蒸汽鬅客
蒸汽鬅客（英文：steampunk）係一種科幻子文類同美學，特徵係故仔入面啲科技嘅外觀設計建基於 19 世紀嘅工業用蒸汽機。
基礎
[編輯]睇埋：科幻
蒸汽鬅客係一種用舊式美學嘅科幻類型，最大特徵係故仔入面啲科技嘅外觀設計建基於 19 世紀嘅工業用蒸汽機[1]。蒸汽鬅客受到數碼鬅客同 19 世紀尾（維多利亞時代）嘅英國文學影響，試圖用 19 世紀尾嘅英國做故仔嘅背景美學，有以下呢啲特徵[2]：
- 蒸汽鬅客故仔背景嘅建築物會傾向用返嗰個時期嘅英國建築風格；
- 蒸汽鬅客故仔角色著嘅衫會似嗰個時期啲人著嘅衫；
- 故仔入面啲科技就算幾先進，外觀上都會模仿當時英國人所用嘅蒸汽機，靠蒸汽發動；
- 故仔好多時甚至係直頭將個背景設喺架空版嘅 19 世紀尾英國... 等等。
蒸汽鬅客一般都比較傾向於軟科幻：事實係，19 世紀尾嘅蒸汽機喺各種性能上都遠遠不如現時用嘅機械，所以蒸汽鬅客故仔對於「點解呢啲蒸汽機能夠做到咁多現時機械都做唔到嘅嘢」通常答案都係唔清唔楚；而且蒸汽鬅客作品好多時仲會結合奇幻同恐怖等嘅超自然元素（超自然元素可以幫手解釋「點解呢啲蒸汽機咁勁」）；呢啲特徵對於講求科學上要準確嘅硬科幻嚟講好難接受[橋 1]。
