跳去內容

軍事科幻

出自維基百科，自由嘅百科全書
《世界大戰》裏面嘅一個場景；個場景描述作者想像中火星人戰爭機械同地球戰艦戰鬥。
2008 年美國海軍電磁軌道炮試射；電磁軌道炮本來係一種空想武器，但喺廿一世紀初成為現實。

軍事科幻（粵拼：gwan1 si6 fo1 waan6；英文：military science fiction）係科幻下嘅一隻文類，廣義上泛指用到軍事同軍事科技相關主題嘅科幻作品，可硬可軟：响一個典型嘅軍事科幻故仔當中，主角會係一個軍人或者最少有軍事背景嘅人，背景設定設喺一個打緊仗或者啱啱打完仗嘅世界，而呢個世界入面嗰啲武器同第啲軍事科技會明顯先進過現實世界嘅；好似係《高達》同《合金裝備》都可以算係軍事科幻嘅例子[1][2]。

軍事科幻當中常見嘅橋段主要有四大類[1][2][3]：

... 等等。

寫軍事科幻嘅作家一般會對當代嘅軍事科技同軍事組織有返咁上下熟：比較硬嘅軍事科幻作品往往要建基於當代嘅軍事科技，仲要解釋呢啲軍事科技點解喺實際作戰上可行，例如廿世紀軍事科幻當中出現嘅激光同電磁脈衝等武器都係廿世紀軍事科技界廣受注目嘅諗頭；除咗呢啲技術嘢，軍事科幻仲要求寫嘅人了解軍隊嘅管理，清楚知軍人嘅同輩之間以及同上司應該係點樣互動嘅。事實係，寫軍事科幻嘅作家好多時都曾經做過軍人[4][5]。

定位

[編輯]
睇埋：科幻同軍事虛構故仔

對於軍事科幻嘅定義，寫咗多部軍事科幻小說作品嘅美國作家大衛韋伯噉樣講[6]：

「
粵譯：對我嚟講，軍事科幻係指「喺本質上理解軍人生活方式以及角色同平民生活方式以及角色之間有乜差異之下，寫出軍事境況」嘅科幻作品。軍事科幻係嘗試喺科幻嘅景況下真實噉描繪軍隊。軍事科幻唔係（描繪）「蟲開槍」，而係講人類同第啲物種（例如外星人）被卷入戰爭同殺戮當中。軍事科幻唔係對問題俾簡單化答案嘅藉口。
」

喺最廣義上，軍事科幻可以包嗮有軍事相關主題嘅科幻作品：科幻（SF）係廿一世紀最重要嘅虛構故仔文類之一；廿一世紀初敘事學對科幻嘅定義未有一致共識，不過一般嚟講，科幻故仔嘅背景設定會設喺未來嘅世界，會有一啲（由份作品出嘅年代嘅角度睇）極先進嘅科技；喺主題上，科幻好多時都會集中於一啲當代有關科學同科技嘅哲學問題，常用嘅橋段包括咗似人嘅人工智能（AI）以及機械人等等[7]。軍事科幻就係泛指有科幻應有嘅特性、又包含軍事相關主題嘅作品－呢啲主題可以包括（例如）講想像中嘅先進人工智能同機械人技術喺打仗上嘅應用[2]。

軍事科幻可以軟（指真實性低嘅科幻作品），例如係《星戰》等情節有講到打仗嘅太空歌劇作品噉，好多時就連基本嘅物理都搞唔清楚，或者係有超自然成份，不過呢啲作品就靠住情節當中所展現嘅人性（例如係啲角色嘅發展）引起觀眾嘅共鳴；軍事科幻又可以硬（指追求真實性高嘅科幻作品），故仔內容會講到現實世界真係開發緊嘅軍事科技，並且用故仔嘅情節展示作者預想中軍事科技對未來嘅人同社會可能造成嘅（負面）影響，以及係反思打仗對士兵嘅心理影響等嘅嚴肅課題[8][9]。

2012 年一位科幻作者想像中嘅未來軍車
2012 年一位科幻作者想像中嘅未來軍車
 

未來武器

[編輯]
内文：未來武器

未來武器泛指科幻作品當中出現、俾人覺得係「未來化」嘅武器：軍事科幻作品成日會想像未來科技所創造嘅武器，例子包括廿世紀科幻當中好出名嘅《星戰》入面嘅激光劍同埋好多科幻故仔都有嘅死光槍呀噉，而比較硬嘅軍事科幻作品仲會思考大殺傷力武器（WMD）等嘅課題同相關嘅道德爭議所引起嘅角色衝突。

廿至廿一世紀初嘅科幻作品當中常見嘅未來武器有以下呢啲：

能量武器

[編輯]
2006 年用激光嚟做焊接
内文：能量武器

能量武器（DEW）泛指靠射出高度集中嘅能量嘅長距離武器[10]。

  • 死光槍：泛指能夠射出能量嚟造成破壞嘅武器，常見於軟科幻；喺多數故仔入面，當一個揸住死光槍嘅人掹雞嗰陣，支槍會射出一束光線[註 1]，而呢啲光線打中人或者物件就會造成傷害[11]。有啲作品仲會描繪唔同類型嘅死光槍，例如冷凍光係一種常見嘅軟科幻橋段，指俾佢射到會結冰嘅死光，例子可以睇蝙蝠俠漫畫當中嘅奸角急凍人用嘅武器[橋 1]。
  • 聲波武器：指靠射出強勁嘅聲波嚟對目標造成傷害嘅武器；實驗顯示，當一隻老鼠俾 184 dB 嘅聲射到嗰陣，佢嘅肺同肝都會受損，而喺人當中，持續聽到極低頻嘅聲聽 15 分鐘就有可能對腦部組織造成永久嘅影響－聲可以係好有殺傷力嘅武器[12]。
  • 激光武器：激光係指透過某啲特定類型嘅光放大器而產生嘅極強光；呢啲光帶嘅能量可以好勁，勁到可以一嘢射盲人嘅眼，甚至係可以攞嚟做焊接等嘅工作，所以自然有可能攞嚟做武器。廿世紀嘅軟科幻作品好多時會對激光有唔真實嘅描繪，例如激光係光，所以會以光速前進，但軟科幻作品成日將佢哋嗰啲所謂「激光」描繪成以好似一般子彈噉嘅速度前進[13]。比較真實嘅激光武器例子就可以睇吓 RTS 遊戲《終極動員令系列》（C & C）當中嘅美軍用嘅衛星激光武器。
  • 粒子束武器：指內置粒子加速器嘅武器；呢啲武器會用加速器將得原子咁大粒或者再細啲嘅粒子以極高嘅速度（光速咁滯）射向目標，破壞目標嘅原子或者分子結構；原則上，粒子束武器射出嘅粒子帶嘅動能（指物體因為郁動而有嘅能量）可以去到成 109 J 咁高，足以打穿任何已知嘅裝甲或者牆[14]。

WMD

[編輯]
核武造成嘅蘑菇雲；蘑菇雲會喺地面有極大熱能出現嗰陣產生，喺火山爆發嗰時都會見到。
内文：大殺傷力武器
睇埋：末日幻想

大殺傷力武器（WMD，嚟自英文 weapon of mass destruction）係指大規模範圍屠殺同破壞毀滅嘅區域戰略武器，有唔少軍事科幻作品都會講及人使用大殺傷力武器嚟導致巨大嘅破壞，表達作者對未來軍事科技能夠達到嘅破壞力嘅不安感[15][16]。

第啲武器

[編輯]
  • 機甲（片假名：メカ；日羅：meka）[註 4][橋 3]：機甲係廿世紀軍事科技上嘅一種構想，指由人類直接操作嚟戰鬥嘅巨型機械，可以但唔一定係人噉嘅形狀。機甲除咗文學同漫畫作品之外，亦都常見於用科幻美學嘅電子遊戲，用意係想俾玩家一嘗揸或者指揮機甲嘅快感。一般嚟講，機甲可以按真實度分類：
    • 軟科幻作品入面嘅機甲通常會比較似人形、由少數幾個角色控制、而且戰鬥力誇張到可以一部打低成支敵軍，例如《變形金剛》就描繪曉由車或者飛機呢啲平凡嘢變身做巨型機械人嘅機甲，而《悍戰太平洋》就有成座大廈咁高、一架可以當一支軍隊嘅巨型機甲。可以睇埋《機動戰士高達》等嘅作品。
    • 硬科幻作品入面嘅機甲就比較真實，通常望落似「有腳嘅坦克車」多過似人形、會大量生產俾軍隊大規模噉採用，而且戰鬥力未至於勁到可以一部打成支敵軍，而係會好似現實世界嘅坦克車或者戰鬥機噉以團隊同有策略嘅方式作戰。例子可以睇科樂美嘅《合金裝備》同 Square Enix 嘅《前線任務》。
  • 電磁軌道炮：指運用電磁力以極高速度射出炮彈嘅炮，電磁軌道炮嘅炮彈通常唔帶炸藥，而係齋靠粒炮彈嘅動能嚟對目標造成傷害。到咗 2020 年，電磁軌道炮經已能夠做到以超過秒速 3 km 嘅速度射出炮彈－相比之下，同期用炸藥能量嚟射出嘅炮彈嘅速度好少可會過到秒速 2 km；不過就算到咗 2010 年代，電磁軌道炮都仲係因為唔夠襟用等嘅原因而未能得到軍隊實際採用[21]。
  • 電磁脈衝（EMP）：指由帶電荷粒子突然好勁噉加速而引起嘅短暫強勁電磁能量脈衝；EMP 所帶嘅能量可以搞到周圍過得到電嘅物體突然間出現強勁嘅電流同加熱，而呢點可以破壞電子架生入面嘅電路－所以 EMP 可以用嚟達到破壞敵軍嘅電子架生嘅效果。科幻故仔成日會講比起現實嘅 EMP 更先進更受控嘅 EMP 俾人攞嚟喺軍事上做干擾嘅用途[22]。
  • 動力服：指一啲人可以著上身嘅機械，用意在於想要提升個人嘅力量同耐力；喺現實世界，呢啲科技可以用嚟幫人搬重嘢或者幫有殘疾嘅人行路等嘅用途[23]。唔少科幻作品都會描繪動力服俾人攞嚟做軍事用途，例如係著住能夠幫人飛天同裝有武器嘅動力服戰鬥，例子可以睇鐵甲奇俠嘅相關漫畫[橋 4]。
  • 太空武器：泛指喺太空戰當中用嘅武器。
    • 反衛星武器（ASAT）：指用嚟為咗軍事目的破壞或者阻礙人造衛星嘅武器－喺好多國家同地區，人造衛星都對通訊嚟講不可或缺，所以反衛星武器理論上能夠造到暫時封鎖敵方通訊等嘅效果[24]。呢種武器到咗廿一世紀初經已成為現實，例如美國海軍就喺 2008 年 2 月 21 號用由一架船上射出嘅導彈破壞自身一個出咗故障嘅間諜衛星[25]。
    • 天基動能武器：源於冷戰時期嘅一種構想；指由人造衛星將一啲物體揼落去一粒行星嘅表面上，用意在於破壞行星表面嘅目標；原則上，天基動能武器可以好勁－天基動能武器揼嘅物體可以以好高角度同速度攻擊目標，所以極難防禦，不過到咗廿一世紀初，因為成本等嘅問題，呢種武器仲係一種構想。順帶一提，因為預想中嘅天基動能武器揼嘅係粗嘅金屬棒，所以呢種武器又有個花名叫「由上帝嗰度嚟嘅棒」[26]。用科幻美學嘅射擊遊戲《Halo》入面就有提到天基動能武器。

第啲橋段

[編輯]
一幅畫描繪畫畫人想像中穿越雲層嘅軌道𨋢。
睇埋：軍事科技同軍事工程

除咗未來武器之外，廿世紀同廿一世紀初嘅軍事科幻常用嘅橋段仲有以下呢啲[27][28]：

太空橋段

[編輯]
睇埋：太空戰
  • 太空戰：指喺太空當中發生嘅戰鬥；廿世紀嘅世界並冇太空戰，但科幻作家就對太空戰充滿幻想－太空嘅環境同地球大氣層明顯唔一樣，所以會用到同地球內行動嘅空軍截然不同嘅技術，例如因為冇空氣阻力而唔使係噉加速都可以一路向前飛；《星戰》等嘅太空歌劇作品成日會描繪唔係咁真實嘅太空戰[29]。
  • 軌道𨋢：係廿世紀嘅一種工程學構想；一部軌道𨋢會有一條好粗嘅纜，條纜其中一端固定咗喺地面，而另一端就一路延伸到去大氣層外面嘅空間嗰度，而且喺太空嗰端仲連住一嚿有返咁上下質量嘅物體，嗰嚿物體會圍住地球、以同地球自轉一樣嘅角速度公轉（所以會永遠對住地表嘅一個位置）。而有咗呢條噉嘅纜，地表嘅人就可以（例如）唔使用火箭，而係開纜車直接載人同貨物上去太空嗰度[30]。例如日本漫畫作品《銃夢》就有描繪浮喺地球大氣層當中嘅城市以軌道𨋢嘅方式連接住喺太空當中嘅城市。
  • 外星人侵略地球：指個故仔講外星人侵略地球；用呢條橋嘅軍事科幻一般會集中講地球嘅軍人點樣同外星人戰鬥，相對於非軍事性質嘅科幻作品－後者比較可能講主角係平民同埋嘗試喺受外星人侵襲嘅地球生存。一般認為，呢條橋係由 H. G. 威爾斯喺 1898 年出嘅科幻小說《世界大戰》創始嘅[橋 5]。
    • 似昆蟲嘅外星人：指故仔當中嘅外星人外形上似昆蟲；原則上，人一般對會有面部表情嘅生物有好感，而昆蟲喺身體結構上同人有好大差異，令到人比較容易視佢哋做冇感情但有威脅性嘅生物－啱嗮大批噉攞嚟俾主角殺死，例子可以睇吓羅拔海萊因喺 1959 年出嘅科幻小說《星河戰隊》噉[橋 6][31]。

軍人橋段

[編輯]
睇埋：超級士兵同數碼鬅客
  • 超級士兵：常見於科幻嘅一種固定角色，係指用技術改造過、能力遠超常人嘅士兵－大力啲、跑得快啲、耐力好啲、甚至有超能力，所以戰鬥力勁過一般嘅士兵好多；超級士兵嘅超強戰鬥力可以源自基因工程、藥物或者手術等嘅技術，而用咗呢條橋段嘅作品好多時係想探討軍事科技對人類同人性嘅影響[橋 7]。
  • 基因複製軍隊：基因複製係指用遺傳學技術創造出同一隻生物完全一樣嘅個體，而有啲科幻作品有講軍隊用基因複製技術大量噉複製擅長戰鬥嘅個體，用意在於想製作出勁嘅軍隊；例如 2002 年嘅科幻片《星球大戰前傳II：複製人侵略》就有講由基因複製人組成嘅軍隊[橋 8]。
  • 軍階：係任何現代國家嘅軍隊（以至警隊同情報機構）都用嘅一套系統；喺一個軍階系統入面，每一個個體都會有一個階級，出名嘅階級有二等兵、軍曹同上校呀噉，高級嘅個體權力比較大，人工通常比較高，不過責任原則上會比較大（即係出起事上嚟比較大機會要孭鑊）。軍階呢樣嘢好大程度上噉主宰住軍人同事之間嘅互動[32]。
  • 創傷後心理壓力緊張症候群（PTSD）：指人喺遭遇某啲重大嘅心理壓力之後，好多時會出現嘅一種心理狀態失調。PTSD 嘅患者喺受到過度緊張驚嚇嘅事件之後會成日回想起成件事嘅經過，同時情緒上會出現強烈同持續嘅無助、恐懼同焦慮，出現冒汗同心悸等等嘅症狀，亦會因而記憶力同注意力變差。PTSD 呢種病喺上過陣打仗嘅士兵身上相當常見[33][34]。
  • 軍人傳統嘅價值觀：喺主題上，軍事科幻好多時都會提及勇氣（上陣打仗要面對危險）、忠誠（軍人往往會為國家搏命）、使命感（軍人要團隊行動，要為自己嘅團隊負責任）以及係自我犧牲等傳統軍人重視嘅價值，而故仔唔同角色可能會對呢啲價值抱持唔同嘅睇法[35]。

拉雜橋段

[編輯]
  • 網絡戰：泛指運用電腦網絡等嘅資訊科技技術嚟達到軍事目的，簡單嘅例子有嘗試請黑客盜取敵國嘅軍事情報；1975 年嘅 cyberpunk 小說《衝擊波騎士》一般被認為係創始咗網絡戰呢個諗頭嘅作品[36]，而網絡戰呢家嘢喺廿一世紀經已成為咗現實－世界各國都會投入資源建立網絡防禦，防範第啲國家透過電腦網絡偷走重要情報[37]。

簡史

[編輯]
睇埋：科幻史

一般認為，軍事科幻係喺廿世紀中成為科幻嘅一個子文類嘅：科幻呢家嘢早喺 17 世紀嘅歐洲經已存在[38]，而 19 世紀亦有科幻作品提及打仗相關嘅主題；到咗廿世紀中，羅拔海萊因喺 1959 年寫嘅《星河戰隊》等嘅作品為軍事科幻開咗先河，令人認定軍事科幻係一個正式嘅文學體裁；打後《星戰》以及係用咗軍事科幻美學嘅電子遊戲作品－例如係《星際爭霸》－等嘅文化產品大受歡迎；另一方面，美國打完越戰之後，有好多軍人退咗伍就改行做作家，開始創作軍事科幻，例如大衛·德雷克就打過越戰，退伍之後寫咗一連串嘅軍事科幻短篇小說，俾人收錄咗喺《Hammer's Slammers》呢本文集入面。上述因素令「有軍事主題嘅科幻」喺廿世紀中後期大舉進入社會大眾嘅意識，而到咗廿一世紀，軍事科幻經已確切噉成為科幻嘅一個子文類[39]。

軍事科幻用嘅技術型橋段被指會對現實世界嘅軍事科技有影響：有唔少研究軍事科技嘅工程師都有參考軍事科幻作品當中嘅諗頭，甚至仲有軍界人士會攞軍事科幻作品嘅內容做軍事教育教材，教導士兵想像軍人喺面對某啲可能出現嘅科技嗰陣，要用點樣嘅戰略嚟應對；而事實係正如上面提到，核武同網絡戰等廿一世紀嘅人習以為常嘅軍事科技喺廿世紀嗰陣都曾經屬於空想科幻嘅範疇[40]。

對於軍事科幻對軍事科技嘅影響，美國文化史學家 H·布魯斯·富蘭克林就噉樣講[41]：

「
粵譯：如果要創造出能夠威脅我哋存在嘅物件（末日機等），就實要有人將呢啲物件想像出嚟先。然後要實際建造呢啲武器，更多嘅人就需要想像個結果－一個（由呢啲武器引致嘅）未來－而且覺得個結果係可取嘅。所以我哋實際嘅超級武器實係源於呢啲武器嘅想像史，而想像史係文化不可或缺嘅一部份。
」

名作

[編輯]

俾人分類做軍事科幻嘅出名作品有以下呢啲（以第一部作品出嘅日期作準）：

... 等等。

睇埋

[編輯]

註釋

[編輯]
  1. ↑ 呢啲光線可以係好似真實嘅光噉以光速前進，不過喺唔係咁重視科學準確嘅軟科幻作品當中，呢啲所謂嘅「光線」會以好似一般子彈噉嘅速度前進。
  2. ↑ 原則上，病毒唔完全算係生物。
  3. ↑ 不過佢想像中嘅核彈同最後現實整出嚟嘅有少少唔同：佢想像中嘅核彈一吓嘅殺傷力同一般炸藥冇咩大分別，但會持續連日爆炸。
  4. ↑ Mech. Giant Bomb.

文獻

[編輯]

引述

[編輯]
  1. ↑ 1.0 1.1 Gray, C. H. (1994). "There Will Be War!": Future War Fantasies and Militaristic Science Fiction in the 1980s (PDF). Science Fiction Studies, 315-336.
  2. ↑ 2.0 2.1 2.2 A GUIDE TO SCIENCE FICTION SUBGENRES. SciFi Ideas.com.
  3. ↑ Alcena M. D. Rogan. (2006). The Actual Qualities of Imaginative Things: US War/Militarism and Science Fiction. Science Fiction Studies, 33(2), 371-374. Retrieved October 14, 2020, from http://www.jstor.org/stable/4241449
  4. ↑ Former troops building second careers in military science fiction.
  5. ↑ Nicholson, B. (2016). A Literary and Cultural History of Military Science Fiction and the United States of America, 1870s-2010s (Doctoral dissertation, University of Waikato).
  6. ↑ "In Honor I gained them". Interview by Stephen Hunt，原版英文："For me, military science-fiction is science-fiction which is written about a military situation with a fundamental understanding of how military lifestyles and characters differ from civilian lifestyles and characters. It is science-fiction which attempts to realistically portray the military within a science-fiction context. It is not "bug shoots." It is about human beings, and members of other species, caught up in warfare and carnage. It isn't an excuse for simplistic solutions to problems."
  7. ↑ Luckhurst, R. (2010). Science fiction. The Encyclopedia of Literary and Cultural Theory.
  8. ↑ MILITARY SCIENCE FICTION: YOUR BEGINNER'S GUIDE TO THE GENRE. Book Riot.
  9. ↑ SCI-FI MILITARY TECHNOLOGY[失咗效嘅鏈]. Almost an Author.
  10. ↑ The E-Bomb: How America's New Directed Energy Weapons Will Change the Way Future Wars Will Be Fought. Doug Beason (2005).
  11. ↑ Jeff Prucher, Brave New Words: The Oxford Dictionary of Science Fiction, Oxford University Press, 2007, p. 162.
  12. ↑ Goodman, Steve (2012). Sonic Warfare: Sound, Affect, and the Ecology of Fear. MIT Press.
  13. ↑ Ghoshroy, Subrata (2015-05-18). "Navy's new laser weapon: Hype or reality?". Bulletin of the Atomic Scientists.
  14. ↑ Parmentola, J., & Tsipis, K. (1979). Particle-beam weapons. Scientific American, 240(4), 54-65.
  15. ↑ Curley, Robert, ed. Weapons of Mass Destruction (Britannica Educational Publishing, 2011).
  16. ↑ Franklin, B. (1980). Robert A. Heinlein: America as science fiction. Oxford University Press.
  17. ↑ Eldridge, John, ed. (2006). Jane's Nuclear, Biological and Chemical Defense 2006–2007 (19th ed.). Coulsdon, Surrey, UK; Alexandria, Va.: Jane's Information Group.
  18. ↑ "Atomic Power for War and Peace". Popular Mechanics. October 1945. pp. 18–19.
  19. ↑ "Frequently Asked Questions #1". Radiation Effects Research Foundation. Archived from the original on September 19, 2007. Retrieved September 18, 2007. total number of deaths is not known precisely ... acute (within two to four months) deaths ... Hiroshima ... 90,000–166,000 ... Nagasaki ... 60,000–80,000.
  20. ↑ Parrinder, Parrinder (1997). H.G. Wells. Routledge. p. 11.
  21. ↑ "Rail Strike". The Economist. 2015-05-09.
  22. ↑ Nuclear Weapon EMP Effects.
  23. ↑ Blake McGowan (2019-10-01). "Industrial Exoskeletons: What You're Not Hearing". Occupational Health & Safety.
  24. ↑ Garwin, R. L., & White, A. D. (1984, August). Antisatellite weapons. In Electro-Culture 1984 (Vol. 474, pp. 87-94). International Society for Optics and Photonics.
  25. ↑ "US shoots down rogue satellite". News24.
  26. ↑ The Air Force's 'rods from god' could hit with the force of a nuclear weapon — with no fallout. Business Insider.
  27. ↑ Ender M.G., Reed B.J., Absalon J.P. (2020) Popular Culture and the Military. In: Sookermany A. (eds) Handbook of Military Sciences. Springer, Cham.
  28. ↑ From Sci-Fi to Reality: The Future of Warfare.
  29. ↑ Hobbes, D. (1986). "Illustrated Guide to Space Warfare". Salamander Books Ltd.
  30. ↑ "What is a Space Elevator?". The International Space Elevator Consortium. 2014.
  31. ↑ Mantis Aliens. Gaia.
  32. ↑ Dean, L. M., Willis, F. N., & Hewitt, J. (1975). Initial interaction distance among individuals equal and unequal in military rank. Journal of Personality and Social Psychology, 32(2), 294.
  33. ↑ Rothbaum, B. O., Hodges, L., Alarcon, R., Ready, D., Shahar, F., Graap, K., ... & Baltzell, D. (1999). Virtual reality exposure therapy for PTSD Vietnam veterans: A case study. Journal of Traumatic Stress: Official Publication of The International Society for Traumatic Stress Studies, 12(2), 263-271.
  34. ↑ Ray, S. L., & Vanstone, M. (2009). The impact of PTSD on veterans' family relationships: An interpretative phenomenological inquiry. International Journal of Nursing Studies, 46(6), 838-847.
  35. ↑ Waterson, Rick (2008-11-14). "Welcome to Windycon 35!". Windycon Program Book. Palatine, Ill.: ISFiC. 35: 1.
  36. ↑ Ravo, Nick; Nash, Eric (August 8, 1993). "The Evolution of Cyberpunk". New York Times.
  37. ↑ Andress, Jason. Winterfeld, Steve. (2011). Cyber Warfare: Techniques, Tactics and Tools for Security Practitioners. Syngress.
  38. ↑ Asimov, Isaac (1977). The Beginning and the End. New York: Doubleday.
  39. ↑ "Defining the Genre: Military Science Fiction". Fandomania. 2008.
  40. ↑ The U.S. Military Is Turning to Science Fiction to Shape the Future of War. OneZero.
  41. ↑ Franklin, H. B. (2008). War Stars: the superweapon and the American imagination. University of Massachusetts Press，原版英文："To create the objects that menace our existence, some people first had to imagine them. Then to build these weapons, a much larger number of people had to imagine consequent scenarios - a resulting future - that seemed desirable. Thus our actual superweapons originated in their imagined history, which forms a crucial part of our culture."

電視橋段網嘅網頁：

  1. ↑ 可以睇 TV Tropes 嘅 Freeze Ray。
  2. ↑ 可以睇 TV Tropes 嘅 Doomsday Device。
  3. ↑ 可以睇 TV Tropes 嘅 Real Robot Genre。
  4. ↑ 可以睇 TV Tropes 嘅 Powered Armor。
  5. ↑ 可以睇 TV Tropes 嘅 Alien Invasion。
  6. ↑ 可以睇 TV Tropes 嘅 Bug War。
  7. ↑ 可以睇 TV Tropes 嘅 Super Soldier。
  8. ↑ 可以睇 TV Tropes 嘅 Clone Army。

拎

[編輯]
由「https://zh-yue.wikipedia.org/w/index.php?title=軍事科幻&oldid=2220351」收