趙構

宋高宗趙構（1107年—1187年），字德基，係南宋開國皇帝，亦係宋朝第十個皇帝。

生平

趙構係宋徽宗第九個仔，未做皇帝之前受封做「康王」。1126年金兵第一次包圍北宋首都汴京嗰陣，趙構畀佢阿哥宋欽宗派去金兵嗰度做人質講和，之後放番返去。1127年1月，金兵第二次包圍汴京之後攻陷汴京，捉咗宋徽宗同宋欽宗，呢件事就叫做「靖康之難」。

之後趙構喺河北起兵，叫自己做大元帥，聚集咗唔少仲效忠宋朝嘅軍隊。1127年6月，趙構喺應天（今日河南商丘）登基做南宋第一位皇帝，改年號做建炎。趙構幾經輾轉終於走到江南，定都臨安（今日浙江杭州）。

建炎三年，「苗劉兵變」發生。

1131年，改用年號「紹興」。

1137年，趙構阿爸宋徽宗嘅死訊傳到南宋。

1140年，金兵又南下入侵。

趙構做皇帝，早期起用過韓世忠、岳飛等等嘅主戰派。但係趙構係諗住守住半璧江山就算，就算喺岳飛大破金兵之後，都係接受割地同金國講和，仲處死咗岳飛，罷免咗韓世忠，起用秦檜做宰相。

1141年宋金達成「紹興和議」。趙構殺咗岳飛之後，金人放番趙構親生阿媽返去南宋。

1161年，金國海陵煬王完顏亮唔理兩國和議，親自帶大軍進攻南宋，但係喺長江受阻，最終喺完顏亮被耶律元宜殺死之後金兵撤退。

1162年趙構將皇位禪位畀太子趙眘，是為宋孝宗。宋孝宗上台後馬上為岳飛平反，但趙構並冇阻撓。

1187年，宋高宗去世，享年81歲，謚號受命中興全功至德聖神武文昭仁憲孝皇帝，葬喺永思陵。

宋高宗淨係得一個親生仔趙旉，但夭折咗，追謚元懿太子。