祖父悖論

出自維基百科,自由嘅百科全書
跳去: 定向搵嘢

祖父悖論(悖讀背書嘅背,粵拼zou2 fu6 bui6 leon6)係個時間旅行悖論問題,呢個問題到而家都重未搞清楚,係個未解之謎。呢個問題係由科幻作家賀尼·白沙維喺1943年出版嘅《Le Voyageur Imprudent》(「唔小心嘅遊客」)中提出,直到而家個謎面都未變過[1]。其實呢個問題早就有人提過,甚至重複雜下添,比如羅拔·A·限闌喺佢嘅《佢條靴帶》。呢條悖論嘅面係噉嘅:

而家有個人穿越時光返咗過去,佢殺咗自己阿爺,娶咗自己阿嬤,結果就係,佢老豆出唔到世,噉呢個人就出唔到世啦,噉佢又點返得過去呢?既然佢返唔到過去殺佢阿爺,噉佢阿爺就有命,亦即呢個人出到世,噉佢同樣就可以返過去去殺佢阿爺。

咁啱呢兩個情況係相互否定嘅,亦即二存一。呢個問題屬於邏輯悖論。

雖然呢條命題嗌做祖父悖論,實際上佢並唔單只淨係講出唔出到世嘅問題。呢個問題實際上係質疑時間旅行究竟得唔得,亦即係話時間可能係根本逆轉唔到嘅。因此祖父悖論又嗌做時間旅行悖論si4 gaan3 leoi5 hang4 bui6 leon6。呢個問題有好多種變裝,比如話有個科學家甲整咗部時光機,佢返咗過去殺咗自己,如果佢殺人嘅時候喺發明部機之前嘅話,即係話部機無誕生到啦,亦就無所謂穿越時光。呢個唔單只係科學問題,亦係個哲學問題,喺哲學上嗌做autoinfanticide(意思係「臊蝦自殺」)就係話返到自己重係臊蝦嘅時候,然後殺咗自己[2]

雖然係噉,而家已經有一啲解法出爐,比如話時間係變唔到嘅,生活喺世間入面嘅人係改變唔到存在於時間之中嘅事物,亦即係種機械論,即係話世間一切係整定嘅,雖然生活其中嘅人好似有自由意志,查實佢嘅所思、所爲、所遇都係整定咗嘅,因爲過去嘅因,就有而家嘅果,重影響埋未來,既然改唔到過去,所以一切都唔由得佢話事,一切都係必然。重有一種解法,係話時空都係成雙成對嘅,即係平行宇宙理論[3]。呢個解法係話,宇宙係有多重嘅,呢個人穿越過去時,會因爲佢喺過去嘅所爲而分分鐘產生有各種唔同後果嘅平行時空,噉一來雖然佢殺咗自己阿爺,但佢可以生存,因爲佢殺嘅阿爺係喺第個時空度,而佢係來自另一個時空嘅人。又有第三種解法,係話呢個人雖然返咗過去殺佢阿爺,但係雖然佢想殺,但失咗手,或者無意之中救咗佢阿爺,於是阿爺重在生,噉佢就可以繼續出世,然後又返一次過去殺佢阿爺然後又殺唔成……即係話,佢陷入咗時空循環。

呢個科學、哲學命題又可以演繹爲史學命題,叫做希特拉悖論hei1 dak6 laai1 bui6 leon6,或者係叫希特拉暗殺悖論hei1 dak6 laai1 am3 saat3 bui6 leon6[4]。呢個悖論成爲咗幾受歡迎嘅科幻題材,即係話個主角作爲英雄穿越過去,喺希特拉撩起二戰之前就殺咗佢,阻止場大戰。不過呢度同樣就有類似嘅悖論:既然二戰都無發生,噉有乜理由要返去暗殺希特拉呢[5]?值得講嘅係,希特拉作爲風雲人物對歷史影響太大啦,佢嘅生存與否,會直接影響到二戰之後全世界人嘅生死,亦即話如果無二戰,一啲人會有命落來,而一啲人則可能出唔到世[6]。呢個史學命題可以引出諸如「歷史可否假設?」、「歷史可否改變?」,呢啲問題又會引出,歷史條件同個人力量嘅較量,亦即古往今來所講嘅「時勢同英雄」嘅問題。

[編輯]

  1. Barjavel, René (1943). Le voyageur imprudent ("The imprudent traveller"). ;實際上喺本書入面提嘅人係個遊客嘅某個祖先,而唔係就係佢阿爺。
  2. Horwich, Paul (1987). Asymmetries in Time. Cambridge, MIT Press. 第 116頁. 
  3. 可以睇下亞斐·比士多嘅《殺咗模罕默德嘅人》,出版於1958年,喺呢年前一年,埃和列提出多世界詮釋中文多世界詮釋
  4. Eugenia Williamson (2013-04-06). "Book review: Life after Life' by Kate Atkinson". The Boston Globe. 喺2013-08-09搵到. 。關於穿越過去暗殺希特拉呢個題材吸引咗好多人去寫,成爲一類科幻題材。呢類題材就係想像下置於當時嘅歷史條件下面,件事成唔成、成咗有可能有咩後果。
  5. Brennan, J. (2002). Time Travel: A New Perspective. Llewellyn Publications. 第 23頁. ISBN 9781567180855. A variation on the grandfather paradox... is the Hitler paradox. In this one you travel back in time to murder Hitler before he starts the Second World War, thus saving millions of lives. But if you murder Hitler in, say, 1938, then the Second World War will never come about and you will have no reason to travel back in time to murder Hitler!(譯:祖父悖論有好多種變體……比如有希特拉悖論。喺呢個悖論度,你返咗喺希特拉發動二戰之前嘅過去殺咗佢,救咗千萬生靈。但既然你都殺咗希特拉喇,即係話1938年二戰無發生到,噉你點解要返去殺咗希特拉呢!) 
  6. Esther Inglis-Arkell (2012). "Are we running out of time to kill Hitler via time travel?". io9. 喺2013-08-12搵到. 。作者係問:「有無必要穿越時光殺咗希特拉?」