軍事科技

核武造成嘅蘑菇雲；蘑菇雲會喺地面有極大熱能出現嗰陣產生，喺火山爆發嗰時都會見到。

軍事科技（粵拼：gwan1 si6 fo1 gei6 ）係指軍事上用嘅科技。呢個詞可以包括只會喺軍事上先用到嘅科技，亦可以包括一啲軍人同平民都會用到嘅科技。好多時，呢啲科技如果未經軍事訓練嘅人亂咁用，會對佢哋自己同埋周圍嘅人造成嚴重危險，所以往往會禁止平民使用。

一覽

• 聲波武器：指靠射出強勁嘅聲波嚟對目標造成傷害嘅武器；實驗顯示，當一隻老鼠俾 184 dB 嘅聲射到嗰陣，佢嘅肺同肝都會受損，而喺人當中，持續聽到極低頻嘅聲聽 15 分鐘就有可能對腦部組織造成永久性嘅影響－聲可以係好有殺傷力嘅武器。
• 激光武器：激光係指透過某啲特定類型嘅光放大器而產生嘅極強光；呢啲光帶嘅能量可以好勁，勁到可以一嘢射盲人嘅眼，甚至係可以攞嚟做焊接等嘅工作，所以自然有可能攞嚟做武器。廿世紀嘅軟科幻作品好多時會對激光有唔真實嘅描繪，例如激光係光，所以會以光速前進，但軟科幻作品成日將佢哋嗰啲所謂「激光」描繪成以好似一般子彈噉嘅速度前進。比較真實嘅激光武器例子就可以睇吓 RTS 遊戲《終極動員令系列》當中嘅美軍用嘅衛星激光武器。
• 粒子束武器：指內置粒子加速器嘅武器；呢啲武器會用加速器將得原子咁大粒或者再細啲嘅粒子以極高嘅速度（光速咁滯）射向目標，破壞目標嘅原子或者分子結構；原則上，粒子束武器射出嘅粒子帶嘅動能可以去到成 10⁹ J 咁高，足以打穿任何已知嘅裝甲或者牆。
• 大規模殺傷性武器（WMD）係指大規模範圍屠殺同破壞毀滅嘅區域戰略武器，有唔少軍事科幻作品都會講及人使用大規模殺傷性武器嚟導致巨大嘅破壞，表達作者對未來軍事科技能夠達到嘅破壞力嘅不安感。
• 電磁軌道炮：指運用電磁力以極高速度射出炮彈嘅炮，電磁軌道炮嘅炮彈通常唔帶炸藥，而係齋靠粒炮彈嘅動能嚟對目標造成傷害。到咗 2020 年，電磁軌道炮經已能夠做到以超過秒速 3 km 嘅速度射出炮彈－相比之下，同期用炸藥能量嚟射出嘅炮彈嘅速度好少可會過到秒速 2 km；不過就算到咗 2010 年代，電磁軌道炮都仲係因為唔夠襟用等嘅原因而未能得到軍隊實際採用。
• 電磁脈衝（EMP）：指由帶電荷粒子突然好勁噉加速而引起嘅短暫強勁電磁能量脈衝；EMP 所帶嘅能量可以搞到周圍過得到電嘅物體突然間出現強勁嘅電流同加熱，而呢點可以破壞電子架生入面嘅電路－所以 EMP 可以用嚟達到破壞敵軍嘅電子架生嘅效果。科幻故仔成日會講比起現實嘅 EMP 更先進更受控嘅 EMP 俾人攞嚟喺軍事上做干擾嘅用途。

睇埋

• 軍事科幻
• 機甲