人形機械人
人形機械人（粵音：jan4 jing4 gei1 haai6 jan4 | 英文：android）係指特登整到好似人噉嘅樣嘅機械人。
科幻
[編輯]人形機械人喺科幻文學入面長期佔有重要地位。其中最具影響力嘅作品包括阿西莫夫（Isaac Asimov）嘅《I, Robot》同《The Caves of Steel》，書中嘅機械人受「機械人三大定律」規範，對後世影響深遠。菲獵 K 迪（Philip K. Dick）嘅小說《人形機械人會唔會夢見電子羊》描寫幾可亂真嘅 人形機械人，引發對同理心同人工生命倫理嘅討論，後來改編成電影《銀翼殺手》（Blade Runner）。更早期嘅作品如卡雷爾恰佩克（Karel Čapek）嘅舞台劇《R.U.R.》 (Rossum’s Universal Robots) ，不但描寫機械勞工反抗人類，亦首次引入「Robot」一詞。
喺電影同電視作品方面，人形機械人係科幻題材嘅常見元素。著名角色包括《新星空奇遇記》入面努力理解人類情感嘅 Data、《銀翼殺手》系列中嘅仿生人（Replicants）、《異形》系列入面嘅 Ash 同 Bishop、《人造意識》（Ex Machina）嘅 Ava，以及《未來戰士》系列由阿諾舒華辛力加飾演嘅終結者（terminator）。呢類作品通常圍繞程式設定同自我意識之間嘅衝突，以及人類創人形機械人智能，所帶嚟嘅社會同倫理後果。
喺日本動畫同漫畫之中，人形機械人亦成日都見，而且角色類型多樣。代表作包括手塚治虫創作嘅《阿童木》，視之為日本最早同最具影響力嘅人形機械人角色；《攻殼機動隊》入面嘅草薙素子同其他仿生人；《龍珠》系列嘅人造人 16、17、18 號；《新世紀福音戰士》嘅綾波麗；以及電子遊戲《NieR: Automata》入面嘅 2B 同 9S。日本作品經常模糊人形機械人 同改造人之間嘅界線，重點探討自我、記憶同靈魂等哲學議題。
喺電子遊戲領域，人形機械人經常成為可操作角色或者世界觀核心元素。《Detroit: Become Human》以 Android 爭取權利同自我意識作為主題；《洛克人》（Mega Man）系列描寫擁有人格人性嘅人形機械人；《NieR: Automata》透過 Android 士兵探討存在主義；另外《System Shock》、《Deus Ex》同《Fallout》系列亦大量涉及仿人機械人或人工人類（如 Synth）嘅倫理與政治問題。整體而言，人形機械人作為一種敘事工具，持續用嚟反思科技發展對人類社會同自身存在嘅影響。
睇埋
[編輯]
 |