻書嘅分韻狀況。
裴務齊正字本[編輯]
王仁昫《刊謬補欠切韻》嘅改訂版，但啲改動好大。成書年代不明。清朝宮廷有藏本，但欠缺咗上聲呢一部分。
唐韻[編輯]
開元二十一年（733年）[3]或者係天寶十載（751年）[4]時由孫愐大修訂而成。喺敦煌有殘卷，另外蔣斧嘅舊藏中亦有殘本。
五代嘅切韻系韻書[編輯]
呢代韻書有喺《廣韻》中搵唔見嘅「宣韻」（「仙韻」嘅獨立合口韻），另外亦細分啲韻。有敦煌、吐魯番嘅殘卷。
廣韻[編輯]
由陳彭年哋編纂，喺北宋嘅大中祥符元年（1008年）刊行，正式書名叫《大宋重修廣韻》。韻目度增加到206韻，但佢只係將《切韻》中某啲韻由一個分成咗兩個，音韻體系自身冇乜點變，所以用《廣韻》代替《切韻》去復原中古音，得出結果都唔會有大變。《廣韻》由於清代時畀顧炎武發掘攷藏而有名，佢個刊本完整，兼且啲校訂、索引完備，所以就算全本嘅《王韻》發現咗都好，都仲係攞《廣韻》做切韻系韻書嘅代表。
註攷[編輯]
參攷資料[編輯]
- 周祖謨 (1983年). 《《唐五代韻書集存》》. 中華書局. ISBN 7101045294.
- 現存所有切韻版本嘅總集，但印刷質量較差。
- 上田正 (1973年). 《《切韻残巻諸本補正》（切韻殘卷諸本補正），東洋學文獻中心叢刊〈第一九輯〉》. 東京大學東洋文化研究所附屬東洋學文獻中心.
- 上田正嘅補正係對姜亮夫（姜寅清）《瀛涯敦煌韻輯》嘅判讀所做嘅訂正。
- 上田正 (1975年). 《《切韻諸本反切総覧》（切韻諸本反切總覽），均社單刊 1》. 均社.
- 上田正 (1984年). 《《切韻逸文の研究》（切韻軼文研究）》. 汲古書院.