遺傳演算法

遺傳演算法（genetic algorithm，簡稱「GA」）係一種建基於進化論物競天擇過程嘅一種機械學習演算法：喺進化論上，一個族群內部嘅生物個體（例如一群人類）彼此之間或多或少噉喺遺傳上有所差異，而呢啲差異會引致佢哋喺表現型（包括外表、行為、同體質等）上有個體差異，當中佢哋有啲生存同繁殖會比較叻，所以就更加有機會將自己啲遺傳基因傳俾下一代。假設環境唔變，個族群就會一代一代噉喺遺傳上有變異，變到愈發適合喺嗰個環境生存同繁衍。遺傳演算法就係受呢個理論啟發嘅一種演算法。