太空歌劇

太空歌劇（參見英文：space opera）係科幻虛構故事嘅一個類型，特徵係會強調浩大嘅太空戰爭同埋刺激嘅情節，成日都會加入誇張嘅劇情、英雄式嘅冒險、友情、以至戀愛等嘅題材。太空歌劇故仔通常設定喺外太空，有陣時甚至成個故事都發生喺外星、太空船，甚至係星系之間嘅空間，對地球隻字不提。

呢啲作品通常重視戲劇性，冇咁講求科學上準確。喺呢啲作品嘅虛構世界入便，角色會用到未來式嘅武器同科技，好多時會有一啲現實科學已知係冇可能嘅事，例如超光速航行、科學上唔準確嘅激光或者超級電腦等；社會亦可能非常先進，又或者退化得好離譜。常見嘅題材包括成日都會涉及銀河帝國、星際戰爭等等。

嗌法

呢種虛構故事類型雖然叫就叫做「歌劇」，但個名唔係講緊呢個體裁中嘅音樂，而係話佢哋啲故事有 melodrama 式嘅張力、情感戲，有少少似肥皂劇（英文：soap opera，呢個名字面解係指番梘歌劇噉嘅意思）。

作品

太空歌劇嘅出名作品有《星空奇遇記》同《星球大戰》等。

太空歌劇嘅一個出名例子係《銀河守護隊》。喺 2014 年嗰套戲（以及啲續集）入便，有成班風格各異、來自唔同星球嘅角色，佢哋開住太空船四圍飛，去唔同星球歷險，對抗宇宙級嘅邪惡勢力。入面唔止有打鬥、太空戰爭，仲有好強烈嘅人物關係描寫、友情同親情線，再加上一啲幽默同情感爆發，係太空歌劇嘅經典特色。

睇埋

• 軍事科幻：成日提到科幻上嘅武器。
• Cyberpunk：會講到「未來化但倒退」嘅社會。

外拎

• （英文） 太空歌劇，電視橋段網