基因流動

基因流動（粵音：gei1 jan1 lau4 dung6 / gene flow）係遺傳學同進化論概念，講緊一個個體群嘅遺傳差異轉移到第二個個體群。如果轉移程度夠大，令到兩個個體群嘅等位基因頻率變得一樣，噉就可以將佢哋睇成同一個個體群。

呢張圖係解釋基因流動嘅示意圖。假設有兩班雀仔（A 同 B），中間俾座山分隔開。箭咀表示基因點樣傳遞：A 族群有啲雀仔有藍色羽毛嘅等位基因，當中有一隻飛去咗 B 族群嘅地方，喺嗰度搵到伴侶生仔，令到 B 族群第一次出現藍色羽毛嘅細路。可以參考顯性。

影響

唔同物種之間嘅基因流動會牽涉到叫做橫向基因轉移嘅嘢－即係基因由一隻生物傳到另一隻唔係佢親生仔女嘅生物度。呢啲情況通常發生喺細菌度，仲會令到醫學研究好頭痛：當啲細菌俾藥殺，啲冇抗藥性嘅死晒，得返啲抗藥性強嘅生存落嚟，跟住繁殖，生出嚟嘅下一代都有抗藥性（因為抗藥性係基因決定），令到成個物種嘅抗藥性愈嚟愈強。仲有，細菌可以透過橫向基因轉移，將自己抗藥性嘅基因傳畀第啲物種嘅細菌，令到好多種細菌都有抗藥性。