光

  想搵第二個意思嘅話，請睇光 (搞清楚)。

全內反射

光（粵拼：gwong1）喺一般人嘅生活中，係一種摸唔到、有色、幫人睇嘢嘅輻射。

光喺科學上，係一種電磁波，包含肉眼睇得倒，同睇唔倒嘅。唔同嘅波長決定佢哋唔同嘅特性，由長至短分別係：無線電波、微波、紅外光、可見光、紫外光、X-光、伽馬射線。

定位

睇埋：光學同雙縫實驗

光學係物理學嘅一門，專門研究光。齋靠肉眼嘅觀察就經已可知，光主宰咗人睇唔睇到嘢－當周圍好光，人能夠清楚噉睇到周圍嘅嘢，而响黑暗（指冇光嘅環境）嘅環境下人會睇唔到嘢或者睇得冇咁清楚－事實係喺早期嘅光學研究（人類仲未有波動嘅概念）裏面，有部份嘅研究者會就噉將光定義做「令人睇到嘢嘅嘢」。

响現代嘅物理學上，光嘅定義係「一類波長喺特定間距（大約 380 至 700 nm）內嘅電磁波」：由中世紀以嚟嘅光學研究可知，光有好多特性係物質冇嘅，包括係曉折射同繞射呀噉－呢點同聲或者水表面上嘅波浪一樣，於是物理學界有咗「波動」嘅概念模型（可以睇吓 19 世紀初嘅雙縫實驗）；有咗呢樣知識，物理學家就可以郁手以波動嘅角度嚟研究光。

波動

内文：波動

睇埋：電磁波

喺物理學上，波動（wave）係指

• 擾動（disturbance）－一個或者以上嘅物理量喺平衡點嘅周圍來回變化（個物理量由 $A$ 郁去 0，再郁去 $-A$，跟住郁返去 0，然後再郁去 $A$... 當中 $A$ 係場波動嘅振幅）；
• 而且呢股擾動會喺空間當中行進；
• 波動可以係有週期性嘅，即係每隔一段時間（週期；$T$）就重複一次，而頻率 $f$ 就係指每秒之內重複幾多次，$f=1/T$；

－好似係水上面嘅波浪就可以噉想像：喺呢種波動當中，來回變化緊嘅物理量係粒子嘅位置 $y$，$y$ 數值會喺 $A$、０ 同 $-A$ 之間來回噉郁嚟郁去，而呢股「令粒子來回上下郁」嘅力量仲會沿住水面傳開去。波動－包括波浪、聲同光在內－有好多物質冇嘅特性，例如係曉折射同繞射（下面）呀噉。至於要點樣證實光係種電磁性質嘅波動（電磁波），可以睇吓麥士維方程組相關嘅內容。

現實世界嘅漣漪（左圖）同相關嘅表面波現象，可以想像成水嘅粒子受到擾動而上下噉來回郁（右圖嘅抽象圖解），而且呢股擾動仲會沿住水面傳開去。

光速

光嘅速度，喺真空裏頭，每秒299,792,458米。光速本身係一個常數，以符號 c 表示。

相關

• 電磁波
• 光速
• 光學
• 光子