法國大革命

出自維基百科,自由嘅百科全書
1789年7月14號嘅巴士底監獄暴動

法國大革命粵拼faat3 gwok3 daai6 gaak3 ming6Révolution françaiseFrench Revolution)係1789年去到1799年期間,一段激進主義喺法國以至歐洲政治同社會上橫行嘅時期。統治法國多個世紀嘅絕對君主制封建制度喺三年內瓦解。法國喺呢段時期經歷咗好大轉變:過去嘅封建、貴族同宗教特權不斷受到自由主義政治組織及上街抗議嘅民眾衝擊,傳統觀念逐漸俾全新嘅天賦人權、三權分立等民主思想取代。

法國大革命始於1789年5月嘅三級會議,革命第一年第三等級嘅革命民眾喺6月發表網球場宣誓,7月14號攻佔巴士底監獄,8月發表人權及公民權宣言,10月凡爾賽婦女遊行迫使法國王室喺10月返巴黎。之後嗰幾年間出現咗自由議會同埋保王派喺改革方面嘅角力戰。

1792年9月法蘭西第一共和國成立,1793年送路易十六斷頭台。外部壓力亦都影響到法國大革命嘅發展,法國大革命戰爭喺1792年爆發,法國贏咗一場成個世紀以來未贏過嘅仗,攞咗意大利半島大部份嘅地同埋萊茵河以西嘅地方。而喺國內,民眾情緒日益高漲導致1793年至1794年恐怖統治嘅產生。羅伯斯庇爾同埋雅各賓派倒台之後,督政府由1795年開始掌權,直到1799年霧月政變拿破崙上台。

法國大革命拉開咗現代社會嘅序幕,共和國嘅成長、自由民主思想嘅傳播、現代思想嘅發展以及國家之間大規模戰爭嘅出現都係呢次革命嘅產物。