時間悖論

出自維基百科,自由嘅百科全書
跳去導覽 跳去搵嘢
篤波引起嘅時間悖論嘅圖例

响廿一世紀初,時間悖論si4 gaan3 bui3 leon6英文time paradox / temporal paradox)係 sci-fisaai1 faai1物理學時間相關研究上成日提到嘅一個概念,包括一啲時空穿梭會引起嘅悖論或者矛盾

自從廿世紀開始,sci-fi 同第啲文化產物就成日對時空穿梭作出各種嘅幻想,用時空穿梭做橋段:有好多工作者(例如係寫 sci-fi 嘅作家)諗深一層發覺,如果時空穿梭真係成真,似乎會引起好多唔合邏輯嘅嘢;廣義上嘅「時間悖論」就係泛指「時空穿梭成真」會引起嘅呢啲問題。物理學研究亦有用時間悖論嚟做思想實驗

基本定義[編輯]

睇埋:時空穿梭同埋因果關係

時間悖論定義上可以係指[1]

原版英文:"... a hypothetical contradiction of cause-and-effect within a timeline that results from traveling back in time"
粵文翻譯:(時間悖論係)一場假想中源於有人返咗過去嘅時空而起嘅時間線因果關係矛盾

舉個具體例子,睇住文頭幅圖例,想像家陣有個篤波用嘅黑色八號波,

  • 時間點 1:有人一嘢篤個波,令個波向前郁動
  • 時間點 2:個波沿住直線郁動期間,突然有第個波由佢左邊(由個波角度睇)撞佢,搞到佢向右飛;
  • 時間點 3:個波飛咗若干距離後,有人用時光機令佢返到過去,並且响時間點 2 撞到過去嘅自己

-喺呢個過程當中,一件响將來發生嘅事(個波响時間點 3 嘅郁動)似乎引起咗一件响過去發生嘅事(個波响時間點 2 畀第個波撞到)。呢點畀人認為係一個悖論-因為一般認為,因果關係其中一個重點特徵係,時間上係要發生响之前嘅[2]

祖父悖論[編輯]

內文:祖父悖論

祖父悖論(grandfather paradox)係一個好出名嘅時間悖論。最基本嗰款祖父悖論係噉嘅:想像而家有個人,叫佢做「阿明」,阿明坐住時光機返咗上一個世紀;阿明時空穿梭嗰陣唔小心,錯手殺死咗自己阿爺[註 1];噉問題就出現喇-「阿明阿爺存在並且結婚生細路」係「阿明存在」嘅必要條件,如果一個人响生到任何細路之前就死咗,噉佢嘅孫理應會冇可能再存在,但响阿明嘅情況當中,「阿明存在」係「阿明阿爺响生到任何細路之前就死咗」嘅起因,噉即係話[2]

  • 設 A 做「阿明阿爺存在並且結婚生細路」;
  • 設 B 做「阿明存在」;

A 引起 B 而且係 B 嘅必要條件,但 B 嘅發生最後又搞到 A 再發生,噉 A 唔發生,(A 係 B 嘅必要條件)B 就應該唔再發生得到,不過既然 B 引致 A 唔發生,B 唔發生嘅話 A 就應該會正常噉發生... 如是者,就出現咗場矛盾

對於祖父悖論嘅問題,有唔少思考者都嘗試諗方法解開,當中諾域確夫自一致原則(Novikov self-consistency principle)就係噉諗嘅:根據諾域確夫自一致原則,一個時空穿梭返咗過去嘅人,唔會有能力引起任何冇實際發生過嘅嘢,而「阿明阿爺响生到任何細路之前就死咗」呢樣嘢冇發生,所以阿明坐住時光機返到過去嗰陣做啲乜,都唔會引起「阿明阿爺响生到任何細路之前就死咗」呢件事[3]

睇埋[編輯]

註釋[編輯]

  1. 同時假設阿明係返咗個「佢阿爺仲未結婚生細路」嘅時間點。

[編輯]

  1. time paradox. www.dictionary.com.
  2. 2.0 2.1 Lobo, Francisco (2003). "Time, Closed Timelike Curves and Causality". The Nature of Time: Geometry, Physics and Perception. NATO Science Series II. Vol. 95. pp. 289-296.
  3. Friedman, J.; M. Morris; I. Novikov; F. Echeverria; G. Klinkhammer; K. Thorne; U. Yurtsever (1990). "Cauchy problem in spacetimes with closed timelike curves". Physical Review D. 42 (6): 1915.

[編輯]