科幻當中嘅武器

科幻當中嘅武器，或者叫未來武器，係指科幻故仔當中有嘅武器：軍事科幻作品成日會想像未來科技所創造嘅武器，例子包括廿世紀科幻當中好出名嘅《星戰》入面嘅激光劍同好多科幻故仔都有嘅死光槍；而比較硬嘅軍事科幻作品仲會思考大規模殺傷性武器（WMD）等嘅課題同相關嘅道德爭議所引起嘅角色衝突。

能量武器

2006 年用激光嚟做焊接

内文：能量武器

能量武器（DEW）泛指靠射出高度集中嘅能量嘅長距離武器。

• 死光槍：泛指能夠射出能量嚟造成破壞嘅武器，常見於軟科幻；喺多數故仔入面，當一個揸住死光槍嘅人掹雞嗰陣，支槍會射出一束光線，而呢啲光線打中人或者物件就會造成傷害。有啲作品仲會描繪唔同類型嘅死光槍，例如冷凍光係一種常見嘅軟科幻橋段，指俾佢射到會結冰嘅死光，例子可以睇蝙蝠俠漫畫當中嘅奸角急凍人用嘅武器。
• 聲波武器：指靠射出強勁嘅聲波嚟對目標造成傷害嘅武器；實驗顯示，當一隻老鼠俾 184 dB 嘅聲射到嗰陣，佢嘅肺同肝都會受損，而喺人當中，持續聽到極低頻嘅聲聽 15 分鐘就有可能對腦部組織造成永久嘅影響－聲可以係好有殺傷力嘅武器。
• 激光武器：激光係指透過某啲特定類型嘅光放大器而產生嘅極強光；呢啲光帶嘅能量可以好勁，勁到可以一嘢射盲人嘅眼，甚至係可以攞嚟做焊接等嘅工作，所以自然有可能攞嚟做武器。廿世紀嘅軟科幻作品好多時會對激光有唔真實嘅描繪，例如激光係光，所以會以光速前進，但軟科幻作品成日將佢哋嗰啲所謂「激光」描繪成以好似一般子彈噉嘅速度前進。比較真實嘅激光武器例子就可以睇吓 RTS 遊戲《終極動員令系列》（C & C）當中嘅美軍用嘅衛星激光武器。
• 粒子束武器：指內置粒子加速器嘅武器；呢啲武器會用加速器將得原子咁大粒或者再細啲嘅粒子以極高嘅速度（光速咁滯）射向目標，破壞目標嘅原子或者分子結構；原則上，粒子束武器射出嘅粒子帶嘅動能（指物體因為郁動而有嘅能量）可以去到成 10⁹ J 咁高，足以打穿任何已知嘅裝甲或者牆。

WMD

核武造成嘅蘑菇雲；蘑菇雲會喺地面有極大熱能出現嗰陣產生，喺火山爆發嗰時都會見到。

内文：大殺傷力武器

睇埋：末日幻想

大殺傷力武器（WMD，嚟自英文 weapon of mass destruction 嘅簡稱）係指大規模範圍屠殺同破壞毀滅嘅區域戰略武器，有唔少軍事科幻作品都會講及人使用大殺傷力武器嚟導致巨大嘅破壞，表達作者對未來軍事科技能夠達到嘅破壞力嘅不安感。

• CBRN：指大殺傷力武器成日會用到嘅四樣嘢：
  • 化學武器（Chemical）：靠某啲化學物質嘅毒性嚟造成傷害嘅武器，例子可以睇沙林毒氣；
  • 生物武器（Biological）：指運用細菌、真菌同埋病毒等有生命嘅嘢對目標造成傷害；
  • 輻射武器（Radiological）：指運用輻射嚟對人體造成傷害嘅武器，或者用輻射污染一笪（對敵人嚟講有價值嘅）地方；
  • 核武（Nuclear）：指靠核反應嚟產生強大能量，引起大規模爆炸嘅武器；核武可以由極少量嘅物質嗰度產生極龐大嘅能量，例如首次正式測試嘅核彈就做到一吓釋放出相當於 20,000 TNT咁勁嘅能量，而喺二戰期間，美軍淨係各用咗一粒核彈就將大半個廣島以及長崎炸咗去，而且核彈造成嘅輻射污染仲搞到有大量嘅軍人同平民生癌症，總共引致數以十萬計嘅軍人同平民傷亡。核武喺廿世紀初都仲純屬科幻嘅內容，例如英國科幻之父 H. G. 威爾斯就喺 1914 年寫咗《受解放嘅世界》呢本小說，內容講到核彈。

其他類型

• 機甲（片假名：メカ；日羅：meka）：機甲係廿世紀軍事科技上嘅一種構想，指由人類直接操作嚟戰鬥嘅巨型機械，可以但唔一定係人噉嘅形狀。機甲除咗文學同漫畫作品之外，亦都常見於用科幻美學嘅電子遊戲，用意係想俾玩家一嘗揸或者指揮機甲嘅快感。一般嚟講，機甲可以按真實度分類：
  • 軟科幻作品入面嘅機甲通常會比較似人形、由少數幾個角色控制、而且戰鬥力誇張到可以一部打低成支敵軍，例如《變形金剛》就描繪曉由車或者飛機呢啲平凡嘢變身做巨型機械人嘅機甲，而《悍戰太平洋》就有成座大廈咁高、一架可以當一支軍隊嘅巨型機甲。可以睇埋《機動戰士高達》等嘅作品。
  • 硬科幻作品入面嘅機甲就比較真實，通常望落似「有腳嘅坦克車」多過似人形、會大量生產俾軍隊大規模噉採用，而且戰鬥力未至於勁到可以一部打成支敵軍，而係會好似現實世界嘅坦克車或者戰鬥機噉以團隊同有策略嘅方式作戰。例子可以睇科樂美嘅《合金裝備》同 Square Enix 嘅《前線任務》。

• 電磁軌道炮：指運用電磁力以極高速度射出炮彈嘅炮，電磁軌道炮嘅炮彈通常唔帶炸藥，而係齋靠粒炮彈嘅動能嚟對目標造成傷害。到咗 2020 年，電磁軌道炮經已能夠做到以超過秒速 3 km 嘅速度射出炮彈－相比之下，同期用炸藥能量嚟射出嘅炮彈嘅速度好少可會過到秒速 2 km；不過就算到咗 2010 年代，電磁軌道炮都仲係因為唔夠襟用等嘅原因而未能得到軍隊實際採用。
• 電磁脈衝（EMP）：指由帶電荷粒子突然好勁噉加速而引起嘅短暫強勁電磁能量脈衝；EMP 所帶嘅能量可以搞到周圍過得到電嘅物體突然間出現強勁嘅電流同加熱，而呢點可以破壞電子架生入面嘅電路－所以 EMP 可以用嚟達到破壞敵軍嘅電子架生嘅效果。科幻故仔成日會講比起現實嘅 EMP 更先進更受控嘅 EMP 俾人攞嚟喺軍事上做干擾嘅用途。
• 動力服：指一啲人可以著上身嘅機械，用意在於想要提升個人嘅力量同耐力；喺現實世界，呢啲科技可以用嚟幫人搬重嘢或者幫有殘疾嘅人行路等嘅用途。唔少科幻作品都會描繪動力服俾人攞嚟做軍事用途，例如係著住能夠幫人飛天同裝有武器嘅動力服戰鬥，例子可以睇鐵甲奇俠嘅相關漫畫。
• 太空武器：泛指喺太空戰當中用嘅武器。
  • 反衛星武器（ASAT）：指用嚟為咗軍事目的破壞或者阻礙人造衛星嘅武器－喺好多國家同地區，人造衛星都對通訊嚟講不可或缺，所以反衛星武器理論上能夠造到暫時封鎖敵方通訊等嘅效果。呢種武器到咗廿一世紀初經已成為現實，例如美國海軍就喺 2008 年 2 月 21 號用由一架船上射出嘅導彈破壞自身一個出咗故障嘅間諜衛星。
  • 天基動能武器：源於冷戰時期嘅一種構想；指由人造衛星將一啲物體揼落去一粒行星嘅表面上，用意在於破壞行星表面嘅目標；原則上，天基動能武器可以好勁－天基動能武器揼嘅物體可以以好高角度同速度攻擊目標，所以極難防禦，不過到咗廿一世紀初，因為成本等嘅問題，呢種武器仲係一種構想。順帶一提，因為預想中嘅天基動能武器揼嘅係粗嘅金屬棒，所以呢種武器又有個花名叫「由上帝嗰度嚟嘅棒」。用科幻美學嘅射擊遊戲《Halo》入面就有提到天基動能武器。

睇埋

• 軍事科幻