廣韻

出自維基百科,自由嘅百科全書
Jump to navigation Jump to search

 大宋重修廣韻粵拼daai6 sung3 cung4 sau1 gwong2 wan5 》,簡稱《廣韻》,係中國頭一部由政府主修嘅韻書,喺北宋大中祥符元年(1008年)由陳彭年中文陳彭年哋奉詔去寫,主要係增訂自先前嘅兩本韻書《切韻》同《唐韻》。《廣韻》總共收206個韻,包括平聲57韻、上聲55韻、去聲60韻、入聲34韻。

佢係切韻音系嘅韻書之一,喺清朝重新發掘佢之後,啲人用佢作爲知曉古音嘅重要書籍。而高本漢利用佢去復原中古音。《廣韻》之前嘅切韻系韻書曾經長期失傳,但二戰後發現咗王仁昫《刊謬補欠切韻》嘅完整版。

背景[編輯]

北宋真宗時,由於舊時嘅韻書有幾多漏誤,用來做科舉標準唔得掂,就敕命去編寫《廣韻》。

內容[編輯]

《廣韻》嘅卷首記載話佢收咗2萬6194字,註解有成19萬1692字。之不過有啲字係多音字,一隻字有幾個音,所以其實有重複計數,今人踢走重複,計出嘅真實收錄字數係一萬六千字左右[1]。《廣韻》總共有五卷,韻目中平聲有57韻(上平聲28韻,下平聲29韻。平聲分咗上下兩卷,係因爲平聲字多,分兩卷係爲咗編纂上嘅方便,音韻上冇唔同,而區別於其他三聲),上聲有55韻,去聲有60韻,入聲有34韻,合計206韻。之不過,同時相鄰嘅兩個或三個韻可以通押同用,即係押韻時可以按規定諧押唔同嘅韻,按通押嘅韻數計,平聲有31,上聲有30,去聲有33,入聲有19,總共係113韻(不過呢個通押規定係《廣韻》編纂完之後又再改過嘅,本來係平聲32、上聲32、去聲34、入聲19,總共117韻)[2]。個通押規則直到平水韻都冇變,平水韻有106韻。

相比原本嘅《切韻》,《廣韻》多出13韻,佢哋分別係:

  • 分開咗真韻嘅開口同合口,增加咗合口嘅「諄、準、稕、術」[3]
  • 分開咗寒韻嘅開口同合口,增加咗合口嘅「桓、緩、換、曷」
  • 分開咗歌韻嘅開口同合口,增加咗合口嘅「戈、果、過」
  • 追加番對應住嚴韻嘅上聲韻同去聲韻,增加咗「儼、釅」

以上四項嘅最後一項,係8世紀初嗰陣由王仁昫追加嘅,除此以外,都係將啲韻分咗開合,但音節嘅種類自身並冇增加到(開合係指介音係咪圓脣,而押韻係押韻腹同韻尾,唔睇介音,所以喺通押中會冇咗開合區分),所以冇本質嘅變化。

使用做反切嘅漢字裏頭,除咗避呢啲特別理由外,基本上沿襲咗《切韻》嘅內容,所以《廣韻》可以代替《切韻》去使。不過,《切韻》嘅反切到咗寫《廣韻》當時,啲音已經變咗啲,所以喺各卷嘅末尾有一節「新添類隔更音和切」,記載住改訂過嘅反切。啲改訂反切絕大多數同重脣音輕脣音有關,呢兩種音喺《切韻》時代未分化。例如支韻「卑」嘅正文反切係「府移切」,喺卷尾就改註做「必移切」。

《廣韻》嘅字義訓釋相比起《切韻》仲長啲。不過講到啲專有名詞同埋姓嘅由來時,佢啲說明有偏差,呢樣喺《集韻》嘅序度批判過[4]

書尾度載有「雙聲重韻法、六書、八體、辨字五音法、辨十四聲例法、辨四聲輕清重濁法」。

問題[編輯]

內文: 切韻考

《廣韻》嘅反切雖則基本遵從《切韻》,但佢有啲地方古怪。例如脂韻嘅「尸」切成咗「式之切」,但「之」係之韻字,正確嘅切音係「式脂切」。噉係由於喺《廣韻》時代,脂韻同之韻相近,呢啲字變得同音,於是某啲時候一啲人喺呢啲細節上出咗錯誤。另外,各個韻嘅末尾集中咗例外反切,呢啲係針對《切韻》所新追加嘅,可以從呢啲集中嘅例外研究出一啲嘢。

文獻版本[編輯]

《廣韻》喺明代時畀人忘記,但顧炎武重新發掘咗佢,注意到佢嘅重要性。不過顧炎武發現嘅明內府本係節略過嘅版本,顧炎武過身後啲人先至發現《廣韻》嘅原本。南宋刊本之中,監本高宗本、寧宗[5],私家版有南宋巾箱本、題有「鉅宋廣韻」嘅版本。清代嘅刊本攞宋本做底本,當中有澤存堂本、曹楝亭本(補返咗部分嘅節略版)、古逸叢書本。澤存堂本有咗影印版,上面加咗周祖謨嘅校正,附埋部首索引,呢個係現時廣爲應用嘅版本。

韻目[編輯]

廣韻206韻
平聲 上聲 去聲 入聲
上平聲
一東 一董 一送 一屋
二冬 二宋 二沃
三鍾 二腫 三用 三燭
四江 三講 四絳 四覺
五支 四紙 五寘
六脂 五旨 六至
七之 六止 七志
八微 七尾 八未
九魚 八語 九御
十虞 九麌 十遇
十一模 十姥 十一暮
十二齊 十一薺 十二霽
十三祭
十四泰
十三佳 十二蟹 十五卦
十四皆 十三駭 十六怪
十七夬
十五灰 十四賄 十八隊
十六咍 十五海 十九代
二十廢
十七真 十六軫 二十一震 五質
十八諄 十七準 二十二稕 六術
十九臻 七櫛
二十文 十八吻 二十三問 八物
二十一欣[6] 十九隱 二十四焮 九迄
二十二元 二十阮 二十五願 十月
二十三魂 二十一混 二十六慁 十一沒
二十四痕 二十二很 二十七恨
二十五寒 二十三旱 二十八翰 十二曷
二十六桓 二十四緩 二十九換 十三末
二十七刪 二十五潸 三十諫 十五鎋
二十八山 二十六產 三十一襉 十四黠
下平聲      
一先 二十七銑 三十二霰 十六屑
二仙 二十八獼 三十三線 十七薛
三蕭 二十九篠 三十四嘯
四宵 三十小 三十五笑
五肴 三十一巧 三十六效
六豪 三十二晧 三十七號
七歌 三十三哿 三十八箇
八戈 三十四果 三十九過
九麻 三十五馬 四十禡
十陽 三十六養 四十一漾 十八藥
十一唐 三十七蕩 四十二宕 十九鐸
十二庚 三十八梗 四十三映[7] 二十陌
十三耕 三十九耿 四十四諍 二十一麥
十四清 四十靜 四十五勁 二十二昔
十五青 四十一迥 四十六徑 二十三錫
十六蒸 四十二拯 四十七證[8] 二十四職
十七登 四十三等 四十八嶝 二十五德
十八尤 四十四有 四十九宥
十九侯 四十五厚 五十候
二十幽 四十六黝 五十一幼
二十一侵 四十七寢 五十二沁 二十六緝
二十二覃 四十八感 五十三勘 二十七合
二十三談 四十九敢 五十四闞 二十八盍
二十四鹽 五十琰 五十五豔 二十九葉
二十五添 五十一忝 五十六㮇 三十帖
二十六咸 五十三豏 五十八陷 三十一洽
二十七銜 五十四檻 五十九鑑 三十二狎
二十八嚴 五十二儼 五十七釅 三十三業
二十九凡 五十五范 六十梵 三十四乏

[編輯]

  1. 水谷誠 (2004年). 《『大宋重修広韻』と『大広益会玉篇』》(«大宋重修廣韻»同«大廣益會玉篇»),出自叢書:《«集韻»系韻書研究》. 白帝社. 第 181頁. ISBN 4891746920. 
  2. 小川環樹 (1977年). 《唐詩の押韻》(唐詩嘅押韻),出自叢書:《中國語學研究》. 創文社. 第 87~115頁. 
  3. 不過有一部分合口字依然留咗喺真韻度。
  4. 集韻》序:「凡姓望之出,舊皆廣陳名系。既乖字訓,復類譜牒。」
  5. 按周祖謨《廣韻校本》,雖然傅增湘舊藏本、同埋金澤文庫本號稱係北宋監本,但而家認爲佢哋都係南宋嘅嘢。
  6. 《切韻》度寫「殷」。因爲宋朝宣祖(宋太祖阿爸)叫趙弘殷,牴觸咗名諱,因而《廣韻》改咗韻目字。
  7. 《切韻》度寫「敬」。因爲牴觸咗宋翼祖(宋太祖阿爺)嘅名諱,因而《廣韻》改韻目字。
  8. 注意,「證」係證韻字,而「証」屬諍韻字。佢哋喺古音唔同音,唔係異體字。

出面網頁[編輯]